इन्द्रा॒वरु॑णयोर॒हं स॒म्राजो॒रव॒ आ वृ॑णे ।
ता नो॑ मृळात ई॒दृशे॑
indrāvaruṇayorahaṃ samrājorava ā vṛṇe |
tā no mṛḻāta īdṛśe
Mandala 1
Sukta 17: Indra and Varuna, the two sovereigns
Rishi: मेधातिथिः काण्वः · Devata: इन्द्रावरुणौ · Metre: गायत्री, ४-५ पादनिचृत्(५ ह्रसीयसी वा) गायत्री
9 verses · 17 of 191
What happens in this chapter
Indra and Varuna, the two sovereigns
I choose the help of Indra and Varuna, the two samrats; let them be kind to us in such a need. Medhatithi Kanva sings this short gayatri sukta to the pair as upholders of the peoples who come when a sage like him calls. Satisfy us with wealth as we wish, he asks. Indra is the giver of thousands, Varuna the one most worth praising. By their help may we win and store up riches, with plenty to spare. He calls them for wonderful bounty, asks them to make us victors, and begs for shelter while our thoughts strive to win.
गन्ता॑रा॒ हि स्थोऽव॑से॒ हवं॒ विप्र॑स्य॒ माव॑तः ।
ध॒र्तारा॑ चर्षणी॒नाम्
gantārā hi stho'vase havaṃ viprasya māvataḥ |
dhartārā carṣaṇīnām
अ॒नु॒का॒मं त॑र्पयेथा॒मिन्द्रा॑वरुण रा॒य आ ।
ता वां॒ नेदि॑ष्ठमीमहे
anukāmaṃ tarpayethāmindrāvaruṇa rāya ā |
tā vāṃ nediṣṭhamīmahe
यु॒वाकु॒ हि शची॑नां यु॒वाकु॑ सुमती॒नाम् ।
भू॒याम॑ वाज॒दाव्ना॑म्
yuvāku hi śacīnāṃ yuvāku sumatīnām |
bhūyāma vājadāvnām
इन्द्र॑ः सहस्र॒दाव्नां॒ वरु॑ण॒ः शंस्या॑नाम् ।
क्रतु॑र्भवत्यु॒क्थ्य॑ः
indraḥ sahasradāvnāṃ varuṇaḥ śaṃsyānām |
kraturbhavatyukthyaḥ
तयो॒रिदव॑सा व॒यं स॒नेम॒ नि च॑ धीमहि ।
स्यादु॒त प्र॒रेच॑नम्
tayoridavasā vayaṃ sanema ni ca dhīmahi |
syāduta prarecanam
इन्द्रा॑वरुण वाम॒हं हु॒वे चि॒त्राय॒ राध॑से ।
अ॒स्मान्सु जि॒ग्युष॑स्कृतम्
indrāvaruṇa vāmahaṃ huve citrāya rādhase |
asmānsu jigyuṣaskṛtam
इन्द्रा॑वरुण॒ नू नु वां॒ सिषा॑सन्तीषु धी॒ष्वा ।
अ॒स्मभ्यं॒ शर्म॑ यच्छतम्
indrāvaruṇa nū nu vāṃ siṣāsantīṣu dhīṣvā |
asmabhyaṃ śarma yacchatam
प्र वा॑मश्नोतु सुष्टु॒तिरिन्द्रा॑वरुण॒ यां हु॒वे ।
यामृ॒धाथे॑ स॒धस्तु॑तिम्
pra vāmaśnotu suṣṭutirindrāvaruṇa yāṃ huve |
yāmṛdhāthe sadhastutim
Text source: Wikisource · CC BY-SA 4.0 (Wikisource transcription of a public-domain text)