अ॒ग्निं दू॒तं वृ॑णीमहे॒ होता॑रं वि॒श्ववे॑दसम् ।
अ॒स्य य॒ज्ञस्य॑ सु॒क्रतु॑म्
agniṃ dūtaṃ vṛṇīmahe hotāraṃ viśvavedasam |
asya yajñasya sukratum
Mandala 1
Sukta 12: Agni chosen as messenger and hotar
Rishi: मेधातिथिः काण्वः · Devata: अग्निः, ६ प्रथमपादस्य (निर्मथ्याहवनीयौ) अग्नी · Metre: गायत्री
12 verses · 12 of 191
What happens in this chapter
Agni chosen as messenger and hotar
We choose Agni as messenger, the all-knowing hotar, skilled in this yajna. With these gayatri verses Medhatithi Kanva begins his group of suktas. Agni is called again and again as lord of the clans, carrier of offerings, dear to many. Born, he brings the gods to the one who spreads the grass; as messenger he wakes them. Shining one, fed with ghee, burn against the harmful and the rakshasas. In verse 6 Agni is kindled by Agni, the fire churned from the wood lighting the offering fire, young lord of the house with the ladle for his mouth. He drives away sickness and favours the one who serves him.
अ॒ग्निम॑ग्निं॒ हवी॑मभि॒ः सदा॑ हवन्त वि॒श्पति॑म् ।
ह॒व्य॒वाहं॑ पुरुप्रि॒यम्
agnimagniṃ havīmabhiḥ sadā havanta viśpatim |
havyavāhaṃ purupriyam
अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे ।
असि॒ होता॑ न॒ ईड्य॑ः
agne devām̐ ihā vaha jajñāno vṛktabarhiṣe |
asi hotā na īḍyaḥ
ताँ उ॑श॒तो वि बो॑धय॒ यद॑ग्ने॒ यासि॑ दू॒त्य॑म् ।
दे॒वैरा स॑त्सि ब॒र्हिषि॑
tām̐ uśato vi bodhaya yadagne yāsi dūtyam |
devairā satsi barhiṣi
घृता॑हवन दीदिव॒ः प्रति॑ ष्म॒ रिष॑तो दह ।
अग्ने॒ त्वं र॑क्ष॒स्विन॑ः
ghṛtāhavana dīdivaḥ prati ṣma riṣato daha |
agne tvaṃ rakṣasvinaḥ
अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ ।
ह॒व्य॒वाड्जु॒ह्वा॑स्यः
agnināgniḥ samidhyate kavirgṛhapatiryuvā |
havyavāḍjuhvāsyaḥ
क॒विम॒ग्निमुप॑ स्तुहि स॒त्यध॑र्माणमध्व॒रे ।
दे॒वम॑मीव॒चात॑नम्
kavimagnimupa stuhi satyadharmāṇamadhvare |
devamamīvacātanam
यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ ।
तस्य॑ स्म प्रावि॒ता भ॑व
yastvāmagne haviṣpatirdūtaṃ deva saparyati |
tasya sma prāvitā bhava
यो अ॒ग्निं दे॒ववी॑तये ह॒विष्माँ॑ आ॒विवा॑सति ।
तस्मै॑ पावक मृळय
yo agniṃ devavītaye haviṣmām̐ āvivāsati |
tasmai pāvaka mṛḻaya
स न॑ः पावक दीदि॒वोऽग्ने॑ दे॒वाँ इ॒हा व॑ह ।
उप॑ य॒ज्ञं ह॒विश्च॑ नः
sa naḥ pāvaka dīdivo'gne devām̐ ihā vaha |
upa yajñaṃ haviśca naḥ
स न॒ः स्तवा॑न॒ आ भ॑र गाय॒त्रेण॒ नवी॑यसा ।
र॒यिं वी॒रव॑ती॒मिष॑म्
sa naḥ stavāna ā bhara gāyatreṇa navīyasā |
rayiṃ vīravatīmiṣam
अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः ।
इ॒मं स्तोमं॑ जुषस्व नः
agne śukreṇa śociṣā viśvābhirdevahūtibhiḥ |
imaṃ stomaṃ juṣasva naḥ
Text source: Wikisource · CC BY-SA 4.0 (Wikisource transcription of a public-domain text)