Rishi: दीर्घतमा औचथ्यः · Devata: अग्निः · Metre: जगती, ५ त्रिष्टुप्
5 verses · 145 of 191
Ask him: he has come, he knows. Dirghatamas's short jagati sukta, with one trishtubh verse, praises Agni as the one in whom commands and offerings rest, lord of strength and power. The wise grasp him with their own minds; he bears neither the first word nor the last without consent. The ladles and the swift mares go to him; he alone hears all words, the child who takes hold of the sacrifice. Like a beast of the waters and forest he is set on the topmost layer. Knowing rita, the true one, he declares the right ways to mortals.
तं पृ॑च्छता॒ स ज॑गामा॒ स वे॑द॒ स चि॑कि॒त्वाँ ई॑यते॒ सा न्वी॑यते ।
तस्मि॑न्सन्ति प्र॒शिष॒स्तस्मि॑न्नि॒ष्टय॒ः स वाज॑स्य॒ शव॑सः शु॒ष्मिण॒स्पति॑ः
taṃ pṛcchatā sa jagāmā sa veda sa cikitvām̐ īyate sā nvīyate |
tasminsanti praśiṣastasminniṣṭayaḥ sa vājasya śavasaḥ śuṣmiṇaspatiḥ
तमित्पृ॑च्छन्ति॒ न सि॒मो वि पृ॑च्छति॒ स्वेने॑व॒ धीरो॒ मन॑सा॒ यदग्र॑भीत् ।
न मृ॑ष्यते प्रथ॒मं नाप॑रं॒ वचो॒ऽस्य क्रत्वा॑ सचते॒ अप्र॑दृपितः
tamitpṛcchanti na simo vi pṛcchati sveneva dhīro manasā yadagrabhīt |
na mṛṣyate prathamaṃ nāparaṃ vaco'sya kratvā sacate apradṛpitaḥ
तमिद्ग॑च्छन्ति जु॒ह्व१॒॑स्तमर्व॑ती॒र्विश्वा॒न्येक॑ः शृणव॒द्वचां॑सि मे ।
पु॒रु॒प्रै॒षस्ततु॑रिर्यज्ञ॒साध॒नोऽच्छि॑द्रोति॒ः शिशु॒राद॑त्त॒ सं रभ॑ः
tamidgacchanti juhvastamarvatīrviśvānyekaḥ śṛṇavadvacāṃsi me |
purupraiṣastaturiryajñasādhano'cchidrotiḥ śiśurādatta saṃ rabhaḥ
उ॒प॒स्थायं॑ चरति॒ यत्स॒मार॑त स॒द्यो जा॒तस्त॑त्सार॒ युज्ये॑भिः ।
अ॒भि श्वा॒न्तं मृ॑शते ना॒न्द्ये॑ मु॒दे यदीं॒ गच्छ॑न्त्युश॒तीर॑पिष्ठि॒तम्
upasthāyaṃ carati yatsamārata sadyo jātastatsāra yujyebhiḥ |
abhi śvāntaṃ mṛśate nāndye mude yadīṃ gacchantyuśatīrapiṣṭhitam
स ईं॑ मृ॒गो अप्यो॑ वन॒र्गुरुप॑ त्व॒च्यु॑प॒मस्यां॒ नि धा॑यि ।
व्य॑ब्रवीद्व॒युना॒ मर्त्ये॑भ्यो॒ऽग्निर्वि॒द्वाँ ऋ॑त॒चिद्धि स॒त्यः
sa īṃ mṛgo apyo vanargurupa tvacyupamasyāṃ ni dhāyi |
vyabravīdvayunā martyebhyo'gnirvidvām̐ ṛtaciddhi satyaḥ
Text source: Wikisource · CC BY-SA 4.0 (Wikisource transcription of a public-domain text)
