सूक्त 154: दिवंगत आत्मा कहाँ जाए

सोम॒ एके॑भ्यः पवते घृ॒तमेक॒ उपा॑सते ।
येभ्यो॒ मधु॑ प्र॒धाव॑ति॒ ताँश्चि॑दे॒वापि॑ गच्छतात्

soma ekebhyaḥ pavate ghṛtameka upāsate |
yebhyo madhu pradhāvati tām̐ścidevāpi gacchatāt

तप॑सा॒ ये अ॑नाधृ॒ष्यास्तप॑सा॒ ये स्व॑र्य॒युः ।
तपो॒ ये च॑क्रि॒रे मह॒स्ताँश्चि॑दे॒वापि॑ गच्छतात्

tapasā ye anādhṛṣyāstapasā ye svaryayuḥ |
tapo ye cakrire mahastām̐ścidevāpi gacchatāt

ये युध्य॑न्ते प्र॒धने॑षु॒ शूरा॑सो॒ ये त॑नू॒त्यज॑ः ।
ये वा॑ स॒हस्र॑दक्षिणा॒स्ताँश्चि॑दे॒वापि॑ गच्छतात्

ye yudhyante pradhaneṣu śūrāso ye tanūtyajaḥ |
ye vā sahasradakṣiṇāstām̐ścidevāpi gacchatāt

ये चि॒त्पूर्व॑ ऋत॒साप॑ ऋ॒तावा॑न ऋता॒वृध॑ः ।
पि॒तॄन्तप॑स्वतो यम॒ ताँश्चि॑दे॒वापि॑ गच्छतात्

ye citpūrva ṛtasāpa ṛtāvāna ṛtāvṛdhaḥ |
pitṝntapasvato yama tām̐ścidevāpi gacchatāt

स॒हस्र॑णीथाः क॒वयो॒ ये गो॑पा॒यन्ति॒ सूर्य॑म् ।
ऋषी॒न्तप॑स्वतो यम तपो॒जाँ अपि॑ गच्छतात्

sahasraṇīthāḥ kavayo ye gopāyanti sūryam |
ṛṣīntapasvato yama tapojām̐ api gacchatāt