Mandala 1

Sukta 147: Agni's guardians protected blind Mamateya

Rishi: दीर्घतमा औचथ्यः · Devata: अग्निः · Metre: त्रिष्टुप्

5 verses · 147 of 191

What happens in this chapter

Agni's guardians protected blind Mamateya

How have your bright flames served the man who gives, Agni? Dirghatamas asks in trishtubh, and asks Agni to wake to his words. One reviles you, another praises; I, your worshipper, bow to your body. Your guardians who saw the blind son of Mamata protected him from harm; the all-knowing one guarded the doers of good, and those who wished to deceive could not. Here Dirghatamas speaks of himself. Whoever harms us with double speech, let his own spell fall back on him. Guard the singer, Agni, and give us to no misfortune.

147.1

क॒था ते॑ अग्ने शु॒चय॑न्त आ॒योर्द॑दा॒शुर्वाजे॑भिराशुषा॒णाः ।
उ॒भे यत्तो॒के तन॑ये॒ दधा॑ना ऋ॒तस्य॒ साम॑न्र॒णय॑न्त दे॒वाः

kathā te agne śucayanta āyordadāśurvājebhirāśuṣāṇāḥ |
ubhe yattoke tanaye dadhānā ṛtasya sāmanraṇayanta devāḥ

147.2

बोधा॑ मे अ॒स्य वच॑सो यविष्ठ॒ मंहि॑ष्ठस्य॒ प्रभृ॑तस्य स्वधावः ।
पीय॑ति त्वो॒ अनु॑ त्वो गृणाति व॒न्दारु॑स्ते त॒न्वं॑ वन्दे अग्ने

bodhā me asya vacaso yaviṣṭha maṃhiṣṭhasya prabhṛtasya svadhāvaḥ |
pīyati tvo anu tvo gṛṇāti vandāruste tanvaṃ vande agne

147.3

ये पा॒यवो॑ मामते॒यं ते॑ अग्ने॒ पश्य॑न्तो अ॒न्धं दु॑रि॒तादर॑क्षन् ।
र॒रक्ष॒ तान्सु॒कृतो॑ वि॒श्ववे॑दा॒ दिप्स॑न्त॒ इद्रि॒पवो॒ नाह॑ देभुः

ye pāyavo māmateyaṃ te agne paśyanto andhaṃ duritādarakṣan |
rarakṣa tānsukṛto viśvavedā dipsanta idripavo nāha debhuḥ

147.4

यो नो॑ अग्ने॒ अर॑रिवाँ अघा॒युर॑राती॒वा म॒र्चय॑ति द्व॒येन॑ ।
मन्त्रो॑ गु॒रुः पुन॑रस्तु॒ सो अ॑स्मा॒ अनु॑ मृक्षीष्ट त॒न्वं॑ दुरु॒क्तैः

yo no agne ararivām̐ aghāyurarātīvā marcayati dvayena |
mantro guruḥ punarastu so asmā anu mṛkṣīṣṭa tanvaṃ duruktaiḥ

147.5

उ॒त वा॒ यः स॑हस्य प्रवि॒द्वान्मर्तो॒ मर्तं॑ म॒र्चय॑ति द्व॒येन॑ ।
अत॑ः पाहि स्तवमान स्तु॒वन्त॒मग्ने॒ माकि॑र्नो दुरि॒ताय॑ धायीः

uta vā yaḥ sahasya pravidvānmarto martaṃ marcayati dvayena |
ataḥ pāhi stavamāna stuvantamagne mākirno duritāya dhāyīḥ

Text source: Wikisource · CC BY-SA 4.0 (Wikisource transcription of a public-domain text)