अध्याय 32: इसी जीवन में फल देने वाले कर्म

एतत्ते कथितं कृष्ण कर्मेहामुत्र सिद्धिदम् ।
क्रियातपोजपध्यानसमुच्चयमयं परम्

etatte kathitaṃ kṛṣṇa karmehāmutra siddhidam |
kriyātapojapadhyānasamuccayamayaṃ param

अथ वक्ष्यामि शैवानामिहैव फलदं नृणाम् ।
पूजाहोमजपध्यानतपोदानमयं महत्

atha vakṣyāmi śaivānāmihaiva phaladaṃ nṛṇām |
pūjāhomajapadhyānatapodānamayaṃ mahat

तत्र संसाधयेत्पूर्वं मन्त्रं मन्त्रार्थवित्तमः ।
दृष्टसिद्धिकरं कर्म नान्यथा फलदं यतः

tatra saṃsādhayetpūrvaṃ mantraṃ mantrārthavittamaḥ |
dṛṣṭasiddhikaraṃ karma nānyathā phaladaṃ yataḥ

सिद्धमन्त्रो ऽप्यदृष्टेन प्रबलेन तु केनचित् ।
प्रतिबन्धफलं कर्म न कुर्यात्सहसा बुधः

siddhamantro 'pyadṛṣṭena prabalena tu kenacit |
pratibandhaphalaṃ karma na kuryātsahasā budhaḥ

तस्य तु प्रतिबन्धस्य कर्तुं शक्येह निष्कृतिः ।
परीक्ष्य शकुनाद्यैस्तदादौ निष्कृतिमाचरेत्

tasya tu pratibandhasya kartuṃ śakyeha niṣkṛtiḥ |
parīkṣya śakunādyaistadādau niṣkṛtimācaret

यो ऽन्यथा कुरुते मोहात्कर्मैहिकफलं नरः ।
न तेन फलभाक्स स्यात्प्राप्नुयाच्चोपहास्यताम्

yo 'nyathā kurute mohātkarmaihikaphalaṃ naraḥ |
na tena phalabhāksa syātprāpnuyāccopahāsyatām

अबिस्रब्धो न कुर्वीत कर्म दृष्टफलं क्वचित् ।
स खल्वश्रद्धधानः स्यान्नाश्रद्धः फलमृच्छति

abisrabdho na kurvīta karma dṛṣṭaphalaṃ kvacit |
sa khalvaśraddhadhānaḥ syānnāśraddhaḥ phalamṛcchati

नापराधोस्ति देवस्य कर्मण्यपि तु निष्फले ।
यथोक्तकारिणां पुंसामिहैव फलदर्शनात्

nāparādhosti devasya karmaṇyapi tu niṣphale |
yathoktakāriṇāṃ puṃsāmihaiva phaladarśanāt

साधकः सिद्धमंत्रश्च निरस्तप्रतिबंधकः ।
विश्वस्तः श्रद्धधानश्च कुर्वन्नाप्नोति तत्फलम्

sādhakaḥ siddhamaṃtraśca nirastapratibaṃdhakaḥ |
viśvastaḥ śraddhadhānaśca kurvannāpnoti tatphalam

अथवा तत्फलावाप्त्यै ब्रह्मचर्यरतो भवेत् ।
रात्रौ हविष्यमश्नीयात्पायसं वा फलानि वा

athavā tatphalāvāptyai brahmacaryarato bhavet |
rātrau haviṣyamaśnīyātpāyasaṃ vā phalāni vā

हिंसादि यन्निषिद्धं स्यान्न कुर्यान्मनसापि तत् ।
सदा भस्मानुलिप्तां गस्सुवेषश्च शुचिर्भवेत्

hiṃsādi yanniṣiddhaṃ syānna kuryānmanasāpi tat |
sadā bhasmānuliptāṃ gassuveṣaśca śucirbhavet

इत्थमाचारवान्भूत्वा स्वानुकूले शुभे ऽहनि ।
पूर्वोक्तलक्षणे देशे पुष्पदामाद्यलंकृते

itthamācāravānbhūtvā svānukūle śubhe 'hani |
pūrvoktalakṣaṇe deśe puṣpadāmādyalaṃkṛte

