Rishi: अगस्त्यो मैत्रावरुणिः · Devata: अश्विनौ · Metre: त्रिष्टुप्
6 verses · 183 of 191
Agastya Maitravaruni asks the Ashvins in trishtubh to yoke their chariot, faster than thought, three-seated and three-wheeled, which flies like a bird to the home of the good. The daughter of heaven, Dawn, attends them. Let no wolf or she-wolf harm them; here is their share, here the song, here the honey. Gotama, Purumilha and Atri have called them for help; so let them come to my call. The sukta closes: we have crossed beyond this darkness, the praise is offered, come by the paths the gods travel.
तं यु॑ञ्जाथां॒ मन॑सो॒ यो जवी॑यान्त्रिवन्धु॒रो वृ॑षणा॒ यस्त्रि॑च॒क्रः ।
येनो॑पया॒थः सु॒कृतो॑ दुरो॒णं त्रि॒धातु॑ना पतथो॒ विर्न प॒र्णैः
taṃ yuñjāthāṃ manaso yo javīyāntrivandhuro vṛṣaṇā yastricakraḥ |
yenopayāthaḥ sukṛto duroṇaṃ tridhātunā patatho virna parṇaiḥ
सु॒वृद्रथो॑ वर्तते॒ यन्न॒भि क्षां यत्तिष्ठ॑थ॒ः क्रतु॑म॒न्तानु॑ पृ॒क्षे ।
वपु॑र्वपु॒ष्या स॑चतामि॒यं गीर्दि॒वो दु॑हि॒त्रोषसा॑ सचेथे
suvṛdratho vartate yannabhi kṣāṃ yattiṣṭhathaḥ kratumantānu pṛkṣe |
vapurvapuṣyā sacatāmiyaṃ gīrdivo duhitroṣasā sacethe
आ ति॑ष्ठतं सु॒वृतं॒ यो रथो॑ वा॒मनु॑ व्र॒तानि॒ वर्त॑ते ह॒विष्मा॑न् ।
येन॑ नरा नासत्येष॒यध्यै॑ व॒र्तिर्या॒थस्तन॑याय॒ त्मने॑ च
ā tiṣṭhataṃ suvṛtaṃ yo ratho vāmanu vratāni vartate haviṣmān |
yena narā nāsatyeṣayadhyai vartiryāthastanayāya tmane ca
मा वां॒ वृको॒ मा वृ॒कीरा द॑धर्षी॒न्मा परि॑ वर्क्तमु॒त माति॑ धक्तम् ।
अ॒यं वां॑ भा॒गो निहि॑त इ॒यं गीर्दस्रा॑वि॒मे वां॑ नि॒धयो॒ मधू॑नाम्
mā vāṃ vṛko mā vṛkīrā dadharṣīnmā pari varktamuta māti dhaktam |
ayaṃ vāṃ bhāgo nihita iyaṃ gīrdasrāvime vāṃ nidhayo madhūnām
यु॒वां गोत॑मः पुरुमी॒ळ्हो अत्रि॒र्दस्रा॒ हव॒तेऽव॑से ह॒विष्मा॑न् ।
दिशं॒ न दि॒ष्टामृ॑जू॒येव॒ यन्ता मे॒ हवं॑ नास॒त्योप॑ यातम्
yuvāṃ gotamaḥ purumīḻho atrirdasrā havate'vase haviṣmān |
diśaṃ na diṣṭāmṛjūyeva yantā me havaṃ nāsatyopa yātam
अता॑रिष्म॒ तम॑सस्पा॒रम॒स्य प्रति॑ वां॒ स्तोमो॑ अश्विनावधायि ।
एह या॑तं प॒थिभि॑र्देव॒यानै॑र्वि॒द्यामे॒षं वृ॒जनं॑ जी॒रदा॑नुम्
atāriṣma tamasaspāramasya prati vāṃ stomo aśvināvadhāyi |
eha yātaṃ pathibhirdevayānairvidyāmeṣaṃ vṛjanaṃ jīradānum
Text source: Wikisource · CC BY-SA 4.0 (Wikisource transcription of a public-domain text)
