Chapter 128: Shri asks the cows for a dwelling

मया गवां पुरीषं वै श्रिया जुष्टमिति श्रुतम् ।
एतदिच्छाम्यहं श्रोतुं संशयोऽत्र हि मे महान्

mayā gavāṃ purīṣaṃ vai śriyā juṣṭamiti śrutam |
etadicchāmyahaṃ śrotuṃ saṃśayo'tra hi me mahān

अत्राप्युदाहरन्तीममितिहासं पुरातनम् ।
गोभिर्नृपेहं संवादं श्रिया भारतसत्तम

atrāpyudāharantīmamitihāsaṃ purātanam |
gobhirnṛpehaṃ saṃvādaṃ śriyā bhāratasattama

श्रीः कृत्वेह वपुः कान्तं गोमध्येषु विवेश ह ।
गावोऽथ विस्मितास्तस्या दृष्ट्वा रूपस्य सम्पदम्

śrīḥ kṛtveha vapuḥ kāntaṃ gomadhyeṣu viveśa ha |
gāvo'tha vismitāstasyā dṛṣṭvā rūpasya sampadam

काऽसि देवि कुतो वा त्वं रूपेणाप्रतिमा भुवि ।
विस्मिताः स्म महाभागे तव रूपस्य सम्पदा

kā'si devi kuto vā tvaṃ rūpeṇāpratimā bhuvi |
vismitāḥ sma mahābhāge tava rūpasya sampadā

इच्छामस्त्वां वयं ज्ञातुं का त्वं क्व च गमिष्यसि ।
तत्त्वेन हि सुवर्णाभे सर्वमेतद्ब्रवीहि नः

icchāmastvāṃ vayaṃ jñātuṃ kā tvaṃ kva ca gamiṣyasi |
tattvena hi suvarṇābhe sarvametadbravīhi naḥ

लोकस्य कान्तिर्भद्रं वः श्रीर्नामाहं परिश्रुता ।
मया दैत्याः परित्यक्ता विनष्टाः शाश्वतीः समाः

lokasya kāntirbhadraṃ vaḥ śrīrnāmāhaṃ pariśrutā |
mayā daityāḥ parityaktā vinaṣṭāḥ śāśvatīḥ samāḥ

मयाऽभिपन्ना देवाश्च मोदन्ते शाश्वतीः समाः ।
इन्द्रो विवस्वान्सोमश्च विष्णुरापोऽग्निरेव च

mayā'bhipannā devāśca modante śāśvatīḥ samāḥ |
indro vivasvānsomaśca viṣṇurāpo'gnireva ca

मयाऽभिपन्ना दीप्यन्ते ऋषयो देवतास्तथा ।
यान्नाविशाम्यहं गावस्ते विनश्यन्ति सर्वशः

mayā'bhipannā dīpyante ṛṣayo devatāstathā |
yānnāviśāmyahaṃ gāvaste vinaśyanti sarvaśaḥ

धर्मश्चार्थश्च कामश्च मया जुष्टाः सुखान्विताः ।
एवंप्रभावां मां गावो विजानीत सुखप्रदाम्

dharmaścārthaśca kāmaśca mayā juṣṭāḥ sukhānvitāḥ |
evaṃprabhāvāṃ māṃ gāvo vijānīta sukhapradām

इच्छामि चापि युष्मासु वस्तुं सर्वासु नित्यदा ।
आगत्य प्रार्थये युष्माञ्श्रीजुष्टा भवताऽनघाः

icchāmi cāpi yuṣmāsu vastuṃ sarvāsu nityadā |
āgatya prārthaye yuṣmāñśrījuṣṭā bhavatā'naghāḥ

अध्रुवा चपला च त्वं सामान्या बहुभिः सह ।
न त्वामिच्छाम भद्रं ते गम्यतां यत्र रोचते

adhruvā capalā ca tvaṃ sāmānyā bahubhiḥ saha |
na tvāmicchāma bhadraṃ te gamyatāṃ yatra rocate

वपुष्मन्त्यो वयं सर्वाः किमस्माकं त्वयाऽद्य वै ।
यथेष्टं गम्यतां तत्र कृतकार्या वयं त्वया

vapuṣmantyo vayaṃ sarvāḥ kimasmākaṃ tvayā'dya vai |
yatheṣṭaṃ gamyatāṃ tatra kṛtakāryā vayaṃ tvayā

किमेतद्वः क्षमं गावो यन्मां नेहाभिनन्दथ ।
न मां सम्प्रतिगृह्णीध्वं कस्माद्वै दुर्लभां सतीम्

kimetadvaḥ kṣamaṃ gāvo yanmāṃ nehābhinandatha |
na māṃ sampratigṛhṇīdhvaṃ kasmādvai durlabhāṃ satīm