आलिप्य शकृता भूमिं हस्तमानावरां यथा ।
विलिखेत्कमले भद्रे दीप्यमानं स्वतेजसा

ālipya śakṛtā bhūmiṃ hastamānāvarāṃ yathā |
vilikhetkamale bhadre dīpyamānaṃ svatejasā

तप्तजांबूनदमयमष्टपत्रं सकेसरम् ।
मध्ये कर्णिकया युक्तं सर्वरत्नैरलंकृतम्

taptajāṃbūnadamayamaṣṭapatraṃ sakesaram |
madhye karṇikayā yuktaṃ sarvaratnairalaṃkṛtam

स्वाकारसदृशेनैव नालेन च समन्वितम् ।
तादृशे स्वर्णनिर्माणे कंदे सम्यग्विधानतः

svākārasadṛśenaiva nālena ca samanvitam |
tādṛśe svarṇanirmāṇe kaṃde samyagvidhānataḥ

तत्राणिमादिकं सर्वं संकल्प्य मनसा पुनः ।
रत्नजं वाथ सौवर्णं स्फटिकं वा सलक्षणम् ।
लिङ्गं सवेदिकं चैव स्थापयित्वा विधानतः

tatrāṇimādikaṃ sarvaṃ saṃkalpya manasā punaḥ |
ratnajaṃ vātha sauvarṇaṃ sphaṭikaṃ vā salakṣaṇam |
liṅgaṃ savedikaṃ caiva sthāpayitvā vidhānataḥ

तत्रावाह्य यजेद्देवं सांबं सगणमव्ययम् ।
तत्र माहेश्वरी कल्प्या मूर्तिर्मूर्तिमतः प्रभोः

tatrāvāhya yajeddevaṃ sāṃbaṃ sagaṇamavyayam |
tatra māheśvarī kalpyā mūrtirmūrtimataḥ prabhoḥ

चतुर्भुजा चतुर्वक्त्रा सर्वाभरणभूषिता ।
शार्दूलचर्मवसना किंचिद्विहसितानना

caturbhujā caturvaktrā sarvābharaṇabhūṣitā |
śārdūlacarmavasanā kiṃcidvihasitānanā

वरदाभयहस्ता च मृगटंकधरा तथा ।
अथ वाष्टभुजा चिंत्या चिंतकस्य यथारुचि

varadābhayahastā ca mṛgaṭaṃkadharā tathā |
atha vāṣṭabhujā ciṃtyā ciṃtakasya yathāruci

तदा त्रिशूलपरशुखड्गवज्राणि दक्षिणे ।
वामे पाशांकुशौ तद्वत्खेटं नागं च बिभ्रती

tadā triśūlaparaśukhaḍgavajrāṇi dakṣiṇe |
vāme pāśāṃkuśau tadvatkheṭaṃ nāgaṃ ca bibhratī

बालार्कसदृशप्रख्या प्रतिवक्त्रं त्रिलोचना ।
तस्याः पूर्वमुखं सौम्यं स्वाकारसदृशप्रभम्

bālārkasadṛśaprakhyā prativaktraṃ trilocanā |
tasyāḥ pūrvamukhaṃ saumyaṃ svākārasadṛśaprabham

दक्षिणं नीलजीमूतसदृशं घोरदर्शनम् ।
उत्तरं विद्रुमप्रख्यं नीलालकविभूषितम्

dakṣiṇaṃ nīlajīmūtasadṛśaṃ ghoradarśanam |
uttaraṃ vidrumaprakhyaṃ nīlālakavibhūṣitam

पश्चिमं पूर्णचंद्राभं सौम्यमिंदुकलाधरम् ।
तदंकमंडलारूढा शक्तिर्माहेश्वरी परा

paścimaṃ pūrṇacaṃdrābhaṃ saumyamiṃdukalādharam |
tadaṃkamaṃḍalārūḍhā śaktirmāheśvarī parā

महालक्ष्मीरिति ख्याता श्यामा सर्वमनोहरा ।
मूर्तिं कृत्वैवमाकारां सकलीकृत्य च क्रमात्

mahālakṣmīriti khyātā śyāmā sarvamanoharā |
mūrtiṃ kṛtvaivamākārāṃ sakalīkṛtya ca kramāt

