Chapter 25: The royal procession reaches Kurukshetra

आज्ञापयामास ततः सेनां भरतसत्तमः ।
अर्जुनप्रमुखैर्गुप्तां लोकपालोपमैर्नरैः

ājñāpayāmāsa tataḥ senāṃ bharatasattamaḥ |
arjunapramukhairguptāṃ lokapālopamairnaraiḥ

योगोयोग इति प्रीत्या ततः शब्दो महानभूत् ।
क्रोशतां सादिनां तत्र युज्यतां युज्यतामिति

yogoyoga iti prītyā tataḥ śabdo mahānabhūt |
krośatāṃ sādināṃ tatra yujyatāṃ yujyatāmiti

केचिद्यानैर्नरा जग्मुः केचिदश्वैर्महाजवैः ।
काञ्चनैश्च रथैः केचिज्ज्वलितज्वलनोपमैः

kecidyānairnarā jagmuḥ kecidaśvairmahājavaiḥ |
kāñcanaiśca rathaiḥ kecijjvalitajvalanopamaiḥ

गजेन्द्रैश्च तथैवान्ये केचिदुष्ट्रैर्नराधिप ।
पदातयस्तथैवान्ये नखरप्रासयोधिनः

gajendraiśca tathaivānye keciduṣṭrairnarādhipa |
padātayastathaivānye nakharaprāsayodhinaḥ

पौरजानपदाश्चैव यानैर्बहुविधैस्तथा ।
अन्वयुः कुरुराजानं धृतराष्ट्रं दिदक्षवः

paurajānapadāścaiva yānairbahuvidhaistathā |
anvayuḥ kururājānaṃ dhṛtarāṣṭraṃ didakṣavaḥ

स चापि राजवचनादाचार्यो गौतमः कृपः ।
सेनामादाय सेनानीः प्रययावाश्रमं प्रति

sa cāpi rājavacanādācāryo gautamaḥ kṛpaḥ |
senāmādāya senānīḥ prayayāvāśramaṃ prati

ततो द्विजैः परिवृतः कुरुराजो युधिष्ठिरः ।
संस्तूयमानो बहुभिः सूतमागधबन्दिभिः

tato dvijaiḥ parivṛtaḥ kururājo yudhiṣṭhiraḥ |
saṃstūyamāno bahubhiḥ sūtamāgadhabandibhiḥ

पाण्डुरेणातपत्रेण ध्रियमाणेन मूर्धनि ।
रतानीकेन महता निर्जगाम कुरूद्वहः

pāṇḍureṇātapatreṇa dhriyamāṇena mūrdhani |
ratānīkena mahatā nirjagāma kurūdvahaḥ

गजैश्चाचलसंकाशैर्भीमकर्मा वृकोदरः ।
सज्जयन्त्रायुधोपेतैः प्रययौ पवनात्मजः

gajaiścācalasaṃkāśairbhīmakarmā vṛkodaraḥ |
sajjayantrāyudhopetaiḥ prayayau pavanātmajaḥ

माद्रीपुत्रावपि तथा हयारोहौ सुसंवृतौ ।
जग्मतुः शीघ्रगमनौ सन्नद्धकवचध्वजौ

mādrīputrāvapi tathā hayārohau susaṃvṛtau |
jagmatuḥ śīghragamanau sannaddhakavacadhvajau

अर्जुनश्च महातेजा रथेनादित्यवर्चसा ।
वशी श्वेतैर्हयैर्युक्तैर्दिव्येनान्वगमन्नृपम्

arjunaśca mahātejā rathenādityavarcasā |
vaśī śvetairhayairyuktairdivyenānvagamannṛpam

द्रौपदीप्रमुखाश्चापि स्त्रीसङ्घाः शिबिकागताः ।
स्त्र्यध्यक्षगुप्ताः प्रययुर्विसृजन्तोऽमितं वसु

draupadīpramukhāścāpi strīsaṅghāḥ śibikāgatāḥ |
stryadhyakṣaguptāḥ prayayurvisṛjanto'mitaṃ vasu

समृद्धरथहस्त्यश्वं वेणुवीणानुनादितम् ।
शुशुभे पाण्डवं सैन्यं तत्तदा भरतर्षभ

samṛddharathahastyaśvaṃ veṇuvīṇānunāditam |
śuśubhe pāṇḍavaṃ sainyaṃ tattadā bharatarṣabha

नदीतीरेषु रम्येषु सरःसु च विशाम्पते ।
वासान्कृत्वा क्रमेणाथ जग्मुस्ते कुरुपुङ्गवाः

nadītīreṣu ramyeṣu saraḥsu ca viśāmpate |
vāsānkṛtvā krameṇātha jagmuste kurupuṅgavāḥ

युयुत्सुश्च महातेजा धौम्यश्चैवि पुरोहितः ।
युधिष्ठिरस्य वचनात्पुरगुप्तिं प्रचक्रतुः

yuyutsuśca mahātejā dhaumyaścaivi purohitaḥ |
yudhiṣṭhirasya vacanātpuraguptiṃ pracakratuḥ

ततो युधिष्ठिरो राजा कुरुक्षेत्रमवातरत् ।
क्रमोणोत्तीर्य यमुनां नदीं परमपाविनीम्

tato yudhiṣṭhiro rājā kurukṣetramavātarat |
kramoṇottīrya yamunāṃ nadīṃ paramapāvinīm

स ददर्शाश्रमं दूराद्राजर्षेस्तस्य धीमतः ।
शतयूपस्य कौरव्य धृतराष्ट्रस्य चैव ह

sa dadarśāśramaṃ dūrādrājarṣestasya dhīmataḥ |
śatayūpasya kauravya dhṛtarāṣṭrasya caiva ha

ततः प्रमुदितः सर्वो जनस्तद्वनमञ्जसा ।
विवेश सुमहानादैरापूर्य भरतर्षभ

tataḥ pramuditaḥ sarvo janastadvanamañjasā |
viveśa sumahānādairāpūrya bharatarṣabha