त्वम॑ग्ने॒ वसूँ॑रि॒ह रु॒द्राँ आ॑दि॒त्याँ उ॒त ।
यजा॑ स्वध्व॒रं जनं॒ मनु॑जातं घृत॒प्रुष॑म्
tvamagne vasūm̐riha rudrām̐ ādityām̐ uta |
yajā svadhvaraṃ janaṃ manujātaṃ ghṛtapruṣam
Mandala 1
Sukta 45: Agni, bring the thirty-three gods
Rishi: प्रस्कण्वः काण्वः · Devata: अग्निः, १० (उत्तरार्धस्य) देवाः · Metre: अनुष्टुप्
10 verses · 45 of 191
What happens in this chapter
Agni, bring the thirty-three gods
In anushtubh, Praskanva Kanva asks Agni to offer worship to the Vasus, the Rudras and the Adityas, and to bring all thirty-three gods on his red horses. He prays to be heard as Agni once heard Priyamedha, Atri, Virupa and Angiras. Agni is the hotar and ritvij, flame-haired, with ears that hear every call, the richest giver of wealth. The priests have pressed Soma and hold out the offering. The last verse turns to the gods themselves: here is Soma kept from yesterday, drink it, you generous ones, and come to sit on the barhis this morning.
श्रु॒ष्टी॒वानो॒ हि दा॒शुषे॑ दे॒वा अ॑ग्ने॒ विचे॑तसः ।
तान्रो॑हिदश्व गिर्वण॒स्त्रय॑स्त्रिंशत॒मा व॑ह
śruṣṭīvāno hi dāśuṣe devā agne vicetasaḥ |
tānrohidaśva girvaṇastrayastriṃśatamā vaha
प्रि॒य॒मे॒ध॒वद॑त्रि॒वज्जात॑वेदो विरूप॒वत् ।
अ॒ङ्गि॒र॒स्वन्म॑हिव्रत॒ प्रस्क॑ण्वस्य श्रुधी॒ हव॑म्
priyamedhavadatrivajjātavedo virūpavat |
aṅgirasvanmahivrata praskaṇvasya śrudhī havam
महि॑केरव ऊ॒तये॑ प्रि॒यमे॑धा अहूषत ।
राज॑न्तमध्व॒राणा॑म॒ग्निं शु॒क्रेण॑ शो॒चिषा॑
mahikerava ūtaye priyamedhā ahūṣata |
rājantamadhvarāṇāmagniṃ śukreṇa śociṣā
घृता॑हवन सन्त्ये॒मा उ॒ षु श्रु॑धी॒ गिर॑ः ।
याभि॒ः कण्व॑स्य सू॒नवो॒ हव॒न्तेऽव॑से त्वा
ghṛtāhavana santyemā u ṣu śrudhī giraḥ |
yābhiḥ kaṇvasya sūnavo havante'vase tvā
त्वां चि॑त्रश्रवस्तम॒ हव॑न्ते वि॒क्षु ज॒न्तव॑ः ।
शो॒चिष्के॑शं पुरुप्रि॒याग्ने॑ ह॒व्याय॒ वोळ्ह॑वे
tvāṃ citraśravastama havante vikṣu jantavaḥ |
śociṣkeśaṃ purupriyāgne havyāya voḻhave
नि त्वा॒ होता॑रमृ॒त्विजं॑ दधि॒रे व॑सु॒वित्त॑मम् ।
श्रुत्क॑र्णं स॒प्रथ॑स्तमं॒ विप्रा॑ अग्ने॒ दिवि॑ष्टिषु
ni tvā hotāramṛtvijaṃ dadhire vasuvittamam |
śrutkarṇaṃ saprathastamaṃ viprā agne diviṣṭiṣu
आ त्वा॒ विप्रा॑ अचुच्यवुः सु॒तसो॑मा अ॒भि प्रय॑ः ।
बृ॒हद्भा बिभ्र॑तो ह॒विरग्ने॒ मर्ता॑य दा॒शुषे॑
ā tvā viprā acucyavuḥ sutasomā abhi prayaḥ |
bṛhadbhā bibhrato haviragne martāya dāśuṣe
प्रा॒त॒र्याव्ण॑ः सहस्कृत सोम॒पेया॑य सन्त्य ।
इ॒हाद्य दैव्यं॒ जनं॑ ब॒र्हिरा सा॑दया वसो
prātaryāvṇaḥ sahaskṛta somapeyāya santya |
ihādya daivyaṃ janaṃ barhirā sādayā vaso
अ॒र्वाञ्चं॒ दैव्यं॒ जन॒मग्ने॒ यक्ष्व॒ सहू॑तिभिः ।
अ॒यं सोम॑ः सुदानव॒स्तं पा॑त ति॒रोअ॑ह्न्यम्
arvāñcaṃ daivyaṃ janamagne yakṣva sahūtibhiḥ |
ayaṃ somaḥ sudānavastaṃ pāta tiroahnyam
Text source: Wikisource · CC BY-SA 4.0 (Wikisource transcription of a public-domain text)