मूर्तिमंतमथावाह्य यजेत्परमकारणम् ।
स्नानार्थे कल्पयेत्तत्र पञ्चगव्यं तु कापिलम्

mūrtimaṃtamathāvāhya yajetparamakāraṇam |
snānārthe kalpayettatra pañcagavyaṃ tu kāpilam

पञ्चामृतं च पूर्णानि बीजानि च विशेषतः ।
पुरस्तान्मण्डलं कृत्वा रत्नचूर्णाद्यलंकृतम्

pañcāmṛtaṃ ca pūrṇāni bījāni ca viśeṣataḥ |
purastānmaṇḍalaṃ kṛtvā ratnacūrṇādyalaṃkṛtam

कर्णिकायां प्रविन्यस्येदीशानकलशं पुनः ।
सद्यादिकलशान्पश्चात्परितस्तस्य कल्पयेत्

karṇikāyāṃ pravinyasyedīśānakalaśaṃ punaḥ |
sadyādikalaśānpaścātparitastasya kalpayet

ततो विद्येशकलशानष्टौ पूर्वादिवत्क्रमात् ।
तीर्थाम्बुपूरितान्कृत्वा सूत्रेणावेष्ट्य पूर्ववत्

tato vidyeśakalaśānaṣṭau pūrvādivatkramāt |
tīrthāmbupūritānkṛtvā sūtreṇāveṣṭya pūrvavat

पुण्यद्रव्याणि निक्षिप्य समन्त्रं सविधानकम् ।
दुकूलाद्येन वस्त्रेण समाच्छाद्य समंततः

puṇyadravyāṇi nikṣipya samantraṃ savidhānakam |
dukūlādyena vastreṇa samācchādya samaṃtataḥ

सर्वत्र मंत्रं विन्यस्य तत्तन्मंत्रपुरस्सरम् ।
स्नानकाले तु संप्राप्ते सर्वमङ्गलनिस्वनैः

sarvatra maṃtraṃ vinyasya tattanmaṃtrapurassaram |
snānakāle tu saṃprāpte sarvamaṅgalanisvanaiḥ

पञ्चगव्यादिभिश्चैव स्नापयेत्परमेश्वरम् ।
ततः कुशोदकाद्यानि स्वर्णरत्नोदकान्यपि

pañcagavyādibhiścaiva snāpayetparameśvaram |
tataḥ kuśodakādyāni svarṇaratnodakānyapi

गंधपुष्पादिसिद्धानि मन्त्रसिद्धानि च क्रमात् ।
उद्धृत्योद्धृत्य मन्त्रेण तैस्तैस्स्नाप्य महेश्वरम्

gaṃdhapuṣpādisiddhāni mantrasiddhāni ca kramāt |
uddhṛtyoddhṛtya mantreṇa taistaissnāpya maheśvaram

गंधं पुष्पादिदीपांश्च पूजाकर्म समाचरेत् ।
पलावरः स्यादालेप एकादशपलोत्तरः

gaṃdhaṃ puṣpādidīpāṃśca pūjākarma samācaret |
palāvaraḥ syādālepa ekādaśapalottaraḥ

सुवर्णरत्नपुष्पाणि शुभानि सुरभीणि च ।
नीलोत्पलाद्युत्पलानि बिल्वपत्राण्यनेकशः

suvarṇaratnapuṣpāṇi śubhāni surabhīṇi ca |
nīlotpalādyutpalāni bilvapatrāṇyanekaśaḥ

कमलानि च रक्तानि श्वेतान्यपि च शंभवे ।
कृष्णागुरूद्भवो धूपः सकर्पूराज्यगुग्गुलः

kamalāni ca raktāni śvetānyapi ca śaṃbhave |
kṛṣṇāgurūdbhavo dhūpaḥ sakarpūrājyaguggulaḥ

कपिलाघृतसंसिद्धा दीपाः कर्पूरवर्तिजाः ।
पञ्चब्रह्मषडंगानि पूज्यान्यावरणानि च

kapilāghṛtasaṃsiddhā dīpāḥ karpūravartijāḥ |
pañcabrahmaṣaḍaṃgāni pūjyānyāvaraṇāni ca

