Chapter 34: King Bhangasvana becomes a woman

स्त्रीपुंसयोः सम्प्रयोगे स्पर्शः कस्याधिको भवेत् ।
एतस्मिन्संशये राजन्यथावद्वक्तुमर्हसि

strīpuṃsayoḥ samprayoge sparśaḥ kasyādhiko bhavet |
etasminsaṃśaye rājanyathāvadvaktumarhasi

अत्राप्युदाहरन्तीममितिहासं पुरातनम् ।
भङ्गास्वनेन शक्रस्य यथा वैरमभूत्पुरा

atrāpyudāharantīmamitihāsaṃ purātanam |
bhaṅgāsvanena śakrasya yathā vairamabhūtpurā

पुरा भङ्गास्वनो नाम राजर्षिरतिधार्मिकः ।
अपुत्रः पुरुषव्याघ्र पुत्रार्थं यज्ञमाहरत्

purā bhaṅgāsvano nāma rājarṣiratidhārmikaḥ |
aputraḥ puruṣavyāghra putrārthaṃ yajñamāharat

अग्निष्टुतं स राजर्षिरिन्द्रद्विष्टं महाबलः ।
प्रायश्चित्तेषु मर्त्यानां पुत्रकामेषु चेष्यते

agniṣṭutaṃ sa rājarṣirindradviṣṭaṃ mahābalaḥ |
prāyaścitteṣu martyānāṃ putrakāmeṣu ceṣyate

इन्द्रो ज्ञात्वा तु तं यज्ञं महाभागः सुरेश्वरः ।
अन्तरं तस्य राजर्षेरन्विच्छन्नियतात्मनः ।
न चैवास्यान्तरं राजन्स ददर्श महात्मनः

indro jñātvā tu taṃ yajñaṃ mahābhāgaḥ sureśvaraḥ |
antaraṃ tasya rājarṣeranvicchanniyatātmanaḥ |
na caivāsyāntaraṃ rājansa dadarśa mahātmanaḥ

कस्य चित्त्वथ कालस्य मृगयां गतवान्नृपः ।
इदमन्तरमित्येव शक्रो नृपममोहयत्

kasya cittvatha kālasya mṛgayāṃ gatavānnṛpaḥ |
idamantaramityeva śakro nṛpamamohayat

एकाश्वेन च राजर्षिर्भ्रान्त इन्द्रेण मोहितः ।
न दिशोऽविन्दत नृपः क्षुत्पिपासार्दितस्तदा

ekāśvena ca rājarṣirbhrānta indreṇa mohitaḥ |
na diśo'vindata nṛpaḥ kṣutpipāsārditastadā

इतश्चेतश्च धावन्वै श्रमतृष्णार्दितो नृप ।
सरोऽपश्यत्सुरुचिरं पूर्णं परमवारिणा

itaścetaśca dhāvanvai śramatṛṣṇārdito nṛpa |
saro'paśyatsuruciraṃ pūrṇaṃ paramavāriṇā

सोऽवगाह्य सरस्तात पाययामास वाजिनम्

so'vagāhya sarastāta pāyayāmāsa vājinam

अथ पीतोदकं सोऽश्वं वृक्षे बद्ध्वा नृपोत्तमः ।
अवगाह्य ततः स्नातस्तत्र स्त्रीत्वमवाप्तवान्

atha pītodakaṃ so'śvaṃ vṛkṣe baddhvā nṛpottamaḥ |
avagāhya tataḥ snātastatra strītvamavāptavān

आत्मानं स्त्रीकृतं दृष्ट्वा व्रीडितो नृपसत्तमः ।
चिन्तानुगतसर्वात्मा व्याकुलेन्द्रियचेतनः

ātmānaṃ strīkṛtaṃ dṛṣṭvā vrīḍito nṛpasattamaḥ |
cintānugatasarvātmā vyākulendriyacetanaḥ

आरोहिष्ये कथं त्वश्वं कथं यास्यामि वै पुरम् ।
इष्टेनाग्निष्टुता चापि पुत्राणां शतमौरसम्

ārohiṣye kathaṃ tvaśvaṃ kathaṃ yāsyāmi vai puram |
iṣṭenāgniṣṭutā cāpi putrāṇāṃ śatamaurasam

जातं महाबलानां मे तान्प्रवक्ष्यामि किन्नवहम् ।
दारेषु चात्मकीयेषु पौरजानपदेषु च

jātaṃ mahābalānāṃ me tānpravakṣyāmi kinnavaham |
dāreṣu cātmakīyeṣu paurajānapadeṣu ca

