अपे॑हि मनसस्प॒तेऽप॑ क्राम प॒रश्च॑र ।
प॒रो निरृ॑त्या॒ आ च॑क्ष्व बहु॒धा जीव॑तो॒ मन॑ः
apehi manasaspate'pa krāma paraścara |
paro nirṛtyā ā cakṣva bahudhā jīvato manaḥ
Mandala 10
Sukta 164: Sending away the bad dream
Rishi: प्रचेता आङ्गिरसः · Devata: दुःस्वप्ननाशनम् · Metre: अनुष्टुप्, ३ त्रिष्टुप्, ५ पङ्क्तिः
5 verses · 164 of 191
What happens in this chapter
Sending away the bad dream
Pracheta Angirasa speaks against the evil dream, chiefly in anushtubh. Go away, lord of the mind, depart, wander far; tell Nirriti far off that the mind of the living sees many things. Men choose a good boon and a good gift; good is the eye of Vaivasvata, and the mind of the living ranges widely. Whatever wrong we have done by wish, by curse or by slander, waking or sleeping, may Agni set it far from us. If we act with malice, Indra and Brahmanaspati, may Pracheta guard us from harm. We have won today; we are sinless. Let the evil dream go to the one who hates us.
भ॒द्रं वै वरं॑ वृणते भ॒द्रं यु॑ञ्जन्ति॒ दक्षि॑णम् ।
भ॒द्रं वै॑वस्व॒ते चक्षु॑र्बहु॒त्रा जीव॑तो॒ मन॑ः
bhadraṃ vai varaṃ vṛṇate bhadraṃ yuñjanti dakṣiṇam |
bhadraṃ vaivasvate cakṣurbahutrā jīvato manaḥ
यदा॒शसा॑ नि॒ःशसा॑भि॒शसो॑पारि॒म जाग्र॑तो॒ यत्स्व॒पन्त॑ः ।
अ॒ग्निर्विश्वा॒न्यप॑ दुष्कृ॒तान्यजु॑ष्टान्या॒रे अ॒स्मद्द॑धातु
yadāśasā niḥśasābhiśasopārima jāgrato yatsvapantaḥ |
agnirviśvānyapa duṣkṛtānyajuṣṭānyāre asmaddadhātu
यदि॑न्द्र ब्रह्मणस्पतेऽभिद्रो॒हं चरा॑मसि ।
प्रचे॑ता न आङ्गिर॒सो द्वि॑ष॒तां पा॒त्वंह॑सः
yadindra brahmaṇaspate'bhidrohaṃ carāmasi |
pracetā na āṅgiraso dviṣatāṃ pātvaṃhasaḥ
अजै॑ष्मा॒द्यास॑नाम॒ चाभू॒माना॑गसो व॒यम् ।
जा॒ग्र॒त्स्व॒प्नः सं॑क॒ल्पः पा॒पो यं द्वि॒ष्मस्तं स ऋ॑च्छतु॒ यो नो॒ द्वेष्टि॒ तमृ॑च्छतु
ajaiṣmādyāsanāma cābhūmānāgaso vayam |
jāgratsvapnaḥ saṃkalpaḥ pāpo yaṃ dviṣmastaṃ sa ṛcchatu yo no dveṣṭi tamṛcchatu
Text source: Wikisource · CC BY-SA 4.0 (Wikisource transcription of a public-domain text)