Chapter 201: Dhrishtadyumna names the assembled suitors

दुर्योधनो दुर्विषहो दुर्मुखो दुष्प्रधर्षणः ।
विविंशतिर्विकर्णश्च सहो दुःशासनस्तथा

duryodhano durviṣaho durmukho duṣpradharṣaṇaḥ |
viviṃśatirvikarṇaśca saho duḥśāsanastathā

युयुत्सुर्वायुवेगश्च भीमवेगरवस्तथा ।
उग्रायुधो बलाकी च करकायुर्विरोचनः

yuyutsurvāyuvegaśca bhīmavegaravastathā |
ugrāyudho balākī ca karakāyurvirocanaḥ

कुण्डकश्चित्रसेनश्च सुवर्चाः कनकध्वजः ।
नन्दको बाहुशाली च तुहुण्डो विकटस्तथा

kuṇḍakaścitrasenaśca suvarcāḥ kanakadhvajaḥ |
nandako bāhuśālī ca tuhuṇḍo vikaṭastathā

एते चान्ये च बहवो धार्तराष्ट्रा महाबलाः ।
कर्णेन सहिता वीरास्त्वदर्थं समुपागताः

ete cānye ca bahavo dhārtarāṣṭrā mahābalāḥ |
karṇena sahitā vīrāstvadarthaṃ samupāgatāḥ

असङ्ख्याता महात्मानः पार्थिवाः क्षत्रियर्षभाः ।
शकुनिः सौबलश्चैव वृषकोऽथ बृहद्बलः

asaṅkhyātā mahātmānaḥ pārthivāḥ kṣatriyarṣabhāḥ |
śakuniḥ saubalaścaiva vṛṣako'tha bṛhadbalaḥ

एते गान्धारराजस्य सुताः सर्वे समागताः ।
अश्वत्थामा च भोजश्च सर्वशस्त्रभृतां वरौ

ete gāndhārarājasya sutāḥ sarve samāgatāḥ |
aśvatthāmā ca bhojaśca sarvaśastrabhṛtāṃ varau

समवेतौ महात्मानौ त्वदर्थे समलङ्कृतौ ।
बृहन्तो मणिमांश्चैव दण्डधारश्च पार्थिवः

samavetau mahātmānau tvadarthe samalaṅkṛtau |
bṛhanto maṇimāṃścaiva daṇḍadhāraśca pārthivaḥ

सहदेवजयत्सेनौ मेघसन्धिश्च पार्थिवः ।
विराटः सह पुत्राभ्यां शङ्खेनैवोत्तरेण च

sahadevajayatsenau meghasandhiśca pārthivaḥ |
virāṭaḥ saha putrābhyāṃ śaṅkhenaivottareṇa ca

वार्धक्षेमिः सुशर्मा च सेनाबिन्दुश्च पार्थिवः ।
सुकेतुः सह पुत्रेण सुनाम्ना च सुवर्चसा

vārdhakṣemiḥ suśarmā ca senābinduśca pārthivaḥ |
suketuḥ saha putreṇa sunāmnā ca suvarcasā

सुचित्रः सुकुमारश्च वृकः सत्यधृतिस्तथा ।
सूर्यध्वजो रोचमानो नीलश्चित्रायुधस्तथा

sucitraḥ sukumāraśca vṛkaḥ satyadhṛtistathā |
sūryadhvajo rocamāno nīlaścitrāyudhastathā

अंशुमांश्चेकितानश्च श्रेणिमांश्च महाबलः ।
समुद्रसेनपुत्रश्च चन्द्रसेनः प्रतापवान्

aṃśumāṃścekitānaśca śreṇimāṃśca mahābalaḥ |
samudrasenaputraśca candrasenaḥ pratāpavān

जलसन्धः पितापुत्रौ विदण्डो दण्ड एव च ।
पौण्ड्रको वासुदेवश्च भगदत्तश्च वीर्यवान्

jalasandhaḥ pitāputrau vidaṇḍo daṇḍa eva ca |
pauṇḍrako vāsudevaśca bhagadattaśca vīryavān

