Rishi: नैर्ऋतः कपोतः · Devata: विश्वे देवाः · Metre: त्रिष्टुप्
5 verses · 165 of 191
Kapota Nairrita speaks to the Vishvedevas in trishtubh about a pigeon that has come into the house. Devas, if the pigeon has come here sent as the messenger of Nirriti, we sing and make amends; may there be welfare for two-footed and four-footed. Let it be kind in our homes; may Agni accept our offering and the winged missile pass us by. It has set its foot by the fire; may it not harm cows or men. What the owl says is empty. To Yama, to Mrityu, whose messenger this is, be reverence. Drive the pigeon out with a verse, and let it fly off, leaving us strength.
देवा॑ः क॒पोत॑ इषि॒तो यदि॒च्छन्दू॒तो निरृ॑त्या इ॒दमा॑ज॒गाम॑ ।
तस्मा॑ अर्चाम कृ॒णवा॑म॒ निष्कृ॑तिं॒ शं नो॑ अस्तु द्वि॒पदे॒ शं चतु॑ष्पदे
devāḥ kapota iṣito yadicchandūto nirṛtyā idamājagāma |
tasmā arcāma kṛṇavāma niṣkṛtiṃ śaṃ no astu dvipade śaṃ catuṣpade
शि॒वः क॒पोत॑ इषि॒तो नो॑ अस्त्वना॒गा दे॑वाः शकु॒नो गृ॒हेषु॑ ।
अ॒ग्निर्हि विप्रो॑ जु॒षतां॑ ह॒विर्न॒ः परि॑ हे॒तिः प॒क्षिणी॑ नो वृणक्तु
śivaḥ kapota iṣito no astvanāgā devāḥ śakuno gṛheṣu |
agnirhi vipro juṣatāṃ havirnaḥ pari hetiḥ pakṣiṇī no vṛṇaktu
हे॒तिः प॒क्षिणी॒ न द॑भात्य॒स्माना॒ष्ट्र्यां प॒दं कृ॑णुते अग्नि॒धाने॑ ।
शं नो॒ गोभ्य॑श्च॒ पुरु॑षेभ्यश्चास्तु॒ मा नो॑ हिंसीदि॒ह दे॑वाः क॒पोत॑ः
hetiḥ pakṣiṇī na dabhātyasmānāṣṭryāṃ padaṃ kṛṇute agnidhāne |
śaṃ no gobhyaśca puruṣebhyaścāstu mā no hiṃsīdiha devāḥ kapotaḥ
यदुलू॑को॒ वद॑ति मो॒घमे॒तद्यत्क॒पोत॑ः प॒दम॒ग्नौ कृ॒णोति॑ ।
यस्य॑ दू॒तः प्रहि॑त ए॒ष ए॒तत्तस्मै॑ य॒माय॒ नमो॑ अस्तु मृ॒त्यवे॑
yadulūko vadati moghametadyatkapotaḥ padamagnau kṛṇoti |
yasya dūtaḥ prahita eṣa etattasmai yamāya namo astu mṛtyave
ऋ॒चा क॒पोतं॑ नुदत प्र॒णोद॒मिषं॒ मद॑न्त॒ः परि॒ गां न॑यध्वम् ।
सं॒यो॒पय॑न्तो दुरि॒तानि॒ विश्वा॑ हि॒त्वा न॒ ऊर्जं॒ प्र प॑ता॒त्पति॑ष्ठः
ṛcā kapotaṃ nudata praṇodamiṣaṃ madantaḥ pari gāṃ nayadhvam |
saṃyopayanto duritāni viśvā hitvā na ūrjaṃ pra patātpatiṣṭhaḥ
Text source: Wikisource · CC BY-SA 4.0 (Wikisource transcription of a public-domain text)
