ता वा॑म॒द्य ताव॑प॒रं हु॑वेमो॒च्छन्त्या॑मु॒षसि॒ वह्नि॑रु॒क्थैः ।
नास॑त्या॒ कुह॑ चि॒त्सन्ता॑व॒र्यो दि॒वो नपा॑ता सु॒दास्त॑राय
tā vāmadya tāvaparaṃ huvemocchantyāmuṣasi vahnirukthaiḥ |
nāsatyā kuha citsantāvaryo divo napātā sudāstarāya
Mandala 1
Sukta 184: Ashvins called at the breaking dawn
Rishi: अगस्त्यो मैत्रावरुणिः · Devata: अश्विनौ · Metre: त्रिष्टुप्
6 verses · 184 of 191
What happens in this chapter
Ashvins called at the breaking dawn
Agastya Maitravaruni calls the Ashvins in trishtubh today and tomorrow as dawn shines, wherever they may be. Let them rejoice with us and strike down the stingy Panis. Hear my songs, you who listen with your ears. They are praised as the gods who drove Surya's bridal car, and their great horses born of the waters are spoken of. May their honeyed gift be ours. This praise has been made by the Manas; come to our house for children and self, rejoicing in Agastya. Once more he says: we have crossed beyond this darkness.
अ॒स्मे ऊ॒ षु वृ॑षणा मादयेथा॒मुत्प॒णीँर्ह॑तमू॒र्म्या मद॑न्ता ।
श्रु॒तं मे॒ अच्छो॑क्तिभिर्मती॒नामेष्टा॑ नरा॒ निचे॑तारा च॒ कर्णै॑ः
asme ū ṣu vṛṣaṇā mādayethāmutpaṇīm̐rhatamūrmyā madantā |
śrutaṃ me acchoktibhirmatīnāmeṣṭā narā nicetārā ca karṇaiḥ
श्रि॒ये पू॑षन्निषु॒कृते॑व दे॒वा नास॑त्या वह॒तुं सू॒र्याया॑ः ।
व॒च्यन्ते॑ वां ककु॒हा अ॒प्सु जा॒ता यु॒गा जू॒र्णेव॒ वरु॑णस्य॒ भूरे॑ः
śriye pūṣanniṣukṛteva devā nāsatyā vahatuṃ sūryāyāḥ |
vacyante vāṃ kakuhā apsu jātā yugā jūrṇeva varuṇasya bhūreḥ
अ॒स्मे सा वां॑ माध्वी रा॒तिर॑स्तु॒ स्तोमं॑ हिनोतं मा॒न्यस्य॑ का॒रोः ।
अनु॒ यद्वां॑ श्रव॒स्या॑ सुदानू सु॒वीर्या॑य चर्ष॒णयो॒ मद॑न्ति
asme sā vāṃ mādhvī rātirastu stomaṃ hinotaṃ mānyasya kāroḥ |
anu yadvāṃ śravasyā sudānū suvīryāya carṣaṇayo madanti
ए॒ष वां॒ स्तोमो॑ अश्विनावकारि॒ माने॑भिर्मघवाना सुवृ॒क्ति ।
या॒तं व॒र्तिस्तन॑याय॒ त्मने॑ चा॒गस्त्ये॑ नासत्या॒ मद॑न्ता
eṣa vāṃ stomo aśvināvakāri mānebhirmaghavānā suvṛkti |
yātaṃ vartistanayāya tmane cāgastye nāsatyā madantā
अता॑रिष्म॒ तम॑सस्पा॒रम॒स्य प्रति॑ वां॒ स्तोमो॑ अश्विनावधायि ।
एह या॑तं प॒थिभि॑र्देव॒यानै॑र्वि॒द्यामे॒षं वृ॒जनं॑ जी॒रदा॑नुम्
atāriṣma tamasaspāramasya prati vāṃ stomo aśvināvadhāyi |
eha yātaṃ pathibhirdevayānairvidyāmeṣaṃ vṛjanaṃ jīradānum
Text source: Wikisource · CC BY-SA 4.0 (Wikisource transcription of a public-domain text)