कलिङ्गस्ताम्रलिप्तश्च पत्तनाधिपतिस्तथा ।
मद्रराजस्तथा शल्यः सहपुत्रो महारथः

kaliṅgastāmraliptaśca pattanādhipatistathā |
madrarājastathā śalyaḥ sahaputro mahārathaḥ

रुक्माङ्गदेन वीरेण तथा रुक्मरथेन च ।
कौरव्यः सोमदत्तश्च पुत्रश्चास्य महारथः

rukmāṅgadena vīreṇa tathā rukmarathena ca |
kauravyaḥ somadattaśca putraścāsya mahārathaḥ

समवेतास्त्रयः शूरा भूरिर्भूरिश्रवाः शलः ।
सुदक्षिणश्च काम्भोजो दृढधन्वा च पौरवः

samavetāstrayaḥ śūrā bhūrirbhūriśravāḥ śalaḥ |
sudakṣiṇaśca kāmbhojo dṛḍhadhanvā ca pauravaḥ

बृहद्बलः सुषेणश्च शिबिरौशीनस्तथा ।
पटच्चरनिहन्ता च कारूषाधिपतिस्तथा

bṛhadbalaḥ suṣeṇaśca śibirauśīnastathā |
paṭaccaranihantā ca kārūṣādhipatistathā

सङ्कर्षणो वासुदेवो रौक्मिणेयश्च वीर्यवान् ।
साम्बश्च चारुदेष्णश्च प्राद्युम्निः सगदस्तथा

saṅkarṣaṇo vāsudevo raukmiṇeyaśca vīryavān |
sāmbaśca cārudeṣṇaśca prādyumniḥ sagadastathā

अक्रूरः सात्यकिश्चैव उद्धवश्च महामतिः ।
कृतवर्मा च हार्दिक्यः पृथुर्विपृथुरेव च

akrūraḥ sātyakiścaiva uddhavaśca mahāmatiḥ |
kṛtavarmā ca hārdikyaḥ pṛthurvipṛthureva ca

विदूरथश्च कङ्कश्च शङ्कुश्च सगवेषणः ।
आशावहोऽनिरुद्धश्च समीकः सारिमेजयः

vidūrathaśca kaṅkaśca śaṅkuśca sagaveṣaṇaḥ |
āśāvaho'niruddhaśca samīkaḥ sārimejayaḥ

वीरो वातपतिश्चैव झिल्लीपिण्डारकस्तथा ।
उशीनरश्च विक्रान्तो वृष्णयस्ते प्रकीर्तिताः

vīro vātapatiścaiva jhillīpiṇḍārakastathā |
uśīnaraśca vikrānto vṛṣṇayaste prakīrtitāḥ

भगीरथो बृहत्क्षत्रः सैन्धवश्च जयद्रथः ।
बृहद्रथो बाह्लिकश्च श्रउतायुश्च महारथः

bhagīratho bṛhatkṣatraḥ saindhavaśca jayadrathaḥ |
bṛhadratho bāhlikaśca śrautāyuśca mahārathaḥ

उलूकः कैतवो राजा चित्राङ्गदशुभाङ्गदौ ।
वत्सराजश्च मतिमान्कोसलाधिपतिस्तथा

ulūkaḥ kaitavo rājā citrāṅgadaśubhāṅgadau |
vatsarājaśca matimānkosalādhipatistathā

शिशुपालख्च विक्रान्तो जरासन्धस्तथैव च ।
एते चान्ये च बहवो नानाजनपदेश्वराः

śiśupālakhca vikrānto jarāsandhastathaiva ca |
ete cānye ca bahavo nānājanapadeśvarāḥ

त्वदर्थमागता भद्रे क्षत्रियाः प्रथिता भुवि ।
एते भेत्स्यन्ति विक्रान्तास्त्वदर्थे लक्ष्यमुत्तमम् ।
विध्यते य इदं लक्ष्यं वरयेथाः शुभेऽद्य तम्

tvadarthamāgatā bhadre kṣatriyāḥ prathitā bhuvi |
ete bhetsyanti vikrāntāstvadarthe lakṣyamuttamam |
vidhyate ya idaṃ lakṣyaṃ varayethāḥ śubhe'dya tam