सूक्त 174: राजा की ओर विजय मोड़ने वाली हवि

अ॒भी॒व॒र्तेन॑ ह॒विषा॒ येनेन्द्रो॑ अभिवावृ॒ते ।
तेना॒स्मान्ब्र॑ह्मणस्पते॒ऽभि रा॒ष्ट्राय॑ वर्तय

abhīvartena haviṣā yenendro abhivāvṛte |
tenāsmānbrahmaṇaspate'bhi rāṣṭrāya vartaya

अ॒भि॒वृत्य॑ स॒पत्ना॑न॒भि या नो॒ अरा॑तयः ।
अ॒भि पृ॑त॒न्यन्तं॑ तिष्ठा॒भि यो न॑ इर॒स्यति॑

abhivṛtya sapatnānabhi yā no arātayaḥ |
abhi pṛtanyantaṃ tiṣṭhābhi yo na irasyati

अ॒भि त्वा॑ दे॒वः स॑वि॒ताभि सोमो॑ अवीवृतत् ।
अ॒भि त्वा॒ विश्वा॑ भू॒तान्य॑भीव॒र्तो यथास॑सि

abhi tvā devaḥ savitābhi somo avīvṛtat |
abhi tvā viśvā bhūtānyabhīvarto yathāsasi

येनेन्द्रो॑ ह॒विषा॑ कृ॒त्व्यभ॑वद्द्यु॒म्न्यु॑त्त॒मः ।
इ॒दं तद॑क्रि देवा असप॒त्नः किला॑भुवम्

yenendro haviṣā kṛtvyabhavaddyumnyuttamaḥ |
idaṃ tadakri devā asapatnaḥ kilābhuvam

अ॒स॒प॒त्नः स॑पत्न॒हाभिरा॑ष्ट्रो विषास॒हिः ।
यथा॒हमे॑षां भू॒तानां॑ वि॒राजा॑नि॒ जन॑स्य च

asapatnaḥ sapatnahābhirāṣṭro viṣāsahiḥ |
yathāhameṣāṃ bhūtānāṃ virājāni janasya ca