मृदुत्वं च तनुत्वं च पराधीनत्वमेव च ।
हासभावादि लावण्यं स्त्रीगुणाद्वा कुतूहलम् ।
स्त्रीगुणा ऋषिभिः प्रोक्ता धर्मतत्त्वार्थदर्शिभिः

mṛdutvaṃ ca tanutvaṃ ca parādhīnatvameva ca |
hāsabhāvādi lāvaṇyaṃ strīguṇādvā kutūhalam |
strīguṇā ṛṣibhiḥ proktā dharmatattvārthadarśibhiḥ

व्यायामः कर्कशत्वं च वीर्यं च पुरुषे गुणाः

vyāyāmaḥ karkaśatvaṃ ca vīryaṃ ca puruṣe guṇāḥ

पौरुषं विप्रनष्टं स्त्रीत्वं केनापि मेऽभवत् ।
स्त्रीभावात्पुनरश्वं तं कथमारोढुमुत्सहे

pauruṣaṃ vipranaṣṭaṃ strītvaṃ kenāpi me'bhavat |
strībhāvātpunaraśvaṃ taṃ kathamāroḍhumutsahe

महता त्वथ खेदेन आरुह्याश्वं नराधिपः ।
पुनरायात्पुरं तात स्त्रीभूतो नृपसत्तमः ।

mahatā tvatha khedena āruhyāśvaṃ narādhipaḥ |
punarāyātpuraṃ tāta strībhūto nṛpasattamaḥ |

पुत्रा दाराश्च भृत्याश्च पौरजानपदाश्च ते ।
किन्न्विदं त्विति विज्ञाय विस्मयं परमं गताः

putrā dārāśca bhṛtyāśca paurajānapadāśca te |
kinnvidaṃ tviti vijñāya vismayaṃ paramaṃ gatāḥ

अथोवाच स राजर्षिः स्त्रीभूतो वदतांवरः ।
मृगयामस्मि निर्यातो बलैः परिवृतो दृढम् ।
उद्भान्तः प्राविशं घोरामटवीं दैवमोहितः

athovāca sa rājarṣiḥ strībhūto vadatāṃvaraḥ |
mṛgayāmasmi niryāto balaiḥ parivṛto dṛḍham |
udbhāntaḥ prāviśaṃ ghorāmaṭavīṃ daivamohitaḥ

अटव्यां च सुघोंरायां तृष्णार्तो नष्टचेतनः ।
सरः सुरुचिरप्रख्यमपश्यं पक्षिभिर्वृतम्

aṭavyāṃ ca sughoṃrāyāṃ tṛṣṇārto naṣṭacetanaḥ |
saraḥ suruciraprakhyamapaśyaṃ pakṣibhirvṛtam

तत्रावगाढः स्त्रीभूतो व्यक्तं दैवान्न संशयः ।
अतृप्त एव पुत्राणां दाराणां च धनस्य च

tatrāvagāḍhaḥ strībhūto vyaktaṃ daivānna saṃśayaḥ |
atṛpta eva putrāṇāṃ dārāṇāṃ ca dhanasya ca

नामगोत्राणि चाभाव्य दाराणां मन्त्रिणां तथा ।
आह पुत्रांस्ततः सोऽथ स्त्रीभूतः पार्तिवोत्तमः ।
सम्प्रीत्या भुज्यतांराज्यं वनं यास्यामि पुत्रकाः

nāmagotrāṇi cābhāvya dārāṇāṃ mantriṇāṃ tathā |
āha putrāṃstataḥ so'tha strībhūtaḥ pārtivottamaḥ |
samprītyā bhujyatāṃrājyaṃ vanaṃ yāsyāmi putrakāḥ

स पुत्राणां शतं राजा अभिषिच्य वनं गतः ।
गत्वा चैवाश्रमं सा तु तापसं प्रत्यपद्यत

sa putrāṇāṃ śataṃ rājā abhiṣicya vanaṃ gataḥ |
gatvā caivāśramaṃ sā tu tāpasaṃ pratyapadyata

तापसेनास्य पुत्राणामाश्रमेष्वभवच्छतम् ।
अथ साऽऽदाय तान्सर्वान्पूर्वपुत्रानभाषत

tāpasenāsya putrāṇāmāśrameṣvabhavacchatam |
atha sā''dāya tānsarvānpūrvaputrānabhāṣata

पुरुषत्वे सुता यूयं स्त्रीत्वे चेमे शतं सुताः ।
एकत्र भुज्यतां राज्यं भ्रातृभावेन पुत्रकाः

puruṣatve sutā yūyaṃ strītve ceme śataṃ sutāḥ |
ekatra bhujyatāṃ rājyaṃ bhrātṛbhāvena putrakāḥ

सहिता भ्रातरस्तेऽथ राज्यं बुभुजिरे तदा

sahitā bhrātaraste'tha rājyaṃ bubhujire tadā

तान्दृष्ट्वा भातृभावेन भुञ्जानान्राज्यमुत्तमम् ।
चिन्तयामास देवेन्द्रो मन्युनाऽथ परिप्लुतः ।
उपकारोऽस्य राजर्षेः कृतो नापकृतं मया

tāndṛṣṭvā bhātṛbhāvena bhuñjānānrājyamuttamam |
cintayāmāsa devendro manyunā'tha pariplutaḥ |
upakāro'sya rājarṣeḥ kṛto nāpakṛtaṃ mayā