सत्यश्च लोकवादोऽयं लोके चरति सुव्रताः ।
स्वयं प्राप्ते परिभवो भवतीति विनिश्चयः

satyaśca lokavādo'yaṃ loke carati suvratāḥ |
svayaṃ prāpte paribhavo bhavatīti viniścayaḥ

महदुग्रं तपः कृत्वा मां निषेवन्ति मानवाः ।
देवदानवगन्धर्वाः पिशाचोरगराक्षसाः

mahadugraṃ tapaḥ kṛtvā māṃ niṣevanti mānavāḥ |
devadānavagandharvāḥ piśācoragarākṣasāḥ

क्षममेतद्धि वो गावः प्रतिगृह्णीत मामिह ।
नावमन्या ह्यहं सौम्यास्त्रैलोक्ये सचराचरे

kṣamametaddhi vo gāvaḥ pratigṛhṇīta māmiha |
nāvamanyā hyahaṃ saumyāstrailokye sacarācare

नावमान्यामहे देवि न त्वां परिभवामहे ।
अध्रुवा चलचित्तासि ततस्त्वां वर्जयामहे

nāvamānyāmahe devi na tvāṃ paribhavāmahe |
adhruvā calacittāsi tatastvāṃ varjayāmahe

बहुना च किमुक्तेन गम्यतां यत्र वाञ्छसि ।
वपुष्मन्त्यो वयं सर्वाः किमस्माकं त्वयाऽनघे

bahunā ca kimuktena gamyatāṃ yatra vāñchasi |
vapuṣmantyo vayaṃ sarvāḥ kimasmākaṃ tvayā'naghe

अवज्ञाता भविष्यामि सर्वलोकेषु मानवैः ।
प्रत्याख्यातेति युष्माभिः प्रसादः क्रियतां मम

avajñātā bhaviṣyāmi sarvalokeṣu mānavaiḥ |
pratyākhyāteti yuṣmābhiḥ prasādaḥ kriyatāṃ mama

महाभागा भवत्यो वै शरण्याः शरणागताम् ।
परित्रायन्तु मां नित्यं भजमानामनिन्दिताम्

mahābhāgā bhavatyo vai śaraṇyāḥ śaraṇāgatām |
paritrāyantu māṃ nityaṃ bhajamānāmaninditām

माननामहमिच्छामि भवत्यः सततं शिवाः ।
अप्येकाङ्गेष्वधो वस्तुमिच्छामि च सुकुत्सिते

mānanāmahamicchāmi bhavatyaḥ satataṃ śivāḥ |
apyekāṅgeṣvadho vastumicchāmi ca sukutsite

न वोऽस्ति कुत्सितं किञ्चिदङ्गेष्वालक्ष्यतेऽनघाः ।
पुण्याः पवित्राः सुभगा अवाग्देशं प्रयच्छथ ।
वसेयं यत्र वो देहे तन्मे व्याख्यातुमर्हथ

na vo'sti kutsitaṃ kiñcidaṅgeṣvālakṣyate'naghāḥ |
puṇyāḥ pavitrāḥ subhagā avāgdeśaṃ prayacchatha |
vaseyaṃ yatra vo dehe tanme vyākhyātumarhatha

एवमुक्तास्तु ता गावः शुभाः करुणवत्सलाः ।
सम्मान्य सहिताः सर्वाः श्रियमुचुर्नराधिप

evamuktāstu tā gāvaḥ śubhāḥ karuṇavatsalāḥ |
sammānya sahitāḥ sarvāḥ śriyamucurnarādhipa

अवश्यं मानना कार्या तवास्माभिर्यशस्विनि ।
शकृन्मूत्रे निवसतां पुण्यमेतद्धि नः शुभे

avaśyaṃ mānanā kāryā tavāsmābhiryaśasvini |
śakṛnmūtre nivasatāṃ puṇyametaddhi naḥ śubhe

दिष्ट्या प्रसादो युष्माभिः कृतो मेऽनुग्रहात्मकः ।
एवं भवतु भद्रं वः पूजिताऽस्मि सुखप्रदाः

diṣṭyā prasādo yuṣmābhiḥ kṛto me'nugrahātmakaḥ |
evaṃ bhavatu bhadraṃ vaḥ pūjitā'smi sukhapradāḥ

एवं कृत्वा तु समयं श्रीर्गोभिः सह भारत ।
पश्यन्तीनां ततस्तासां तत्रैवान्तरधीयत

evaṃ kṛtvā tu samayaṃ śrīrgobhiḥ saha bhārata |
paśyantīnāṃ tatastāsāṃ tatraivāntaradhīyata

एवं गोशकृतः पुत्र माहात्म्यं तेऽनुवर्णितम् ।
माहात्म्यं च गवां भूयः श्रूयतां गदतो मम

evaṃ gośakṛtaḥ putra māhātmyaṃ te'nuvarṇitam |
māhātmyaṃ ca gavāṃ bhūyaḥ śrūyatāṃ gadato mama