यजा॑महे वां म॒हः स॒जोषा॑ ह॒व्येभि॑र्मित्रावरुणा॒ नमो॑भिः ।
घृ॒तैर्घृ॑तस्नू॒ अध॒ यद्वा॑म॒स्मे अ॑ध्व॒र्यवो॒ न धी॒तिभि॒र्भर॑न्ति
yajāmahe vāṃ mahaḥ sajoṣā havyebhirmitrāvaruṇā namobhiḥ |
ghṛtairghṛtasnū adha yadvāmasme adhvaryavo na dhītibhirbharanti
Mandala 1
Sukta 153: Ghee and homage for Mitra-Varuna
Rishi: दीर्घतमा औचथ्यः · Devata: मित्रावरुणौ · Metre: त्रिष्टुप्
4 verses · 153 of 191
What happens in this chapter
Ghee and homage for Mitra-Varuna
A short trishtubh offering by Dirghatamas to Mitra and Varuna. The priests worship the great pair together with oblations, bows and streams of ghee, as adhvaryus serve with their hymns. The hotar anoints them in the assembly. Aditi, the cow, swells with milk for the man who brings offerings, and the waters and kine grow full. The rishi asks the ancient lord of the house to take delight, and the two gods to drink the milk of the ruddy cow.
प्रस्तु॑तिर्वां॒ धाम॒ न प्रयु॑क्ति॒रया॑मि मित्रावरुणा सुवृ॒क्तिः ।
अ॒नक्ति॒ यद्वां॑ वि॒दथे॑षु॒ होता॑ सु॒म्नं वां॑ सू॒रिर्वृ॑षणा॒विय॑क्षन्
prastutirvāṃ dhāma na prayuktirayāmi mitrāvaruṇā suvṛktiḥ |
anakti yadvāṃ vidatheṣu hotā sumnaṃ vāṃ sūrirvṛṣaṇāviyakṣan
पी॒पाय॑ धे॒नुरदि॑तिरृ॒ताय॒ जना॑य मित्रावरुणा हवि॒र्दे ।
हि॒नोति॒ यद्वां॑ वि॒दथे॑ सप॒र्यन्स रा॒तह॑व्यो॒ मानु॑षो॒ न होता॑
pīpāya dhenuraditirṛtāya janāya mitrāvaruṇā havirde |
hinoti yadvāṃ vidathe saparyansa rātahavyo mānuṣo na hotā
उ॒त वां॑ वि॒क्षु मद्या॒स्वन्धो॒ गाव॒ आप॑श्च पीपयन्त दे॒वीः ।
उ॒तो नो॑ अ॒स्य पू॒र्व्यः पति॒र्दन्वी॒तं पा॒तं पय॑स उ॒स्रिया॑याः
uta vāṃ vikṣu madyāsvandho gāva āpaśca pīpayanta devīḥ |
uto no asya pūrvyaḥ patirdanvītaṃ pātaṃ payasa usriyāyāḥ
Text source: Wikisource · CC BY-SA 4.0 (Wikisource transcription of a public-domain text)