ए॒षो उ॒षा अपू॑र्व्या॒ व्यु॑च्छति प्रि॒या दि॒वः ।
स्तु॒षे वा॑मश्विना बृ॒हत्
eṣo uṣā apūrvyā vyucchati priyā divaḥ |
stuṣe vāmaśvinā bṛhat
Mandala 1
Sukta 46: Ashvins at dawn, the ship across
Rishi: प्रस्कण्वः काण्वः · Devata: अश्विनौ · Metre: गायत्री
15 verses · 46 of 191
What happens in this chapter
Ashvins at dawn, the ship across
Ushas, dear daughter of heaven, has shone out unlike any before, and Praskanva Kanva, in gayatri, praises the Ashvins at her coming. They are the wonder-workers born of the river, finders of wealth, whose chariot flies like birds. He asks them to yoke the chariot and come in the ship of thought to carry the singers across. Their oar is as wide as the sky, their car stands at the ford of the rivers. The sun has risen like gold, the path of rita lies open. He asks for food that leads through darkness to light, and for shelter.
या द॒स्रा सिन्धु॑मातरा मनो॒तरा॑ रयी॒णाम् ।
धि॒या दे॒वा व॑सु॒विदा॑
yā dasrā sindhumātarā manotarā rayīṇām |
dhiyā devā vasuvidā
व॒च्यन्ते॑ वां ककु॒हासो॑ जू॒र्णाया॒मधि॑ वि॒ष्टपि॑ ।
यद्वां॒ रथो॒ विभि॒ष्पता॑त्
vacyante vāṃ kakuhāso jūrṇāyāmadhi viṣṭapi |
yadvāṃ ratho vibhiṣpatāt
ह॒विषा॑ जा॒रो अ॒पां पिप॑र्ति॒ पपु॑रिर्नरा ।
पि॒ता कुट॑स्य चर्ष॒णिः
haviṣā jāro apāṃ piparti papurirnarā |
pitā kuṭasya carṣaṇiḥ
आ॒दा॒रो वां॑ मती॒नां नास॑त्या मतवचसा ।
पा॒तं सोम॑स्य धृष्णु॒या
ādāro vāṃ matīnāṃ nāsatyā matavacasā |
pātaṃ somasya dhṛṣṇuyā
या न॒ः पीप॑रदश्विना॒ ज्योति॑ष्मती॒ तम॑स्ति॒रः ।
ताम॒स्मे रा॑साथा॒मिष॑म्
yā naḥ pīparadaśvinā jyotiṣmatī tamastiraḥ |
tāmasme rāsāthāmiṣam
आ नो॑ ना॒वा म॑ती॒नां या॒तं पा॒राय॒ गन्त॑वे ।
यु॒ञ्जाथा॑मश्विना॒ रथ॑म्
ā no nāvā matīnāṃ yātaṃ pārāya gantave |
yuñjāthāmaśvinā ratham
अ॒रित्रं॑ वां दि॒वस्पृ॒थु ती॒र्थे सिन्धू॑नां॒ रथ॑ः ।
धि॒या यु॑युज्र॒ इन्द॑वः
aritraṃ vāṃ divaspṛthu tīrthe sindhūnāṃ rathaḥ |
dhiyā yuyujra indavaḥ
दि॒वस्क॑ण्वास॒ इन्द॑वो॒ वसु॒ सिन्धू॑नां प॒दे ।
स्वं व॒व्रिं कुह॑ धित्सथः
divaskaṇvāsa indavo vasu sindhūnāṃ pade |
svaṃ vavriṃ kuha dhitsathaḥ
अभू॑दु॒ भा उ॑ अं॒शवे॒ हिर॑ण्यं॒ प्रति॒ सूर्य॑ः ।
व्य॑ख्यज्जि॒ह्वयासि॑तः
abhūdu bhā u aṃśave hiraṇyaṃ prati sūryaḥ |
vyakhyajjihvayāsitaḥ
अभू॑दु पा॒रमेत॑वे॒ पन्था॑ ऋ॒तस्य॑ साधु॒या ।
अद॑र्शि॒ वि स्रु॒तिर्दि॒वः
abhūdu pārametave panthā ṛtasya sādhuyā |
adarśi vi srutirdivaḥ
तत्त॒दिद॒श्विनो॒रवो॑ जरि॒ता प्रति॑ भूषति ।
मदे॒ सोम॑स्य॒ पिप्र॑तोः
tattadidaśvinoravo jaritā prati bhūṣati |
made somasya pipratoḥ
वा॒व॒सा॒ना वि॒वस्व॑ति॒ सोम॑स्य पी॒त्या गि॒रा ।
म॒नु॒ष्वच्छ॑म्भू॒ आ ग॑तम्
vāvasānā vivasvati somasya pītyā girā |
manuṣvacchambhū ā gatam
यु॒वोरु॒षा अनु॒ श्रियं॒ परि॑ज्मनोरु॒पाच॑रत् ।
ऋ॒ता व॑नथो अ॒क्तुभि॑ः
yuvoruṣā anu śriyaṃ parijmanorupācarat |
ṛtā vanatho aktubhiḥ
उ॒भा पि॑बतमश्विनो॒भा न॒ः शर्म॑ यच्छतम् ।
अ॒वि॒द्रि॒याभि॑रू॒तिभि॑ः
ubhā pibatamaśvinobhā naḥ śarma yacchatam |
avidriyābhirūtibhiḥ
Text source: Wikisource · CC BY-SA 4.0 (Wikisource transcription of a public-domain text)