नैवेद्यः पयसा सिद्धः स गुडाज्यो महाचरुः ।
पाटलोत्पलपद्माद्यैः पानीयं च सुगन्धितम्

naivedyaḥ payasā siddhaḥ sa guḍājyo mahācaruḥ |
pāṭalotpalapadmādyaiḥ pānīyaṃ ca sugandhitam

पञ्चसौगंधिकोपेतं तांबूलं च सुसंस्कृतम् ।
सुवर्णरत्नसिद्धानि भूषणानि विशेषतः

pañcasaugaṃdhikopetaṃ tāṃbūlaṃ ca susaṃskṛtam |
suvarṇaratnasiddhāni bhūṣaṇāni viśeṣataḥ

वासांसि च विचित्राणि सूक्ष्माणि च नवानि च ।
दर्शनीयानि देयानि गानवाद्यादिभिस्सह

vāsāṃsi ca vicitrāṇi sūkṣmāṇi ca navāni ca |
darśanīyāni deyāni gānavādyādibhissaha

जपश्च मूलमंत्रस्य लक्षः परमसंख्यया ।
एकावरा त्र्युत्तरा च पूजा फलवशादिह

japaśca mūlamaṃtrasya lakṣaḥ paramasaṃkhyayā |
ekāvarā tryuttarā ca pūjā phalavaśādiha

दशसंख्यावरो होमः प्रतिद्रव्यं शतोत्तरः ।
घोररूपश्शिवश्चिंत्यो मारणोच्चाटनादिषु

daśasaṃkhyāvaro homaḥ pratidravyaṃ śatottaraḥ |
ghorarūpaśśivaściṃtyo māraṇoccāṭanādiṣu

शिवलिंगे शिवाग्नौ च ह्यन्यासु प्रतिमासु च ।
चिंत्यस्सौम्यतनुश्शंभुः कार्ये शांतिकपौष्टिके

śivaliṃge śivāgnau ca hyanyāsu pratimāsu ca |
ciṃtyassaumyatanuśśaṃbhuḥ kārye śāṃtikapauṣṭike

आयसौ स्रुक्स्रुवौ कार्यौ मारणादिषु कर्मसु ।
तदन्यत्र तु सौवर्णौ शांतिकाद्येषु कृत्स्नशः

āyasau sruksruvau kāryau māraṇādiṣu karmasu |
tadanyatra tu sauvarṇau śāṃtikādyeṣu kṛtsnaśaḥ

दूर्वया घृतगोक्षीरमिश्रया मधुना तथा ।
चरुणा सघृतेनैव केवलं पयसापि वा

dūrvayā ghṛtagokṣīramiśrayā madhunā tathā |
caruṇā saghṛtenaiva kevalaṃ payasāpi vā

जुहुयान्मृत्युविजये तिलै रोगोपशांतये ।
घृतेन पयसा चैव कमलैर्वाथ केवलैः

juhuyānmṛtyuvijaye tilai rogopaśāṃtaye |
ghṛtena payasā caiva kamalairvātha kevalaiḥ

समृद्धिकामो जुहुयान्महादारिद्र्यशांतये ।
जातीपुष्पेण वश्यार्थी जुहुयात्सघृतेन तु

samṛddhikāmo juhuyānmahādāridryaśāṃtaye |
jātīpuṣpeṇa vaśyārthī juhuyātsaghṛtena tu

घृतेन करवीरैश्च कुर्यादाकर्षणं द्विजः ।
तैलेनोच्चाटनं कुर्यात्स्तंभनं मधुना पुनः

ghṛtena karavīraiśca kuryādākarṣaṇaṃ dvijaḥ |
tailenoccāṭanaṃ kuryātstaṃbhanaṃ madhunā punaḥ

स्तंभनं सर्षपेणापि लशुनेन तु पातनम् ।
ताडनं रुधिरेण स्यात्खरस्योष्ट्रस्य चोभयोः

staṃbhanaṃ sarṣapeṇāpi laśunena tu pātanam |
tāḍanaṃ rudhireṇa syātkharasyoṣṭrasya cobhayoḥ

मारणोच्चाटने कुर्याद्रोहिबीजैस्तिलान्वितैः ।
विद्वेषणं च तैलेन कुर्याल्लांगलकस्य तु

māraṇoccāṭane kuryādrohibījaistilānvitaiḥ |
vidveṣaṇaṃ ca tailena kuryāllāṃgalakasya tu

