सूक्त 72: देवों का जन्म

दे॒वानां॒ नु व॒यं जाना॒ प्र वो॑चाम विप॒न्यया॑ ।
उ॒क्थेषु॑ श॒स्यमा॑नेषु॒ यः पश्या॒दुत्त॑रे यु॒गे

devānāṃ nu vayaṃ jānā pra vocāma vipanyayā |
uktheṣu śasyamāneṣu yaḥ paśyāduttare yuge

ब्रह्म॑ण॒स्पति॑रे॒ता सं क॒र्मार॑ इवाधमत् ।
दे॒वानां॑ पू॒र्व्ये यु॒गेऽस॑त॒ः सद॑जायत

brahmaṇaspatiretā saṃ karmāra ivādhamat |
devānāṃ pūrvye yuge'sataḥ sadajāyata

दे॒वानां॑ यु॒गे प्र॑थ॒मेऽस॑त॒ः सद॑जायत ।
तदाशा॒ अन्व॑जायन्त॒ तदु॑त्ता॒नप॑द॒स्परि॑

devānāṃ yuge prathame'sataḥ sadajāyata |
tadāśā anvajāyanta taduttānapadaspari

भूर्ज॑ज्ञ उत्ता॒नप॑दो भु॒व आशा॑ अजायन्त ।
अदि॑ते॒र्दक्षो॑ अजायत॒ दक्षा॒द्वदि॑ति॒ः परि॑

bhūrjajña uttānapado bhuva āśā ajāyanta |
aditerdakṣo ajāyata dakṣādvaditiḥ pari

अदि॑ति॒र्ह्यज॑निष्ट॒ दक्ष॒ या दु॑हि॒ता तव॑ ।
तां दे॒वा अन्व॑जायन्त भ॒द्रा अ॒मृत॑बन्धवः

aditirhyajaniṣṭa dakṣa yā duhitā tava |
tāṃ devā anvajāyanta bhadrā amṛtabandhavaḥ

यद्दे॑वा अ॒दः स॑लि॒ले सुसं॑रब्धा॒ अति॑ष्ठत ।
अत्रा॑ वो॒ नृत्य॑तामिव ती॒व्रो रे॒णुरपा॑यत

yaddevā adaḥ salile susaṃrabdhā atiṣṭhata |
atrā vo nṛtyatāmiva tīvro reṇurapāyata

यद्दे॑वा॒ यत॑यो यथा॒ भुव॑ना॒न्यपि॑न्वत ।
अत्रा॑ समु॒द्र आ गू॒ळ्हमा सूर्य॑मजभर्तन

yaddevā yatayo yathā bhuvanānyapinvata |
atrā samudra ā gūḻhamā sūryamajabhartana

अ॒ष्टौ पु॒त्रासो॒ अदि॑ते॒र्ये जा॒तास्त॒न्व१॒॑स्परि॑ ।
दे॒वाँ उप॒ प्रैत्स॒प्तभि॒ः परा॑ मार्ता॒ण्डमा॑स्यत्

aṣṭau putrāso aditerye jātāstanvaspari |
devām̐ upa praitsaptabhiḥ parā mārtāṇḍamāsyat

स॒प्तभि॑ः पु॒त्रैरदि॑ति॒रुप॒ प्रैत्पू॒र्व्यं यु॒गम् ।
प्र॒जायै॑ मृ॒त्यवे॑ त्व॒त्पुन॑र्मार्ता॒ण्डमाभ॑रत्

saptabhiḥ putrairaditirupa praitpūrvyaṃ yugam |
prajāyai mṛtyave tvatpunarmārtāṇḍamābharat