ततो ब्राह्मणरुपेण देवराजः शतक्रतुः ।
भेदयामास तान्गत्वा नगरं वै नृपात्मजान्

tato brāhmaṇarupeṇa devarājaḥ śatakratuḥ |
bhedayāmāsa tāngatvā nagaraṃ vai nṛpātmajān

भ्रातृणां नास्ति सौभ्रात्रं येऽप्येकस्य पितः सुताः ।
कश्यपस्य सुराश्चैव असुराश्व सुतास्तथा ।

bhrātṛṇāṃ nāsti saubhrātraṃ ye'pyekasya pitaḥ sutāḥ |
kaśyapasya surāścaiva asurāśva sutāstathā |

राज्यहेतोर्विवदिताः कश्यपस्य सुरासुराः ॥
यूयं भङ्गास्वनापत्यास्तापसस्येतरे सुताः ।

rājyahetorvivaditāḥ kaśyapasya surāsurāḥ ||
yūyaṃ bhaṅgāsvanāpatyāstāpasasyetare sutāḥ |

युष्माकं भेदितास्ते तु युद्धेऽन्योन्यमपातयन् ।
तच्छ्रुत्वा तापसी चापि संतप्ता प्ररुरोद ह

yuṣmākaṃ bheditāste tu yuddhe'nyonyamapātayan |
tacchrutvā tāpasī cāpi saṃtaptā praruroda ha

ब्राह्मणच्छद्मनाऽभ्येत्य तामिन्द्रोऽथान्वपृच्छत ।
केन दुःखेन संतप्ता रोदिषि त्वं वरानने

brāhmaṇacchadmanā'bhyetya tāmindro'thānvapṛcchata |
kena duḥkhena saṃtaptā rodiṣi tvaṃ varānane

ब्राह्म्णं तं ततो दृष्ट्वा सा स्त्री करणमब्रवीत् ।
पुत्राणां द्वे शते ब्रह्मन्कालेन विनिपातिते

brāhmṇaṃ taṃ tato dṛṣṭvā sā strī karaṇamabravīt |
putrāṇāṃ dve śate brahmankālena vinipātite

अहं राजाऽभव विप्र तत्र पूर्वं शतं मम ।
समुत्पन्नं सुरूपाणां पुत्राणां ब्राह्मणोत्तम

ahaṃ rājā'bhava vipra tatra pūrvaṃ śataṃ mama |
samutpannaṃ surūpāṇāṃ putrāṇāṃ brāhmaṇottama

कदाचिन्मृगयां यात उद्धान्तो गहने वने ।
अवगाढश्च सरसि स्त्रीभूतो ब्राह्मणोत्तम

kadācinmṛgayāṃ yāta uddhānto gahane vane |
avagāḍhaśca sarasi strībhūto brāhmaṇottama

पुत्रान्राज्ये प्रतिष्ठाप्य वनमस्मि ततो गतः

putrānrājye pratiṣṭhāpya vanamasmi tato gataḥ

स्त्रियाश्च मे पुत्रशतं तापसेन महात्मना ।
आश्रमे जनितं ब्रह्मन्नीतं तन्नगरं मया

striyāśca me putraśataṃ tāpasena mahātmanā |
āśrame janitaṃ brahmannītaṃ tannagaraṃ mayā

तेषां च वैरमुत्पन्नं कालयोगेन वै द्विज ।
एतच्छोचाम्यहं ब्रह्मन्दैवेन समभिप्लुता

teṣāṃ ca vairamutpannaṃ kālayogena vai dvija |
etacchocāmyahaṃ brahmandaivena samabhiplutā

इन्द्रस्तां दुःशितां दृष्ट्वा अब्रवीत्परुषं वचः

indrastāṃ duḥśitāṃ dṛṣṭvā abravītparuṣaṃ vacaḥ

पुरा सुदुःसहं भद्रे मम दुःखं त्वया कृतम् ।
इन्द्रद्विष्टेन यजता मामनाहूय धिष्ठितम् ।
इन्द्रोऽहमस्मि दुर्बुद्धे वैरं ते पातितं मया

purā suduḥsahaṃ bhadre mama duḥkhaṃ tvayā kṛtam |
indradviṣṭena yajatā māmanāhūya dhiṣṭhitam |
indro'hamasmi durbuddhe vairaṃ te pātitaṃ mayā

