Chapter 86: Dhritarashtra plans lavish gifts for Krishna

उपप्लाव्यादिह क्षत्तरुपायातो जनार्दनः ।
वृकस्थले निवसति स च प्रातरिहैष्यति

upaplāvyādiha kṣattarupāyāto janārdanaḥ |
vṛkasthale nivasati sa ca prātarihaiṣyati

आहुकानामधिपतिः पुरोगः सर्वसात्वताम् ।
महामना महावीर्यो महासत्वो जनार्दनः

āhukānāmadhipatiḥ purogaḥ sarvasātvatām |
mahāmanā mahāvīryo mahāsatvo janārdanaḥ

स्फीतस्य वृष्णिराष्ट्रस्य भर्ता गोप्ता च माधवः ।
त्रयाणामपि लोकानां भगवान्प्रपितामहः

sphītasya vṛṣṇirāṣṭrasya bhartā goptā ca mādhavaḥ |
trayāṇāmapi lokānāṃ bhagavānprapitāmahaḥ

वृष्ण्यन्धकाः सुमनसो यस्य प्रज्ञामुपासते ।
आदित्या वसवो रुद्रा यथा बुद्धिं बृहस्पतेः

vṛṣṇyandhakāḥ sumanaso yasya prajñāmupāsate |
ādityā vasavo rudrā yathā buddhiṃ bṛhaspateḥ

तस्मै पूजां प्रयोक्ष्यामि दाशार्हाय महात्मने ।
प्रत्यक्षं तव धर्मज्ञ तां मे कथयतः श्रुणु

tasmai pūjāṃ prayokṣyāmi dāśārhāya mahātmane |
pratyakṣaṃ tava dharmajña tāṃ me kathayataḥ śruṇu

एकवर्णैः सुक्लृप्ताङ्गैर्बाह्लिजातैर्हयोत्तमैः ।
चतुर्यक्तान्रथांस्तस्मै रौक्मान्दास्यामि षोडश

ekavarṇaiḥ suklṛptāṅgairbāhlijātairhayottamaiḥ |
caturyaktānrathāṃstasmai raukmāndāsyāmi ṣoḍaśa

नित्यप्रभिन्नान्मातङ्गानीषादन्तान्प्रहारिणः ।
अष्टानुचरमेकैकमष्टौ दास्यामि कौरव

nityaprabhinnānmātaṅgānīṣādantānprahāriṇaḥ |
aṣṭānucaramekaikamaṣṭau dāsyāmi kaurava

दासीनामप्रजातानां शुभानां रुक्मवर्चसाम् ।
शतमस्मै प्रदास्यामि दासानामपि तावताम्

dāsīnāmaprajātānāṃ śubhānāṃ rukmavarcasām |
śatamasmai pradāsyāmi dāsānāmapi tāvatām

आविकं च सुखस्पर्शं पार्वतीयैरुपाहृतम् ।
तदप्यस्मै प्रदास्यामि सहस्त्राणि दाशाष्ट च

āvikaṃ ca sukhasparśaṃ pārvatīyairupāhṛtam |
tadapyasmai pradāsyāmi sahastrāṇi dāśāṣṭa ca

अजिनानां सहस्राणि चीनदेशोद्भवानि च ।
तान्यप्यस्मै प्रदास्यामि यावदर्हति केशवः

ajinānāṃ sahasrāṇi cīnadeśodbhavāni ca |
tānyapyasmai pradāsyāmi yāvadarhati keśavaḥ

दिवा रात्रौ च भात्येष सुतेजा विमलो मणिः ।
तमप्यस्मै प्रदास्यामि तमर्हति हि केशवः

divā rātrau ca bhātyeṣa sutejā vimalo maṇiḥ |
tamapyasmai pradāsyāmi tamarhati hi keśavaḥ

एकेनाभिपतत्यह्ना योजनानि चतुर्दश ।
यानमश्वतरीयुक्तं दास्ये तस्मै तदप्यहम्

ekenābhipatatyahnā yojanāni caturdaśa |
yānamaśvatarīyuktaṃ dāsye tasmai tadapyaham

यावन्ति वाहनान्यस्य यावन्तः पुरुषाश्च ते ।
ततोष्टगुणमप्यस्मै भोज्यं दास्याम्यहं सदा

yāvanti vāhanānyasya yāvantaḥ puruṣāśca te |
tatoṣṭaguṇamapyasmai bhojyaṃ dāsyāmyahaṃ sadā

मम पुत्राश्च पौत्रश्च सर्वे दुर्योधनादृते ।
प्रत्युद्यास्यन्ति दाशार्हं रथैर्मृष्टैः स्वलङ्कृताः

mama putrāśca pautraśca sarve duryodhanādṛte |
pratyudyāsyanti dāśārhaṃ rathairmṛṣṭaiḥ svalaṅkṛtāḥ

स्वलङ्कृताश्च कल्याण्यः पादैरेव सहस्रशः ।
वारमुख्या महाभागं प्रत्युद्यास्यन्ति केशवम्

svalaṅkṛtāśca kalyāṇyaḥ pādaireva sahasraśaḥ |
vāramukhyā mahābhāgaṃ pratyudyāsyanti keśavam

नगरादपि याः काश्चिद्गमिष्यन्ति जनार्दनम् ।
द्रष्टुं कन्याश्च कल्याण्यस्ताश्च यास्यन्त्यनावृताः

nagarādapi yāḥ kāścidgamiṣyanti janārdanam |
draṣṭuṃ kanyāśca kalyāṇyastāśca yāsyantyanāvṛtāḥ

सस्त्रीपुरुषबालं च नगरं मधुसूदनम् ।
उदीक्षतां महात्मानं भानुमन्तमिव प्रजाः

sastrīpuruṣabālaṃ ca nagaraṃ madhusūdanam |
udīkṣatāṃ mahātmānaṃ bhānumantamiva prajāḥ

महाध्वजपताकाश्च क्रियन्तां सर्वतो दिशः ।
जलावसिक्तो विरजाः पन्थास्तस्येति चान्वशात्

mahādhvajapatākāśca kriyantāṃ sarvato diśaḥ |
jalāvasikto virajāḥ panthāstasyeti cānvaśāt

दुःशासनस्य च गृहं दुर्योधनगृहाद्वरम् ।
तदद्य क्रियतां क्षिप्रं सुसंमृष्टमलङ्कृतम्

duḥśāsanasya ca gṛhaṃ duryodhanagṛhādvaram |
tadadya kriyatāṃ kṣipraṃ susaṃmṛṣṭamalaṅkṛtam

एतद्धि रुचिराकारैः प्रासादैरुपशोभितम् ।
शिवं च रमणीयं च सर्वर्तु सुमहाधनम्

etaddhi rucirākāraiḥ prāsādairupaśobhitam |
śivaṃ ca ramaṇīyaṃ ca sarvartu sumahādhanam

सर्वमस्मिन्गृहे रत्नं मम दुर्योधनस्य च ।
यद्यदर्हति वार्ष्णेयस्तत्तद्देयमसंशयम्

sarvamasmingṛhe ratnaṃ mama duryodhanasya ca |
yadyadarhati vārṣṇeyastattaddeyamasaṃśayam