Rishi: देवगन्धर्वो विश्वावसुः · Devata: सविता, ४-६ आत्मा · Metre: त्रिष्टुप्
6 verses · 139 of 191
The rishi is the divine gandharva Vishvavasu, in trishtubh; Savitar is the devata, and the Atman in verses four to six. Golden-haired Savitar, with the sun's rays, raises his unfailing light in the east, and Pushan goes in his impulse as herdsman of all worlds. Seated in the middle of heaven, he fills sky, earth and mid-air and looks on all forms, true in his law. The waters saw the gandharva Vishvavasu and parted by rta; Indra followed and saw the bounds of the sun. Vishvavasu, measurer of the regions, is asked to speak for us what is true and what we do not know, and to guard our thoughts.
सूर्य॑रश्मि॒र्हरि॑केशः पु॒रस्ता॑त्सवि॒ता ज्योति॒रुद॑याँ॒ अज॑स्रम् ।
तस्य॑ पू॒षा प्र॑स॒वे या॑ति वि॒द्वान्स॒म्पश्य॒न्विश्वा॒ भुव॑नानि गो॒पाः
sūryaraśmirharikeśaḥ purastātsavitā jyotirudayām̐ ajasram |
tasya pūṣā prasave yāti vidvānsampaśyanviśvā bhuvanāni gopāḥ
नृ॒चक्षा॑ ए॒ष दि॒वो मध्य॑ आस्त आपप्रि॒वान्रोद॑सी अ॒न्तरि॑क्षम् ।
स वि॒श्वाची॑र॒भि च॑ष्टे घृ॒ताची॑रन्त॒रा पूर्व॒मप॑रं च के॒तुम्
nṛcakṣā eṣa divo madhya āsta āpaprivānrodasī antarikṣam |
sa viśvācīrabhi caṣṭe ghṛtācīrantarā pūrvamaparaṃ ca ketum
रा॒यो बु॒ध्नः सं॒गम॑नो॒ वसू॑नां॒ विश्वा॑ रू॒पाभि च॑ष्टे॒ शची॑भिः ।
दे॒व इ॑व सवि॒ता स॒त्यध॒र्मेन्द्रो॒ न त॑स्थौ सम॒रे धना॑नाम्
rāyo budhnaḥ saṃgamano vasūnāṃ viśvā rūpābhi caṣṭe śacībhiḥ |
deva iva savitā satyadharmendro na tasthau samare dhanānām
वि॒श्वाव॑सुं सोम गन्ध॒र्वमापो॑ ददृ॒शुषी॒स्तदृ॒तेना॒ व्या॑यन् ।
तद॒न्ववै॒दिन्द्रो॑ रारहा॒ण आ॑सां॒ परि॒ सूर्य॑स्य परि॒धीँर॑पश्यत्
viśvāvasuṃ soma gandharvamāpo dadṛśuṣīstadṛtenā vyāyan |
tadanvavaidindro rārahāṇa āsāṃ pari sūryasya paridhīm̐rapaśyat
वि॒श्वाव॑सुर॒भि तन्नो॑ गृणातु दि॒व्यो ग॑न्ध॒र्वो रज॑सो वि॒मान॑ः ।
यद्वा॑ घा स॒त्यमु॒त यन्न वि॒द्म धियो॑ हिन्वा॒नो धिय॒ इन्नो॑ अव्याः
viśvāvasurabhi tanno gṛṇātu divyo gandharvo rajaso vimānaḥ |
yadvā ghā satyamuta yanna vidma dhiyo hinvāno dhiya inno avyāḥ
सस्नि॑मविन्द॒च्चर॑णे न॒दीना॒मपा॑वृणो॒द्दुरो॒ अश्म॑व्रजानाम् ।
प्रासां॑ गन्ध॒र्वो अ॒मृता॑नि वोच॒दिन्द्रो॒ दक्षं॒ परि॑ जानाद॒हीना॑म्
sasnimavindaccaraṇe nadīnāmapāvṛṇodduro aśmavrajānām |
prāsāṃ gandharvo amṛtāni vocadindro dakṣaṃ pari jānādahīnām
Text source: Wikisource · CC BY-SA 4.0 (Wikisource transcription of a public-domain text)
