अश्वि॑ना॒ यज्व॑री॒रिषो॒ द्रव॑त्पाणी॒ शुभ॑स्पती ।
पुरु॑भुजा चन॒स्यत॑म्
aśvinā yajvarīriṣo dravatpāṇī śubhaspatī |
purubhujā canasyatam
Mandala 1
Sukta 3: Ashvins, Indra, Vishvedevas and Sarasvati called
Rishi: मधुच्छन्दा वैश्वामित्रः · Devata: १-३ अश्विनौ, ४-६ इन्द्रः, ७-९ विश्वेदेवाः, १०-१२ सरस्वती · Metre: गायत्री
12 verses · 3 of 191
What happens in this chapter
Ashvins, Indra, Vishvedevas and Sarasvati called
Twelve gayatri verses by Madhuchchhandas Vaishvamitra move through four invitations. The Ashvins, swift-handed lords of splendour and wonder-workers, are asked to enjoy the food of the yajna and come along their Rudra-path, for the grass is spread. Indra of bright lustre is called three times to the Soma purified by fine strainers. The Vishvedevas, who support people and never harm, are asked to come to the pressing as cows hasten to their stalls. The close is famous: pavaka nah sarasvati. Sarasvati, the purifier rich in strength, rouses true speech and wakens good thought; she makes the great flood known and shines through every thought.
अश्वि॑ना॒ पुरु॑दंससा॒ नरा॒ शवी॑रया धि॒या ।
धिष्ण्या॒ वन॑तं॒ गिर॑ः
aśvinā purudaṃsasā narā śavīrayā dhiyā |
dhiṣṇyā vanataṃ giraḥ
दस्रा॑ यु॒वाक॑वः सु॒ता नास॑त्या वृ॒क्तब॑र्हिषः ।
आ या॑तं रुद्रवर्तनी
dasrā yuvākavaḥ sutā nāsatyā vṛktabarhiṣaḥ |
ā yātaṃ rudravartanī
इन्द्रा या॑हि चित्रभानो सु॒ता इ॒मे त्वा॒यव॑ः ।
अण्वी॑भि॒स्तना॑ पू॒तास॑ः
indrā yāhi citrabhāno sutā ime tvāyavaḥ |
aṇvībhistanā pūtāsaḥ
इन्द्रा या॑हि धि॒येषि॒तो विप्र॑जूतः सु॒ताव॑तः ।
उप॒ ब्रह्मा॑णि वा॒घत॑ः
indrā yāhi dhiyeṣito viprajūtaḥ sutāvataḥ |
upa brahmāṇi vāghataḥ
इन्द्रा या॑हि॒ तूतु॑जान॒ उप॒ ब्रह्मा॑णि हरिवः ।
सु॒ते द॑धिष्व न॒श्चन॑ः
indrā yāhi tūtujāna upa brahmāṇi harivaḥ |
sute dadhiṣva naścanaḥ
ओमा॑सश्चर्षणीधृतो॒ विश्वे॑ देवास॒ आ ग॑त ।
दा॒श्वांसो॑ दा॒शुष॑ः सु॒तम्
omāsaścarṣaṇīdhṛto viśve devāsa ā gata |
dāśvāṃso dāśuṣaḥ sutam
विश्वे॑ दे॒वासो॑ अ॒प्तुर॑ः सु॒तमा ग॑न्त॒ तूर्ण॑यः ।
उ॒स्रा इ॑व॒ स्वस॑राणि
viśve devāso apturaḥ sutamā ganta tūrṇayaḥ |
usrā iva svasarāṇi
विश्वे॑ दे॒वासो॑ अ॒स्रिध॒ एहि॑मायासो अ॒द्रुह॑ः ।
मेधं॑ जुषन्त॒ वह्न॑यः
viśve devāso asridha ehimāyāso adruhaḥ |
medhaṃ juṣanta vahnayaḥ
पा॒व॒का न॒ः सर॑स्वती॒ वाजे॑भिर्वा॒जिनी॑वती ।
य॒ज्ञं व॑ष्टु धि॒याव॑सुः
pāvakā naḥ sarasvatī vājebhirvājinīvatī |
yajñaṃ vaṣṭu dhiyāvasuḥ
चो॒द॒यि॒त्री सू॒नृता॑नां॒ चेत॑न्ती सुमती॒नाम् ।
य॒ज्ञं द॑धे॒ सर॑स्वती
codayitrī sūnṛtānāṃ cetantī sumatīnām |
yajñaṃ dadhe sarasvatī
म॒हो अर्ण॒ः सर॑स्वती॒ प्र चे॑तयति के॒तुना॑ ।
धियो॒ विश्वा॒ वि रा॑जति
maho arṇaḥ sarasvatī pra cetayati ketunā |
dhiyo viśvā vi rājati
Text source: Wikisource · CC BY-SA 4.0 (Wikisource transcription of a public-domain text)