अध्याय 33: सुगन्धमय लिंग का महाव्रत

अतः परं प्रवक्ष्यामि केवलामुष्मिकं विधिम् ।
नैतेन सदृशं किंचित्कर्मास्ति भुवनत्रये

ataḥ paraṃ pravakṣyāmi kevalāmuṣmikaṃ vidhim |
naitena sadṛśaṃ kiṃcitkarmāsti bhuvanatraye

पुण्यातिशयसंयुक्तः सर्वैर्देवैरनुष्ठितः ।
ब्रह्मणा विष्णुना चैव रुद्रेण च विशेषतः

puṇyātiśayasaṃyuktaḥ sarvairdevairanuṣṭhitaḥ |
brahmaṇā viṣṇunā caiva rudreṇa ca viśeṣataḥ

इंद्रादिलोकपारैश्च सूर्याद्यैर्नवभिर्ग्रहैः ।
विश्वामित्रवसिष्ठाद्यैर्ब्रह्मविद्भिर्महर्षिभिः

iṃdrādilokapāraiśca sūryādyairnavabhirgrahaiḥ |
viśvāmitravasiṣṭhādyairbrahmavidbhirmaharṣibhiḥ

श्वेतागस्त्यदधीचाद्यैरस्माभिश्च शिवाश्रितैः ।
नंदीश्वरमहाकालभृंगीशाद्यैर्गणेश्वरैः

śvetāgastyadadhīcādyairasmābhiśca śivāśritaiḥ |
naṃdīśvaramahākālabhṛṃgīśādyairgaṇeśvaraiḥ

पातालवासिभिर्दैत्यैः शेषाद्यैश्च महोरगैः ।
सिद्धैर्यक्षैश्च गंधर्वै रक्षोभूतपिशाचकैः

pātālavāsibhirdaityaiḥ śeṣādyaiśca mahoragaiḥ |
siddhairyakṣaiśca gaṃdharvai rakṣobhūtapiśācakaiḥ

स्वंस्वं पदमनुप्राप्तं सर्वैरयमनुष्ठितः ।
अनेन विधिना सर्वे देवा देवत्वमागताः

svaṃsvaṃ padamanuprāptaṃ sarvairayamanuṣṭhitaḥ |
anena vidhinā sarve devā devatvamāgatāḥ

ब्रह्मा ब्रह्मत्वमापन्नो विष्णुर्विष्णुत्वमागतः ।
रुद्रो रुद्रत्वमापन्न इंद्रश्चेन्द्रत्वमागतः

brahmā brahmatvamāpanno viṣṇurviṣṇutvamāgataḥ |
rudro rudratvamāpanna iṃdraścendratvamāgataḥ

गणेशश्च गणेशत्वमनेन विधिना गतः ।
सितचंदनतोयेन लिंगं स्नाप्य शिवं शिवाम् ।
श्वेतैर्विकसितैः पद्मैः संपूज्य प्रणिपत्य च

gaṇeśaśca gaṇeśatvamanena vidhinā gataḥ |
sitacaṃdanatoyena liṃgaṃ snāpya śivaṃ śivām |
śvetairvikasitaiḥ padmaiḥ saṃpūjya praṇipatya ca

तत्र पद्मासनं रम्यं कृत्वा लक्षणसंयुतम् ।
विभवे सति हेमाद्यै रत्नाद्यैर्वा स्वशक्तितः

tatra padmāsanaṃ ramyaṃ kṛtvā lakṣaṇasaṃyutam |
vibhave sati hemādyai ratnādyairvā svaśaktitaḥ

मध्ये केसरजालास्य स्थाप्य लिंगं कनीयसम् ।
अंगुष्ठप्रतिमं रम्यं सर्वगन्धमयं शुभम्

madhye kesarajālāsya sthāpya liṃgaṃ kanīyasam |
aṃguṣṭhapratimaṃ ramyaṃ sarvagandhamayaṃ śubham

दक्षिणे स्थापयित्वा तु बिल्वपत्रैः समर्चयेत् ।
अगुरुं दक्षिणे पार्श्वे पश्चिमे तु मनःशिलाम्

dakṣiṇe sthāpayitvā tu bilvapatraiḥ samarcayet |
aguruṃ dakṣiṇe pārśve paścime tu manaḥśilām

उत्तरे चंदनं दद्याद्धरितालं तु पूर्वतः ।
सुगन्धैः कुसुमै रम्यैर्विचित्रैश्चापि पूजयेत्

uttare caṃdanaṃ dadyāddharitālaṃ tu pūrvataḥ |
sugandhaiḥ kusumai ramyairvicitraiścāpi pūjayet

धूपं कृष्णागुरुं दद्यात्सर्वतश्च सगुग्गुलम् ।
वासांसि चातिसूक्ष्माणि विकाशानि निवेदयेत्

dhūpaṃ kṛṣṇāguruṃ dadyātsarvataśca saguggulam |
vāsāṃsi cātisūkṣmāṇi vikāśāni nivedayet

पायसं घृतसंमिश्रं घृतदीपांश्च दापयेत् ।
सर्वं निवेद्य मन्त्रेण ततो गच्छेत्प्रदक्षिणाम्

pāyasaṃ ghṛtasaṃmiśraṃ ghṛtadīpāṃśca dāpayet |
sarvaṃ nivedya mantreṇa tato gacchetpradakṣiṇām

प्रणम्य भक्त्या देवेशं स्तुत्वा चान्ते क्षमापयेत् ।
सर्वोपहारसंमिश्रं ततो लिंगं निवेदयेत्

praṇamya bhaktyā deveśaṃ stutvā cānte kṣamāpayet |
sarvopahārasaṃmiśraṃ tato liṃgaṃ nivedayet

शिवाय शिवमन्त्रेण दक्षिणामूर्तिमाश्रितः ।
एवं यो ऽर्चयते नित्यं पञ्चगन्धमयं शुभम्

śivāya śivamantreṇa dakṣiṇāmūrtimāśritaḥ |
evaṃ yo 'rcayate nityaṃ pañcagandhamayaṃ śubham

सर्वपापविनिर्मुक्तः शिवलोके महीयते ।
एतद्व्रतोत्तमं गुह्यं शिवलिंगमहाव्रतम्

sarvapāpavinirmuktaḥ śivaloke mahīyate |
etadvratottamaṃ guhyaṃ śivaliṃgamahāvratam

भक्तस्य ते समाख्यातं न देयं यस्य कस्यचित् ।
देयं च शिवभक्तेभ्यः शिवेन कथितं पुरा

bhaktasya te samākhyātaṃ na deyaṃ yasya kasyacit |
deyaṃ ca śivabhaktebhyaḥ śivena kathitaṃ purā