Chapter 8: Drawing the Vajranabha mandala for Vishnu

भूमिष्ठे मण्डपे स्नात्वा मण्डले विष्णुमर्चयेत् ।
पञ्चरंगिकचूर्णेन वज्रनाभं तु मण्डलम्

bhūmiṣṭhe maṇḍape snātvā maṇḍale viṣṇumarcayet |
pañcaraṃgikacūrṇena vajranābhaṃ tu maṇḍalam

षोडशैः कोष्ठकैस्तत्र सम्मितं रुद्र कारयेत् ।
चतुर्थपंचकोणेषु सूत्रपातं तु कारयेत्

ṣoḍaśaiḥ koṣṭhakaistatra sammitaṃ rudra kārayet |
caturthapaṃcakoṇeṣu sūtrapātaṃ tu kārayet

कोणसूत्रादुभयतः कोणा ये तत्र संस्थिताः ।
तेषु चैव प्रकुर्वीत सूत्रपातं विचक्षणः

koṇasūtrādubhayataḥ koṇā ye tatra saṃsthitāḥ |
teṣu caiva prakurvīta sūtrapātaṃ vicakṣaṇaḥ

तदनन्तरकोणेषु एवमेव हि कारयेत् ।
प्रथमा नाभिरुद्दिष्टा मध्ये रेखाप्रसंगमे

tadanantarakoṇeṣu evameva hi kārayet |
prathamā nābhiruddiṣṭā madhye rekhāprasaṃgame

अन्तरेषु च सर्वेषु अष्टौ चैव तुनाभयः ।
पूर्वमध्यमनाभिभ्यामथं सूत्रं तु भ्रामयेत्

antareṣu ca sarveṣu aṣṭau caiva tunābhayaḥ |
pūrvamadhyamanābhibhyāmathaṃ sūtraṃ tu bhrāmayet

अन्तरा स द्विजश्रेष्ठः पादोनं भ्रामयेद्धर ।
अनेन नाभिसूत्रस्य कर्णिकां भ्रामयेच्छिव

antarā sa dvijaśreṣṭhaḥ pādonaṃ bhrāmayeddhara |
anena nābhisūtrasya karṇikāṃ bhrāmayecchiva

कर्णिकाया द्विभागेन केसराणि विचक्षणः ।
तदग्रेण सदा विद्वान्दलान्येव समालिखेत्

karṇikāyā dvibhāgena kesarāṇi vicakṣaṇaḥ |
tadagreṇa sadā vidvāndalānyeva samālikhet

सर्वेषु नाभिक्षेत्रषु मानेनानेन सुव्रत ।
पद्मानि तानि कुर्वीत देशिकः पर मार्थवित्

sarveṣu nābhikṣetraṣu mānenānena suvrata |
padmāni tāni kurvīta deśikaḥ para mārthavit

आदिसूत्रविभागेन द्वाराणि परिकल्पयेत् ।
द्वारशोभां तथा तत्र तदर्द्धेन तु कल्पयेत्

ādisūtravibhāgena dvārāṇi parikalpayet |
dvāraśobhāṃ tathā tatra tadarddhena tu kalpayet

कर्णिकां पीतवर्णेन सितरक्तादिकेसरैः ।
अन्तरं नीलवर्णेन दलानि असितेन च

karṇikāṃ pītavarṇena sitaraktādikesaraiḥ |
antaraṃ nīlavarṇena dalāni asitena ca

कृष्णवर्णेन रजसा चतुरश्रं प्रपूरयेत् ।
द्वाराणि शुक्लवर्णेन रेखाः पंच च मण्डले

kṛṣṇavarṇena rajasā caturaśraṃ prapūrayet |
dvārāṇi śuklavarṇena rekhāḥ paṃca ca maṇḍale

सिता रक्ता तथा पीता कृष्णा चैव यथाक्रमम् ।
कृत्वैव मण्डलञ्चादौ न्यासं कृत्वार्चयेद्धरिम्

sitā raktā tathā pītā kṛṣṇā caiva yathākramam |
kṛtvaiva maṇḍalañcādau nyāsaṃ kṛtvārcayeddharim

हृन्मध्ये तु न्यसेद्विष्णुं कण्ठे सङ्कर्षणं तथा ।
प्रद्युम्नं शिरसिन्यस्य शिखायामनिरुद्धकम्

hṛnmadhye tu nyasedviṣṇuṃ kaṇṭhe saṅkarṣaṇaṃ tathā |
pradyumnaṃ śirasinyasya śikhāyāmaniruddhakam

ब्रह्माणं सर्वगात्रेषु करयोः श्रीधरं तथा ।
अहं विष्णुरिति ध्यात्वा कर्णिकायां न्यसेद्धरिम्

brahmāṇaṃ sarvagātreṣu karayoḥ śrīdharaṃ tathā |
ahaṃ viṣṇuriti dhyātvā karṇikāyāṃ nyaseddharim

न्यसेत्सङ्कर्षणं पूर्वे प्रद्युम्नं चैव दक्षिणे ।
अनिरुद्धं पश्चिमे च ब्रह्माणं चोत्तरे न्यसेत्

nyasetsaṅkarṣaṇaṃ pūrve pradyumnaṃ caiva dakṣiṇe |
aniruddhaṃ paścime ca brahmāṇaṃ cottare nyaset

श्रीधरं रुद्रकोणेषु इन्द्रादीन्दिक्षु विन्यसेत् ।
ततोऽभ्यर्च्य च गन्धाद्यैः प्राप्नुयात्परमं पदम्

śrīdharaṃ rudrakoṇeṣu indrādīndikṣu vinyaset |
tato'bhyarcya ca gandhādyaiḥ prāpnuyātparamaṃ padam