Rishi: कुत्स आङ्गिरसः · Devata: विश्वे देवाः · Metre: जगती, ७ त्रिष्टुप्
7 verses · 106 of 191
We call Indra, Mitra, Varuna, Agni, the Marut host and Aditi for help. Kutsa Angirasa sings this to the Vishvedevas in jagati, and six verses end with one image: good Vasus, bring us out of every distress as a chariot is hauled from rough ground. The Adityas, the fathers, the two goddesses Heaven and Earth, Narashamsa, Pushan and Brihaspati are each asked to make the way easy. In verse 6 Kutsa remembers himself, sunk in a pit, calling Indra the slayer of Vritra. Aditi and the unsleeping god are asked to guard us.
इन्द्रं॑ मि॒त्रं वरु॑णम॒ग्निमू॒तये॒ मारु॑तं॒ शर्धो॒ अदि॑तिं हवामहे ।
रथं॒ न दु॒र्गाद्व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन
indraṃ mitraṃ varuṇamagnimūtaye mārutaṃ śardho aditiṃ havāmahe |
rathaṃ na durgādvasavaḥ sudānavo viśvasmānno aṃhaso niṣpipartana
त आ॑दित्या॒ आ ग॑ता स॒र्वता॑तये भू॒त दे॑वा वृत्र॒तूर्ये॑षु श॒म्भुव॑ः ।
रथं॒ न दु॒र्गाद्व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन
ta ādityā ā gatā sarvatātaye bhūta devā vṛtratūryeṣu śambhuvaḥ |
rathaṃ na durgādvasavaḥ sudānavo viśvasmānno aṃhaso niṣpipartana
अव॑न्तु नः पि॒तर॑ः सुप्रवाच॒ना उ॒त दे॒वी दे॒वपु॑त्रे ऋता॒वृधा॑ ।
रथं॒ न दु॒र्गाद्व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन
avantu naḥ pitaraḥ supravācanā uta devī devaputre ṛtāvṛdhā |
rathaṃ na durgādvasavaḥ sudānavo viśvasmānno aṃhaso niṣpipartana
नरा॒शंसं॑ वा॒जिनं॑ वा॒जय॑न्नि॒ह क्ष॒यद्वी॑रं पू॒षणं॑ सु॒म्नैरी॑महे ।
रथं॒ न दु॒र्गाद्व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन
narāśaṃsaṃ vājinaṃ vājayanniha kṣayadvīraṃ pūṣaṇaṃ sumnairīmahe |
rathaṃ na durgādvasavaḥ sudānavo viśvasmānno aṃhaso niṣpipartana
बृह॑स्पते॒ सद॒मिन्न॑ः सु॒गं कृ॑धि॒ शं योर्यत्ते॒ मनु॑र्हितं॒ तदी॑महे ।
रथं॒ न दु॒र्गाद्व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन
bṛhaspate sadaminnaḥ sugaṃ kṛdhi śaṃ yoryatte manurhitaṃ tadīmahe |
rathaṃ na durgādvasavaḥ sudānavo viśvasmānno aṃhaso niṣpipartana
इन्द्रं॒ कुत्सो॑ वृत्र॒हणं॒ शची॒पतिं॑ का॒टे निबा॑ळ्ह॒ ऋषि॑रह्वदू॒तये॑ ।
रथं॒ न दु॒र्गाद्व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन
indraṃ kutso vṛtrahaṇaṃ śacīpatiṃ kāṭe nibāḻha ṛṣirahvadūtaye |
rathaṃ na durgādvasavaḥ sudānavo viśvasmānno aṃhaso niṣpipartana
दे॒वैर्नो॑ दे॒व्यदि॑ति॒र्नि पा॑तु दे॒वस्त्रा॒ता त्रा॑यता॒मप्र॑युच्छन् ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः
devairno devyaditirni pātu devastrātā trāyatāmaprayucchan |
tanno mitro varuṇo māmahantāmaditiḥ sindhuḥ pṛthivī uta dyauḥ
Text source: Wikisource · CC BY-SA 4.0 (Wikisource transcription of a public-domain text)
