अध्याय 55: गरुड़ कौए के पास क्यों गए

यह प्रभु चरित पवित्र सुहावा । कहहु कृपाल काग कहँ पावा ॥
तुम्ह केहि भाँति सुना मदनारी । कहहु मोहि अति कौतुक भारी ॥

yaha prabhu carita pavitra suhāvā | kahahu kṛpāla kāga kaham̐ pāvā ||
tumha kehi bhām̐ti sunā madanārī | kahahu mohi ati kautuka bhārī ||

गरुड़ महाग्यानी गुन रासी । हरि सेवक अति निकट निवासी ॥
तेहिं केहि हेतु काग सन जाई । सुनी कथा मुनि निकर बिहाई ॥

garur̤a mahāgyānī guna rāsī | hari sevaka ati nikaṭa nivāsī ||
tehiṃ kehi hetu kāga sana jāī | sunī kathā muni nikara bihāī ||

कहहु कवन बिधि भा सम्बादा । दोउ हरिभगत काग उरगादा ॥
गौरि गिरा सुनि सरल सुहाई । बोले सिव सादर सुख पाई ॥

kahahu kavana bidhi bhā sambādā | dou haribhagata kāga uragādā ||
gauri girā suni sarala suhāī | bole siva sādara sukha pāī ||

धन्य सती पावनि मति तोरी । रघुपति-चरन प्रीति नहिँ थोरी ॥
सुनहु परम पुनीत इतिहासा । जो सुनि सकल सोक भ्रम नासा ॥

dhanya satī pāvani mati torī | raghupati-carana prīti nahim̐ thorī ||
sunahu parama punīta itihāsā | jo suni sakala soka bhrama nāsā ||

उपजइ राम चरन बिस्वासा । भव निधि तर नर बिनहिं प्रयासा ॥

upajai rāma carana bisvāsā | bhava nidhi tara nara binahiṃ prayāsā ||