प्र व॒ः पान्त॒मन्ध॑सो धियाय॒ते म॒हे शूरा॑य॒ विष्ण॑वे चार्चत ।
या सानु॑नि॒ पर्व॑ताना॒मदा॑भ्या म॒हस्त॒स्थतु॒रर्व॑तेव सा॒धुना॑
pra vaḥ pāntamandhaso dhiyāyate mahe śūrāya viṣṇave cārcata |
yā sānuni parvatānāmadābhyā mahastasthaturarvateva sādhunā
Mandala 1
Sukta 155: Indra and Vishnu, the third step hidden
Rishi: दीर्घतमा औचथ्यः · Devata: विष्णुः, १-३ इन्द्राविष्णू · Metre: जगती
6 verses · 155 of 191
What happens in this chapter
Indra and Vishnu, the third step hidden
Dirghatamas sings in jagati, first to Indra and Vishnu together, then to Vishnu. Soma is offered to the two who stand unharmed on the mountain heights and who turn aside the arrow of the archer Krishanu. The son takes the father's lower and higher name, and a third in the light of heaven. Vishnu strode the earthly regions in three steps for wide living. A mortal can glimpse two of his strides; the third no one dares approach, not even the winged birds. He sets in motion his ninety-four names like a turning wheel, and comes to the call, vast in body, ever young.
त्वे॒षमि॒त्था स॒मर॑णं॒ शिमी॑वतो॒रिन्द्रा॑विष्णू सुत॒पा वा॑मुरुष्यति ।
या मर्त्या॑य प्रतिधी॒यमा॑न॒मित्कृ॒शानो॒रस्तु॑रस॒नामु॑रु॒ष्यथ॑ः
tveṣamitthā samaraṇaṃ śimīvatorindrāviṣṇū sutapā vāmuruṣyati |
yā martyāya pratidhīyamānamitkṛśānorasturasanāmuruṣyathaḥ
ता ईं॑ वर्धन्ति॒ मह्य॑स्य॒ पौंस्यं॒ नि मा॒तरा॑ नयति॒ रेत॑से भु॒जे ।
दधा॑ति पु॒त्रोऽव॑रं॒ परं॑ पि॒तुर्नाम॑ तृ॒तीय॒मधि॑ रोच॒ने दि॒वः
tā īṃ vardhanti mahyasya pauṃsyaṃ ni mātarā nayati retase bhuje |
dadhāti putro'varaṃ paraṃ piturnāma tṛtīyamadhi rocane divaḥ
तत्त॒दिद॑स्य॒ पौंस्यं॑ गृणीमसी॒नस्य॑ त्रा॒तुर॑वृ॒कस्य॑ मी॒ळ्हुष॑ः ।
यः पार्थि॑वानि त्रि॒भिरिद्विगा॑मभिरु॒रु क्रमि॑ष्टोरुगा॒याय॑ जी॒वसे॑
tattadidasya pauṃsyaṃ gṛṇīmasīnasya trāturavṛkasya mīḻhuṣaḥ |
yaḥ pārthivāni tribhiridvigāmabhiruru kramiṣṭorugāyāya jīvase
द्वे इद॑स्य॒ क्रम॑णे स्व॒र्दृशो॑ऽभि॒ख्याय॒ मर्त्यो॑ भुरण्यति ।
तृ॒तीय॑मस्य॒ नकि॒रा द॑धर्षति॒ वय॑श्च॒न प॒तय॑न्तः पत॒त्रिण॑ः
dve idasya kramaṇe svardṛśo'bhikhyāya martyo bhuraṇyati |
tṛtīyamasya nakirā dadharṣati vayaścana patayantaḥ patatriṇaḥ
च॒तुर्भि॑ः सा॒कं न॑व॒तिं च॒ नाम॑भिश्च॒क्रं न वृ॒त्तं व्यतीँ॑रवीविपत् ।
बृ॒हच्छ॑रीरो वि॒मिमा॑न॒ ऋक्व॑भि॒र्युवाकु॑मार॒ः प्रत्ये॑त्याह॒वम्
caturbhiḥ sākaṃ navatiṃ ca nāmabhiścakraṃ na vṛttaṃ vyatīm̐ravīvipat |
bṛhaccharīro vimimāna ṛkvabhiryuvākumāraḥ pratyetyāhavam
Text source: Wikisource · CC BY-SA 4.0 (Wikisource transcription of a public-domain text)