सूक्त 155: अलक्ष्मी को दूर भगाना

अरा॑यि॒ काणे॒ विक॑टे गि॒रिं ग॑च्छ सदान्वे ।
शि॒रिम्बि॑ठस्य॒ सत्व॑भि॒स्तेभि॑ष्ट्वा चातयामसि

arāyi kāṇe vikaṭe giriṃ gaccha sadānve |
śirimbiṭhasya satvabhistebhiṣṭvā cātayāmasi

च॒त्तो इ॒तश्च॒त्तामुत॒ः सर्वा॑ भ्रू॒णान्या॒रुषी॑ ।
अ॒रा॒य्यं॑ ब्रह्मणस्पते॒ तीक्ष्ण॑शृण्गोदृ॒षन्नि॑हि

catto itaścattāmutaḥ sarvā bhrūṇānyāruṣī |
arāyyaṃ brahmaṇaspate tīkṣṇaśṛṇgodṛṣannihi

अ॒दो यद्दारु॒ प्लव॑ते॒ सिन्धो॑ः पा॒रे अ॑पूरु॒षम् ।
तदा र॑भस्व दुर्हणो॒ तेन॑ गच्छ परस्त॒रम्

ado yaddāru plavate sindhoḥ pāre apūruṣam |
tadā rabhasva durhaṇo tena gaccha parastaram

यद्ध॒ प्राची॒रज॑ग॒न्तोरो॑ मण्डूरधाणिकीः ।
ह॒ता इन्द्र॑स्य॒ शत्र॑व॒ः सर्वे॑ बुद्बु॒दया॑शवः

yaddha prācīrajagantoro maṇḍūradhāṇikīḥ |
hatā indrasya śatravaḥ sarve budbudayāśavaḥ

परी॒मे गाम॑नेषत॒ पर्य॒ग्निम॑हृषत ।
दे॒वेष्व॑क्रत॒ श्रव॒ः क इ॒माँ आ द॑धर्षति

parīme gāmaneṣata paryagnimahṛṣata |
deveṣvakrata śravaḥ ka imām̐ ā dadharṣati