बंधनं रोहिबीजेन सेनास्तंभनमेव च ।
रक्तसर्षपसंमिश्रैर्होमद्रव्यैरशेषतः

baṃdhanaṃ rohibījena senāstaṃbhanameva ca |
raktasarṣapasaṃmiśrairhomadravyairaśeṣataḥ

हस्तयंत्रोद्भवैस्तैलैर्जुहुयादाभिचारिके ।
कटुकीतुषसंयुक्तैः कार्पासास्थिभिरेव च

hastayaṃtrodbhavaistailairjuhuyādābhicārike |
kaṭukītuṣasaṃyuktaiḥ kārpāsāsthibhireva ca

सर्षपैस्तैलसंमिश्रैर्जुहुयादाभिचारिके ।
ज्वरोपशांतिदं क्षीरं सौभाग्यफलदं तथा

sarṣapaistailasaṃmiśrairjuhuyādābhicārike |
jvaropaśāṃtidaṃ kṣīraṃ saubhāgyaphaladaṃ tathā

सर्वसिद्धिकरो होमः क्षौद्राज्यदधिभिर्युतैः ।
क्षीरेण तंदुलैश्चैव चरुणा केवलेन वा

sarvasiddhikaro homaḥ kṣaudrājyadadhibhiryutaiḥ |
kṣīreṇa taṃdulaiścaiva caruṇā kevalena vā

शांतिकं पौष्टिकं वापि सप्तभिः समिदादिभिः ।
द्रव्यैर्विशेषतो होमे वश्यमाकर्षणं तथा

śāṃtikaṃ pauṣṭikaṃ vāpi saptabhiḥ samidādibhiḥ |
dravyairviśeṣato home vaśyamākarṣaṇaṃ tathā

वश्यमाकर्षणं चैव श्रीपदं च विशेषतः ।
बिल्वपत्रैस्तु हवनं शत्रोर्विजयदं तथा

vaśyamākarṣaṇaṃ caiva śrīpadaṃ ca viśeṣataḥ |
bilvapatraistu havanaṃ śatrorvijayadaṃ tathā

समिधः शांतिकार्येषु पालाशखदिरादिकाः ।
करवीरार्कजाः क्रौर्ये कण्टकिन्यश्च विग्रहे

samidhaḥ śāṃtikāryeṣu pālāśakhadirādikāḥ |
karavīrārkajāḥ kraurye kaṇṭakinyaśca vigrahe

प्रशांतः शांतिकं कुर्यात्पौष्टिकं च विशेषतः ।
निर्घृणः क्रुद्धचित्तस्तु प्रकुर्यादाभिचारिकम्

praśāṃtaḥ śāṃtikaṃ kuryātpauṣṭikaṃ ca viśeṣataḥ |
nirghṛṇaḥ kruddhacittastu prakuryādābhicārikam

अतीवदुरवस्थायां प्रतीकारांतरं न चेत् ।
आततायिनमुद्दिश्य प्रकुर्यादाभिचारिकम्

atīvaduravasthāyāṃ pratīkārāṃtaraṃ na cet |
ātatāyinamuddiśya prakuryādābhicārikam

स्वराष्ट्रपतिमुद्दिश्य न कुर्यादाभिचारिकम् ।
यद्यास्तिकस्सुधर्मिष्ठो मान्यो वा यो ऽपि कोपि वा

svarāṣṭrapatimuddiśya na kuryādābhicārikam |
yadyāstikassudharmiṣṭho mānyo vā yo 'pi kopi vā

तमुद्दिश्यापि नो कुर्यादाततायिनमप्युत ।
मनसा कर्मणा वाचा यो ऽपि कोपि शिवाश्रितः

tamuddiśyāpi no kuryādātatāyinamapyuta |
manasā karmaṇā vācā yo 'pi kopi śivāśritaḥ

स्वराष्ट्रपतिमुद्दिश्य शिवा श्रितमथापि वा ।
कृत्वाभिचारिकं कर्म सद्यो विनिपतेन्नरः

svarāṣṭrapatimuddiśya śivā śritamathāpi vā |
kṛtvābhicārikaṃ karma sadyo vinipatennaraḥ

