Rishi: दीर्घतमा औचथ्यः · Devata: अग्निः · Metre: त्रिष्टुप्
5 verses · 148 of 191
Matarishvan, entering, churned out the hotar of every form, belonging to all the gods, and men set him among their clans, shining like the sun. Dirghatamas's trishtubh verses ask that no one harm the giver's prayer; Agni is his shelter. The worshipful hold him fast in his lasting seat and lead him forward like racing chariot horses. With his teeth he cuts down much, then shines in the forest; the wind blows after his flame like an archer's arrow. Neither enemies nor those who would injure can harm him even in the womb; the blind and sightless could not hurt him, for his faithful lovers guarded him.
मथी॒द्यदीं॑ वि॒ष्टो मा॑त॒रिश्वा॒ होता॑रं वि॒श्वाप्सुं॑ वि॒श्वदे॑व्यम् ।
नि यं द॒धुर्म॑नु॒ष्या॑सु वि॒क्षु स्व१॒॑र्ण चि॒त्रं वपु॑षे वि॒भाव॑म्
mathīdyadīṃ viṣṭo mātariśvā hotāraṃ viśvāpsuṃ viśvadevyam |
ni yaṃ dadhurmanuṣyāsu vikṣu svarṇa citraṃ vapuṣe vibhāvam
द॒दा॒नमिन्न द॑दभन्त॒ मन्मा॒ग्निर्वरू॑थं॒ मम॒ तस्य॑ चाकन् ।
जु॒षन्त॒ विश्वा॑न्यस्य॒ कर्मोप॑स्तुतिं॒ भर॑माणस्य का॒रोः
dadānaminna dadabhanta manmāgnirvarūthaṃ mama tasya cākan |
juṣanta viśvānyasya karmopastutiṃ bharamāṇasya kāroḥ
नित्ये॑ चि॒न्नु यं सद॑ने जगृ॒भ्रे प्रश॑स्तिभिर्दधि॒रे य॒ज्ञिया॑सः ।
प्र सू न॑यन्त गृ॒भय॑न्त इ॒ष्टावश्वा॑सो॒ न र॒थ्यो॑ रारहा॒णाः
nitye cinnu yaṃ sadane jagṛbhre praśastibhirdadhire yajñiyāsaḥ |
pra sū nayanta gṛbhayanta iṣṭāvaśvāso na rathyo rārahāṇāḥ
पु॒रूणि॑ द॒स्मो नि रि॑णाति॒ जम्भै॒राद्रो॑चते॒ वन॒ आ वि॒भावा॑ ।
आद॑स्य॒ वातो॒ अनु॑ वाति शो॒चिरस्तु॒र्न शर्या॑मस॒नामनु॒ द्यून्
purūṇi dasmo ni riṇāti jambhairādrocate vana ā vibhāvā |
ādasya vāto anu vāti śocirasturna śaryāmasanāmanu dyūn
न यं रि॒पवो॒ न रि॑ष॒ण्यवो॒ गर्भे॒ सन्तं॑ रेष॒णा रे॒षय॑न्ति ।
अ॒न्धा अ॑प॒श्या न द॑भन्नभि॒ख्या नित्या॑स ईं प्रे॒तारो॑ अरक्षन्
na yaṃ ripavo na riṣaṇyavo garbhe santaṃ reṣaṇā reṣayanti |
andhā apaśyā na dabhannabhikhyā nityāsa īṃ pretāro arakṣan
Text source: Wikisource · CC BY-SA 4.0 (Wikisource transcription of a public-domain text)
