सूक्त 69: दो राजाओं द्वारा धारित तीन लोक

त्री रो॑च॒ना व॑रुण॒ त्रीँरु॒त द्यून्त्रीणि॑ मित्र धारयथो॒ रजां॑सि ।
वा॒वृ॒धा॒नाव॒मतिं॑ क्ष॒त्रिय॒स्यानु॑ व्र॒तं रक्ष॑माणावजु॒र्यम्

trī rocanā varuṇa trīm̐ruta dyūntrīṇi mitra dhārayatho rajāṃsi |
vāvṛdhānāvamatiṃ kṣatriyasyānu vrataṃ rakṣamāṇāvajuryam

इरा॑वतीर्वरुण धे॒नवो॑ वां॒ मधु॑मद्वां॒ सिन्ध॑वो मित्र दुह्रे ।
त्रय॑स्तस्थुर्वृष॒भास॑स्तिसृ॒णां धि॒षणा॑नां रेतो॒धा वि द्यु॒मन्त॑ः

irāvatīrvaruṇa dhenavo vāṃ madhumadvāṃ sindhavo mitra duhre |
trayastasthurvṛṣabhāsastisṛṇāṃ dhiṣaṇānāṃ retodhā vi dyumantaḥ

प्रा॒तर्दे॒वीमदि॑तिं जोहवीमि म॒ध्यंदि॑न॒ उदि॑ता॒ सूर्य॑स्य ।
रा॒ये मि॑त्रावरुणा स॒र्वता॒तेळे॑ तो॒काय॒ तन॑याय॒ शं योः

prātardevīmaditiṃ johavīmi madhyaṃdina uditā sūryasya |
rāye mitrāvaruṇā sarvatāteḻe tokāya tanayāya śaṃ yoḥ

या ध॒र्तारा॒ रज॑सो रोच॒नस्यो॒तादि॒त्या दि॒व्या पार्थि॑वस्य ।
न वां॑ दे॒वा अ॒मृता॒ आ मि॑नन्ति व्र॒तानि॑ मित्रावरुणा ध्रु॒वाणि॑

yā dhartārā rajaso rocanasyotādityā divyā pārthivasya |
na vāṃ devā amṛtā ā minanti vratāni mitrāvaruṇā dhruvāṇi