अध्याय 62: शिव गरुड़ को काकभुशुण्डि के पास भेजते हैं

मिलहिँ न रघुपति बिनु अनुरागा । किये जोग तप ग्यान बिरागा ॥
उत्तर दिसि सुन्दर गिरि नीला । तहँ रह काकभुसुंडि सुसीला ॥

milahim̐ na raghupati binu anurāgā | kiye joga tapa gyāna birāgā ||
uttara disi sundara giri nīlā | taham̐ raha kākabhusuṃḍi susīlā ||

धीर भगति-पथ परम-प्रबीना । ज्ञानी गुन गृह बहु कालीना ॥
राम कथा सो कहइ निरन्तर । सादर सुनहिँ बिबिध बिहंगबर ॥

dhīra bhagati-patha parama-prabīnā | jñānī guna gṛha bahu kālīnā ||
rāma kathā so kahai nirantara | sādara sunahim̐ bibidha bihaṃgabara ||

जाइ सुनहु तहँ हरि गुन भूरी । होइहि मोह जनित दुख दूरी ॥
मैं जब तेहि सब कहाँ बुझाई । चलेउ हरषि मम पद सिर नाई ॥

jāi sunahu taham̐ hari guna bhūrī | hoihi moha janita dukha dūrī ||
maiṃ jaba tehi saba kahām̐ bujhāī | caleu haraṣi mama pada sira nāī ||

ताते उमा न मैं समुझावा । रघुपति कृपाँ मरमु मैं पावा ॥
होइहि कीन्ह कबहुँ अभिमाना । सो खौवै वह कृपानिधाना ॥

tāte umā na maiṃ samujhāvā | raghupati kṛpām̐ maramu maiṃ pāvā ||
hoihi kīnha kabahum̐ abhimānā | so khauvai vaha kṛpānidhānā ||

कछु तेहि ते पुनि मैं नहिँ राखा । समुझइ खग खगही के भाखा ॥
प्रभु माया बलवन्त भवानी । जाहि न मोह कवन अस ग्यानी ॥

kachu tehi te puni maiṃ nahim̐ rākhā | samujhai khaga khagahī ke bhākhā ||
prabhu māyā balavanta bhavānī | jāhi na moha kavana asa gyānī ||