Chapter 185: Brahmanas invite the Pandavas to the svayamvara

गते भगवति व्यासे पाण्डवा हृष्टमानसाः ।
ते प्रयाता नरव्याघ्रा मात्रा सह परन्तपाः

gate bhagavati vyāse pāṇḍavā hṛṣṭamānasāḥ |
te prayātā naravyāghrā mātrā saha parantapāḥ

ब्राह्मणान्गच्छतो पश्यन्पाञ्चालान्सगणान्पथि ।
अथ ते ब्राह्मणा ऊचुः पाण्डवान्ब्रह्मचारिणः

brāhmaṇāngacchato paśyanpāñcālānsagaṇānpathi |
atha te brāhmaṇā ūcuḥ pāṇḍavānbrahmacāriṇaḥ

क्व भवन्तो गमिष्यन्ति कुतो वाऽऽगच्छथेति ह ।
(युधिष्ठिर उवाच)
प्रयातानेकचक्रायाः सोदर्यान्देवदर्शिनः

kva bhavanto gamiṣyanti kuto vā''gacchatheti ha |
(yudhiṣṭhira uvāca)
prayātānekacakrāyāḥ sodaryāndevadarśinaḥ

भवन्तो नोऽभिजानन्तु सहितान्ब्रह्मचारिणः ।
गच्छतो नस्तु पाञ्चालान्द्रुपदस्य पुरं प्रति

bhavanto no'bhijānantu sahitānbrahmacāriṇaḥ |
gacchato nastu pāñcālāndrupadasya puraṃ prati

इच्छामो भवतो ज्ञातुं परं कौतूहलं हि नः

icchāmo bhavato jñātuṃ paraṃ kautūhalaṃ hi naḥ

एते सार्धं प्रयाताः स्मो वयमप्यत्र गामिनः ।
तत्राप्यद्भुतसङ्काश उत्सवो भविता महान्

ete sārdhaṃ prayātāḥ smo vayamapyatra gāminaḥ |
tatrāpyadbhutasaṅkāśa utsavo bhavitā mahān

ततस्तु यज्ञसेनस्य द्रुपदस्य महात्मनः ।
यासावयोनिजा कन्या स्थास्यते सा स्वयंवरे

tatastu yajñasenasya drupadasya mahātmanaḥ |
yāsāvayonijā kanyā sthāsyate sā svayaṃvare

दर्शनीयाऽनवद्याङ्गी सुकुमारी यशस्विनी ।
धृष्टद्युम्नस्य भगिनी द्रोणशत्रोः प्रतापिनः

darśanīyā'navadyāṅgī sukumārī yaśasvinī |
dhṛṣṭadyumnasya bhaginī droṇaśatroḥ pratāpinaḥ

जातो यः पावकाच्छूरः सशरः सशरासनः ।
सुसमिद्धान्महाभागः सोमकानां महारथः

jāto yaḥ pāvakācchūraḥ saśaraḥ saśarāsanaḥ |
susamiddhānmahābhāgaḥ somakānāṃ mahārathaḥ

यस्मिन्संजायमाने हि वागुवाचाशरीरिणी ।
एष मृत्युश्च शिष्यश्च भारद्वाजस्य जायते

yasminsaṃjāyamāne hi vāguvācāśarīriṇī |
eṣa mṛtyuśca śiṣyaśca bhāradvājasya jāyate

स्वसा तस्य तु वेद्याश्च जाता तस्मिन्महामखे ।
स्त्रीरत्नमसितापाङ्गी श्यामा नीलोत्पलद्युतिः

svasā tasya tu vedyāśca jātā tasminmahāmakhe |
strīratnamasitāpāṅgī śyāmā nīlotpaladyutiḥ

तां यज्ञसेनस्य सुतां द्रौपदीं परमां स्त्रियम् ।
गच्छामस्तत्र वै द्रष्टुं तं चैवास्याः स्वयंवरम्

tāṃ yajñasenasya sutāṃ draupadīṃ paramāṃ striyam |
gacchāmastatra vai draṣṭuṃ taṃ caivāsyāḥ svayaṃvaram

राजानो राजपुत्राश्च यज्वानो भूरिदक्षिणाः ।
स्वाध्यायवन्तः शुचयो महात्मानो धृतव्रताः

rājāno rājaputrāśca yajvāno bhūridakṣiṇāḥ |
svādhyāyavantaḥ śucayo mahātmāno dhṛtavratāḥ

तरुणा दर्शनीयाश्च बलवन्तो दुरासदाः ।
महारथाः कृतास्त्राश्च समेष्यन्तीह भूमिपाः

taruṇā darśanīyāśca balavanto durāsadāḥ |
mahārathāḥ kṛtāstrāśca sameṣyantīha bhūmipāḥ

ते तत्र विविधं दानं विजयार्थं नरेश्वराः ।
प्रदास्यन्ति धनं गाश्च भक्ष्यभोज्यानि सर्वशः

te tatra vividhaṃ dānaṃ vijayārthaṃ nareśvarāḥ |
pradāsyanti dhanaṃ gāśca bhakṣyabhojyāni sarvaśaḥ

प्रतिलप्स्यामहे सर्वं दृष्ट्वा कृष्णां स्वयंवरे ।
यं च सा क्षत्रियं रङ्गे कुमारी वरयिष्यति

pratilapsyāmahe sarvaṃ dṛṣṭvā kṛṣṇāṃ svayaṃvare |
yaṃ ca sā kṣatriyaṃ raṅge kumārī varayiṣyati

तदा वैतालिकाश्चैव नर्तकाः सूतमागधाः ।
निबोधकाश्च देशेभ्यः समेष्यन्ति महाबलाः

tadā vaitālikāścaiva nartakāḥ sūtamāgadhāḥ |
nibodhakāśca deśebhyaḥ sameṣyanti mahābalāḥ

एतत्कौतूहलं तत्र दृष्ट्वा वै प्रतिगृह्य च ।
सहास्माभिर्महात्मानो मात्रा सह निवत्स्यथ

etatkautūhalaṃ tatra dṛṣṭvā vai pratigṛhya ca |
sahāsmābhirmahātmāno mātrā saha nivatsyatha

दर्शनीयांश्च वः सर्वानेकरूपानवस्थितान् ।
समीक्ष्य कृष्मा वरयेत्संगत्यान्यतमं पतिम्

darśanīyāṃśca vaḥ sarvānekarūpānavasthitān |
samīkṣya kṛṣmā varayetsaṃgatyānyatamaṃ patim

अयमेकश्च वो भ्राता दर्शनीयो महाभुजः ।
नियुध्यमानो विजयेत्संगत्य द्रविणं महत्

ayamekaśca vo bhrātā darśanīyo mahābhujaḥ |
niyudhyamāno vijayetsaṃgatya draviṇaṃ mahat

परमं भो गमिष्यामो द्रष्टुं तत्र स्वयंवरम् ।
द्रौपदीं यज्ञसेनस्य कन्यां तस्यास्तथोत्सवम्

paramaṃ bho gamiṣyāmo draṣṭuṃ tatra svayaṃvaram |
draupadīṃ yajñasenasya kanyāṃ tasyāstathotsavam