एहि महँ रघुपति नाम उदारा । अति पावन पुरान-स्रुति-सारा ॥
मङ्गल-भवन अमङ्गल-हारी । उमा सहित जेहि जपत पुरारी ॥
ehi maham̐ raghupati nāma udārā | ati pāvana purāna-sruti-sārā ||
maṅgala-bhavana amaṅgala-hārī | umā sahita jehi japata purārī ||
Bala Kanda
Chapter 10: Rama's name graces humble verse
8 verses · 10 of 361
What happens in this chapter
Rama's name graces humble verse
The one virtue is named: the generous name of Raghupati, the core of Purana and Shruti, which Shiva repeats with Uma. Fine poetry without Rama's name does not shine, as a lovely woman does not look graceful without clothing. Plain verse marked with that name is heard with respect by the wise, who take the good like bees. The poem has no rasa, but Rama's glory is in it, and good company raises everyone. Smoke loses its bitterness beside aloe wood. A chhand compares the poem to a crooked stream made holy by the Ganga, and to cremation ash made sacred on Shiva's body. The dohas add that sandal is honoured for Malaya, and a dark cow's milk is still white and nourishing.
भनिति बिचित्र सुकबि कृत जोऊ । राम नाम बिनु सोह न सोऊ ॥
बिधुबदनी सब भाँति सँवारी । सोह न बसन बिना बर नारी ॥
bhaniti bicitra sukabi kṛta joū | rāma nāma binu soha na soū ||
bidhubadanī saba bhām̐ti sam̐vārī | soha na basana binā bara nārī ||
सब गुन रहित कुकबि कृत बानी । राम नाम जस अङ्कित जानी ॥
सादर कहहिँ सुनहिँ बुध ताही । मधुकर सरिस सन्त गुन-ग्राही ॥
saba guna rahita kukabi kṛta bānī | rāma nāma jasa aṅkita jānī ||
sādara kahahim̐ sunahim̐ budha tāhī | madhukara sarisa santa guna-grāhī ||
जदपि कबित रस एकउ नाहीं । राम-प्रताप प्रगट एहि माहीं ॥
सोइ भरोस मोरें मन आवा । केहिं न सुसङ्ग बड़प्पन पावा ॥
jadapi kabita rasa ekau nāhīṃ | rāma-pratāpa pragaṭa ehi māhīṃ ||
soi bharosa moreṃ mana āvā | kehiṃ na susaṅga bar̤appana pāvā ||
धूमउ तजइ सहज करुआई । अगर प्रसङ्ग सुगन्ध बसाई ॥
भनिति भदेस बस्तु भलि बरनी । राम-कथा जग-मङ्गल-करनी ॥
dhūmau tajai sahaja karuāī | agara prasaṅga sugandha basāī ||
bhaniti bhadesa bastu bhali baranī | rāma-kathā jaga-maṅgala-karanī ||
मङ्गल-करनि कलि मल हरनि तुलसी कथा रघुनाथ की ।
गति कूर कबिता-सरित की ज्योँ सरित-पावन-पाथ की ॥
प्रभु सुजस सङ्गति भनिति भलि होइहि सुजन मन-भावनी ।
भव-अङ्ग भूति मसान की सुमिरत सुहावनि पावनी ॥
maṅgala-karani kali mala harani tulasī kathā raghunātha kī |
gati kūra kabitā-sarita kī jyom̐ sarita-pāvana-pātha kī ||
prabhu sujasa saṅgati bhaniti bhali hoihi sujana mana-bhāvanī |
bhava-aṅga bhūti masāna kī sumirata suhāvani pāvanī ||
प्रिय लागिहि अति सबहि मम, भनिति राम-जस-सङ्ग ।
दारु बिचार कि करइ कोउ, बंदिअ मलय प्रसङ्ग ॥
priya lāgihi ati sabahi mama, bhaniti rāma-jasa-saṅga |
dāru bicāra ki karai kou, baṃdia malaya prasaṅga ||
स्याम-सुरभि-पय बिसद अति, गुनद-करहिं सब पान ।
गिरा ग्राम्य सिय-राम-जस, गावहिँ सुनहिँ सुजान ॥
syāma-surabhi-paya bisada ati, gunada-karahiṃ saba pāna |
girā grāmya siya-rāma-jasa, gāvahim̐ sunahim̐ sujāna ||
Text source: Wikisource · Public domain (Tulsidas, 16th c.; 1925 edition, Wikisource PD-1996 tag); transcription CC BY-SA 4.0