स्वराष्ट्रपालकं तस्माच्छिवभक्तं च कञ्चन ।
न हिंस्यादभिचाराद्यैर्यदीच्छेत्सुखमात्मनः

svarāṣṭrapālakaṃ tasmācchivabhaktaṃ ca kañcana |
na hiṃsyādabhicārādyairyadīcchetsukhamātmanaḥ

अन्यं कमपि चोद्दिश्य कृत्वा वै मारणादिकम् ।
पश्चात्तापेन संयुक्तः प्रायश्चित्तं समाचरेत्

anyaṃ kamapi coddiśya kṛtvā vai māraṇādikam |
paścāttāpena saṃyuktaḥ prāyaścittaṃ samācaret

बाणलिंगे ऽपि वा कुर्यान्निर्धनो धनवानपि ।
स्वयंभूते ऽथ वा लिंगे आर्षके वैदिके ऽपि वा

bāṇaliṃge 'pi vā kuryānnirdhano dhanavānapi |
svayaṃbhūte 'tha vā liṃge ārṣake vaidike 'pi vā

अभावे हेमरत्नानामशक्तौ च तदर्जने ।
मनसैवाचरेदेतद्द्रव्यैर्वा प्रतिरूपकैः

abhāve hemaratnānāmaśaktau ca tadarjane |
manasaivācaredetaddravyairvā pratirūpakaiḥ

क्वचिदंशे तु यः शक्तस्त्वशक्तः क्वचिदंशके ।
सो ऽपि शक्त्यनुसारेण कुर्वंश्चेत्फलमृच्छति

kvacidaṃśe tu yaḥ śaktastvaśaktaḥ kvacidaṃśake |
so 'pi śaktyanusāreṇa kurvaṃścetphalamṛcchati

कर्मण्यनुष्ठिते ऽप्यस्मिन्फलं यत्र न दृश्यते ।
द्विस्त्रिर्वावर्तयेत्तत्र सर्वथा दृश्यते फलम्

karmaṇyanuṣṭhite 'pyasminphalaṃ yatra na dṛśyate |
dvistrirvāvartayettatra sarvathā dṛśyate phalam

पूजोपयुक्तं यद्द्रव्यं हेमरत्नाद्यनुत्तमम् ।
तत्सर्वं गुरवे दद्याद्दक्षिणां च ततः पृथक्

pūjopayuktaṃ yaddravyaṃ hemaratnādyanuttamam |
tatsarvaṃ gurave dadyāddakṣiṇāṃ ca tataḥ pṛthak

स चेन्नेच्छति तत्सर्वं शिवाय विनिवेदयेत् ।
अथवा शिवभक्तेभ्यो नान्येभ्यस्तु प्रदीयते

sa cennecchati tatsarvaṃ śivāya vinivedayet |
athavā śivabhaktebhyo nānyebhyastu pradīyate

यः स्वयं साधयेच्छक्त्या गुर्वादिनिरपेक्षया ।
सो ऽप्येवमाचरेदत्र न गृह्णीयात्स्वयं पुनः

yaḥ svayaṃ sādhayecchaktyā gurvādinirapekṣayā |
so 'pyevamācaredatra na gṛhṇīyātsvayaṃ punaḥ

स्वयं गृह्णाति यो लोभात्पूजांगद्रव्यमुत्तमम् ।
कांक्षितं न लभेन्मूढो नात्र कार्या विचारणा

svayaṃ gṛhṇāti yo lobhātpūjāṃgadravyamuttamam |
kāṃkṣitaṃ na labhenmūḍho nātra kāryā vicāraṇā

अर्चितं यत्तु तल्लिंगं गृह्णीयाद्वा नवा स्वयम् ।
गृह्णीयाद्यदि तन्नित्यं स्वयं वान्यो ऽपि वार्चयेत्

arcitaṃ yattu talliṃgaṃ gṛhṇīyādvā navā svayam |
gṛhṇīyādyadi tannityaṃ svayaṃ vānyo 'pi vārcayet

यथोक्तमेव कर्मैतदाचरेद्यो ऽनपायतः ।
फलं व्यभिचरेन्नैवमित्यतः किं प्ररोचकम्

yathoktameva karmaitadācaredyo 'napāyataḥ |
phalaṃ vyabhicarennaivamityataḥ kiṃ prarocakam

