समि॑द्धो अ॒द्य रा॑जसि दे॒वो दे॒वैः स॑हस्रजित् ।
दू॒तो ह॒व्या क॒विर्व॑ह
samiddho adya rājasi devo devaiḥ sahasrajit |
dūto havyā kavirvaha
Mandala 1
Sukta 188: Apri verses for the kindled Agni
Rishi: अगस्त्यो मैत्रावरुणिः · Devata: आप्रीसूक्तं (१ इध्मः समिद्धोऽग्निर्वा, २ तनूनपात्, ३ इळः, ४ बर्हिः, ५ देवीर्द्वारः, ६ उषासानक्ता, ७ दैव्यौ होतारौ प्रचेतसौ, ८ तिस्रो देव्यः सरस्वतीळाभारत्यः, ९ त्वष्टा, १० वनस्पतिः, ११ स्वाहाकृतयः · Metre: गायत्री
11 verses · 188 of 191
What happens in this chapter
Apri verses for the kindled Agni
An Apri sukta of Agastya Maitravaruni in gayatri, each verse to one figure of the animal-sacrifice rite. Kindled today, Agni shines as the god who wins thousands, messenger and seer. Then come Tanunapat, the Ila praise, the barhis spread eastward where the Adityas sit, the divine doors that pour ghee, Dawn and Night adorned with gold, the two divine hotars, and the three goddesses Bharati, Ila and Sarasvati. Tvashtar, who shapes all forms, is asked for increase of cattle; Vanaspati, the tree, releases the offering; and Agni, leader of the gods, shines in the svaha calls.
तनू॑नपादृ॒तं य॒ते मध्वा॑ य॒ज्ञः सम॑ज्यते ।
दध॑त्सह॒स्रिणी॒रिष॑ः
tanūnapādṛtaṃ yate madhvā yajñaḥ samajyate |
dadhatsahasriṇīriṣaḥ
आ॒जुह्वा॑नो न॒ ईड्यो॑ दे॒वाँ आ व॑क्षि य॒ज्ञिया॑न् ।
अग्ने॑ सहस्र॒सा अ॑सि
ājuhvāno na īḍyo devām̐ ā vakṣi yajñiyān |
agne sahasrasā asi
प्रा॒चीनं॑ ब॒र्हिरोज॑सा स॒हस्र॑वीरमस्तृणन् ।
यत्रा॑दित्या वि॒राज॑थ
prācīnaṃ barhirojasā sahasravīramastṛṇan |
yatrādityā virājatha
वि॒राट् स॒म्राड्वि॒भ्वीः प्र॒भ्वीर्ब॒ह्वीश्च॒ भूय॑सीश्च॒ याः ।
दुरो॑ घृ॒तान्य॑क्षरन्
virāṭ samrāḍvibhvīḥ prabhvīrbahvīśca bhūyasīśca yāḥ |
duro ghṛtānyakṣaran
सु॒रु॒क्मे हि सु॒पेश॒साधि॑ श्रि॒या वि॒राज॑तः ।
उ॒षासा॒वेह सी॑दताम्
surukme hi supeśasādhi śriyā virājataḥ |
uṣāsāveha sīdatām
प्र॒थ॒मा हि सु॒वाच॑सा॒ होता॑रा॒ दैव्या॑ क॒वी ।
य॒ज्ञं नो॑ यक्षतामि॒मम्
prathamā hi suvācasā hotārā daivyā kavī |
yajñaṃ no yakṣatāmimam
भार॒तीळे॒ सर॑स्वति॒ या व॒ः सर्वा॑ उपब्रु॒वे ।
ता न॑श्चोदयत श्रि॒ये
bhāratīḻe sarasvati yā vaḥ sarvā upabruve |
tā naścodayata śriye
त्वष्टा॑ रू॒पाणि॒ हि प्र॒भुः प॒शून्विश्वा॑न्समान॒जे ।
तेषां॑ नः स्फा॒तिमा य॑ज
tvaṣṭā rūpāṇi hi prabhuḥ paśūnviśvānsamānaje |
teṣāṃ naḥ sphātimā yaja
उप॒ त्मन्या॑ वनस्पते॒ पाथो॑ दे॒वेभ्य॑ः सृज ।
अ॒ग्निर्ह॒व्यानि॑ सिष्वदत्
upa tmanyā vanaspate pātho devebhyaḥ sṛja |
agnirhavyāni siṣvadat
पु॒रो॒गा अ॒ग्निर्दे॒वानां॑ गाय॒त्रेण॒ सम॑ज्यते ।
स्वाहा॑कृतीषु रोचते
purogā agnirdevānāṃ gāyatreṇa samajyate |
svāhākṛtīṣu rocate
Text source: Wikisource · CC BY-SA 4.0 (Wikisource transcription of a public-domain text)