सूक्त 19: अग्नि, मरुतों के साथ आओ

प्रति॒ त्यं चारु॑मध्व॒रं गो॑पी॒थाय॒ प्र हू॑यसे ।
म॒रुद्भि॑रग्न॒ आ ग॑हि

prati tyaṃ cārumadhvaraṃ gopīthāya pra hūyase |
marudbhiragna ā gahi

न॒हि दे॒वो न मर्त्यो॑ म॒हस्तव॒ क्रतुं॑ प॒रः ।
म॒रुद्भि॑रग्न॒ आ ग॑हि

nahi devo na martyo mahastava kratuṃ paraḥ |
marudbhiragna ā gahi

ये म॒हो रज॑सो वि॒दुर्विश्वे॑ दे॒वासो॑ अ॒द्रुह॑ः ।
म॒रुद्भि॑रग्न॒ आ ग॑हि

ye maho rajaso vidurviśve devāso adruhaḥ |
marudbhiragna ā gahi

य उ॒ग्रा अ॒र्कमा॑नृ॒चुरना॑धृष्टास॒ ओज॑सा ।
म॒रुद्भि॑रग्न॒ आ ग॑हि

ya ugrā arkamānṛcuranādhṛṣṭāsa ojasā |
marudbhiragna ā gahi

ये शु॒भ्रा घो॒रव॑र्पसः सुक्ष॒त्रासो॑ रि॒शाद॑सः ।
म॒रुद्भि॑रग्न॒ आ ग॑हि

ye śubhrā ghoravarpasaḥ sukṣatrāso riśādasaḥ |
marudbhiragna ā gahi

ये नाक॒स्याधि॑ रोच॒ने दि॒वि दे॒वास॒ आस॑ते ।
म॒रुद्भि॑रग्न॒ आ ग॑हि

ye nākasyādhi rocane divi devāsa āsate |
marudbhiragna ā gahi

य ई॒ङ्खय॑न्ति॒ पर्व॑तान्ति॒रः स॑मु॒द्रम॑र्ण॒वम् ।
म॒रुद्भि॑रग्न॒ आ ग॑हि

ya īṅkhayanti parvatāntiraḥ samudramarṇavam |
marudbhiragna ā gahi

आ ये त॒न्वन्ति॑ र॒श्मिभि॑स्ति॒रः स॑मु॒द्रमोज॑सा ।
म॒रुद्भि॑रग्न॒ आ ग॑हि

ā ye tanvanti raśmibhistiraḥ samudramojasā |
marudbhiragna ā gahi

अ॒भि त्वा॑ पू॒र्वपी॑तये सृ॒जामि॑ सो॒म्यं मधु॑ ।
म॒रुद्भि॑रग्न॒ आ ग॑हि

abhi tvā pūrvapītaye sṛjāmi somyaṃ madhu |
marudbhiragna ā gahi