तथाप्युद्देशतो वक्ष्ये कर्मणः सिद्धिमुत्तमम् ।
अपि शत्रुभिराक्रांतो व्याधिभिर्वाप्यनेकशः

tathāpyuddeśato vakṣye karmaṇaḥ siddhimuttamam |
api śatrubhirākrāṃto vyādhibhirvāpyanekaśaḥ

मृत्योरास्यगतश्चापि मुच्यते निरपायतः ।
पूजायते ऽतिकृपणो रिक्तो वैश्रवणायते

mṛtyorāsyagataścāpi mucyate nirapāyataḥ |
pūjāyate 'tikṛpaṇo rikto vaiśravaṇāyate

कामायते विरूपो ऽपि वृद्धो ऽपि तरुणायते ।
शत्रुर्मित्रायते सद्यो विरोधी किंकरायते

kāmāyate virūpo 'pi vṛddho 'pi taruṇāyate |
śatrurmitrāyate sadyo virodhī kiṃkarāyate

विषायते यदमृतं विषमप्यमृतायते ।
स्थलायते समुद्रो ऽपि स्थलमप्यर्णवायते

viṣāyate yadamṛtaṃ viṣamapyamṛtāyate |
sthalāyate samudro 'pi sthalamapyarṇavāyate

महीधरायते श्वभ्रं स च श्वभ्रायते गिरिः ।
पद्माकरायते वह्निः सरो वैश्वानरायते

mahīdharāyate śvabhraṃ sa ca śvabhrāyate giriḥ |
padmākarāyate vahniḥ saro vaiśvānarāyate

वनायते यदुद्यानं तदुद्यानायते वनम् ।
सिंहायते मृगः क्षुद्रः सिंहः क्रीडामृगायते

vanāyate yadudyānaṃ tadudyānāyate vanam |
siṃhāyate mṛgaḥ kṣudraḥ siṃhaḥ krīḍāmṛgāyate

स्त्रियो ऽभिसारिकायन्ते लक्ष्मीः सुचरितायते ।
स्वैरप्रेष्यायते वाणी कीर्तिस्तु गणिकायते

striyo 'bhisārikāyante lakṣmīḥ sucaritāyate |
svairapreṣyāyate vāṇī kīrtistu gaṇikāyate

स्वैराचारायते मेधा वज्रसूचीयते मनः ।
महावातायते शक्तिर्बलं मत्तगजायते

svairācārāyate medhā vajrasūcīyate manaḥ |
mahāvātāyate śaktirbalaṃ mattagajāyate

स्तम्भायते समुद्योगैः शत्रुपक्षे स्थिता क्रिया ।
शत्रुपक्षायते ऽरीणां सर्व एव सुहृज्जनः

stambhāyate samudyogaiḥ śatrupakṣe sthitā kriyā |
śatrupakṣāyate 'rīṇāṃ sarva eva suhṛjjanaḥ

शत्रवः कुणपायन्ते जीवन्तोपि सबांधवाः ।
आपन्नो ऽपि गतारिष्टः स्वयं खल्वमृतायते

śatravaḥ kuṇapāyante jīvantopi sabāṃdhavāḥ |
āpanno 'pi gatāriṣṭaḥ svayaṃ khalvamṛtāyate

रसाय नायते नित्यमपथ्यमपि सेवितम् ।
अनिशं क्रियमाणापि रतिस्त्वभिनवायते

rasāya nāyate nityamapathyamapi sevitam |
aniśaṃ kriyamāṇāpi ratistvabhinavāyate

अनागतादिकं सर्वं करस्थामलकायते ।
यादृच्छिकफलायन्ते सिद्धयो ऽप्यणिमादयः

anāgatādikaṃ sarvaṃ karasthāmalakāyate |
yādṛcchikaphalāyante siddhayo 'pyaṇimādayaḥ

बहुनात्र किमुक्तेन सर्वकामार्थसिद्धिषु ।
अस्मिन्कर्मणि निर्वृत्ते त्वनवाप्यं न विद्यते

bahunātra kimuktena sarvakāmārthasiddhiṣu |
asminkarmaṇi nirvṛtte tvanavāpyaṃ na vidyate