इन्द्रं दृष्ट्वा तु राजर्षिः पादयोः शिरसा गतः ।
प्रसीद त्रिदशश्रेष्ठ पुत्रकामेन स क्रतुः ।
इष्टस्त्रिदशशार्दूल तत्र मे क्षन्तुमर्हसि

indraṃ dṛṣṭvā tu rājarṣiḥ pādayoḥ śirasā gataḥ |
prasīda tridaśaśreṣṭha putrakāmena sa kratuḥ |
iṣṭastridaśaśārdūla tatra me kṣantumarhasi

प्रणिपातेन तस्येन्द्रः परितुष्टो वरं ददौ

praṇipātena tasyendraḥ parituṣṭo varaṃ dadau

पुत्रास्ते कतमे राजञ्जीवन्त्वेतत्प्रचक्ष्व मे ।
स्त्रीभूतस्य हि ये जाताः पुरुषस्याथ येऽभवन्

putrāste katame rājañjīvantvetatpracakṣva me |
strībhūtasya hi ye jātāḥ puruṣasyātha ye'bhavan

तापसी तु ततः शक्रमुवाच प्रयताञ्जलिः ।
स्त्रीभूतस्य हि ये पुत्रास्ते मे जीवन्तु वासव

tāpasī tu tataḥ śakramuvāca prayatāñjaliḥ |
strībhūtasya hi ye putrāste me jīvantu vāsava

इन्द्रस्तु विस्मितो दृष्ट्वा स्त्रियं पप्रच्छ तां पुनः ।
पुरुषोत्पादिता ये ते कथं द्वेष्याः सुतास्तव

indrastu vismito dṛṣṭvā striyaṃ papraccha tāṃ punaḥ |
puruṣotpāditā ye te kathaṃ dveṣyāḥ sutāstava

स्त्रीभूतस्य हि ये जाताः स्नेहस्तेभ्योऽधिकः कथम् ।
कारणं श्रोतुमिच्छामि तन्मे वक्तुमिहार्हसि

strībhūtasya hi ye jātāḥ snehastebhyo'dhikaḥ katham |
kāraṇaṃ śrotumicchāmi tanme vaktumihārhasi

स्त्रियास्त्वभ्यधिकः स्नेहो न तता पुरुषस्य वै ।
तस्मात्ते शक्र जीवन्तु ये जाताः स्त्रीकृतस्य वै

striyāstvabhyadhikaḥ sneho na tatā puruṣasya vai |
tasmātte śakra jīvantu ye jātāḥ strīkṛtasya vai

एवमुक्तस्ततस्त्विन्द्रः प्रीतो वाक्यमुवाच ह ।
सर्व एवेह जीवन्तु पुत्रास्ते सत्यवादिनि

evamuktastatastvindraḥ prīto vākyamuvāca ha |
sarva eveha jīvantu putrāste satyavādini

वरं च वृणु राजेन्द्र यं त्वमिच्छसि सुव्रत ।
पुरुषत्वमथ स्त्रीत्वं मत्तो यदभिकाङ्क्षसे

varaṃ ca vṛṇu rājendra yaṃ tvamicchasi suvrata |
puruṣatvamatha strītvaṃ matto yadabhikāṅkṣase

स्त्रीत्वमेव वृणे शक्र पुंस्त्वं नेच्छामि वासव ।
एवमुक्तस्तु देवेन्द्रस्तां स्त्रियं प्रत्युवाच ह

strītvameva vṛṇe śakra puṃstvaṃ necchāmi vāsava |
evamuktastu devendrastāṃ striyaṃ pratyuvāca ha

पुरुषत्वं कथं त्यक्त्वा स्त्रीत्वं रोचयसे विभो ।
एवमुक्तः प्रत्युवाच स्त्रीभूतो राजसत्तमः

puruṣatvaṃ kathaṃ tyaktvā strītvaṃ rocayase vibho |
evamuktaḥ pratyuvāca strībhūto rājasattamaḥ

स्त्रियाः पुरुषसंयोगे प्रीतिरभ्यधिका सदा ।
एतस्मात्कारणाच्छक्र स्त्रीत्वमेव वृणोम्यहम्

striyāḥ puruṣasaṃyoge prītirabhyadhikā sadā |
etasmātkāraṇācchakra strītvameva vṛṇomyaham

रमाभि चाधिकं स्त्रीत्वे सत्यं वै देवसत्तम ।
स्त्रीभावेन हि तुष्यामि गम्यतां त्रिदशाधिप

ramābhi cādhikaṃ strītve satyaṃ vai devasattama |
strībhāvena hi tuṣyāmi gamyatāṃ tridaśādhipa

एवमस्त्विति चोक्त्वा तामापृच्छ्य त्रिदिवं गतः ।
एवं स्त्रिया महाराज अधिका प्रीतिरुच्यते

evamastviti coktvā tāmāpṛcchya tridivaṃ gataḥ |
evaṃ striyā mahārāja adhikā prītirucyate