अध्याय 106: शिव-मन्दिर में गुरु की सीख का अपमान

एक बार गुरु लीन्ह बोलाई । मोहि नीति बहु भाँति सिखाई ॥
सिव सेवा घर फल सुत सोई । अबिरल भगति राम-पद होई ॥

eka bāra guru līnha bolāī | mohi nīti bahu bhām̐ti sikhāī ||
siva sevā ghara phala suta soī | abirala bhagati rāma-pada hoī ||

रामहिं भजहिं तात सिव धाता । नर पावँर के केतिक बाता ॥
जासु चरन अज सिव अनुरागी । तासु द्रोहँ सुख चहसि अभागी ॥

rāmahiṃ bhajahiṃ tāta siva dhātā | nara pāvam̐ra ke ketika bātā ||
jāsu carana aja siva anurāgī | tāsu droham̐ sukha cahasi abhāgī ||

हर कहुँ हरि सेवक गुरु कहेऊ । सुनि खगनाथ हृदय सम दहेऊ ॥
अधम जाति में विद्या पाये । भयउँ जथा अहि दूध पिआये ॥

hara kahum̐ hari sevaka guru kaheū | suni khaganātha hṛdaya sama daheū ||
adhama jāti meṃ vidyā pāye | bhayaum̐ jathā ahi dūdha piāye ||

मानी कुटिल कुभाग्य कुजाती । गुरु कर द्रोह करउँ दिन राती ॥
अति दयाल गुरु स्वल्प न क्रोधा । पुनि पुनि मोहि सिखाव सुबोधा ॥

mānī kuṭila kubhāgya kujātī | guru kara droha karaum̐ dina rātī ||
ati dayāla guru svalpa na krodhā | puni puni mohi sikhāva subodhā ||

जेहि ते नीच बड़ाई पावा । सो प्रथमहिं हठि ताहि नसावा ॥
धूम अनल सम्भव सुनु भाई । तेहि बुझाव-घन पदवी पाई ॥

jehi te nīca bar̤āī pāvā | so prathamahiṃ haṭhi tāhi nasāvā ||
dhūma anala sambhava sunu bhāī | tehi bujhāva-ghana padavī pāī ||

रज मग परी निरादर रहई । सब कर पद प्रहार नित सहई ॥
मरुत उड़ाव प्रथम तेहि भरई । पुनि नृप नयन किरीटन्हि परई ॥

raja maga parī nirādara rahaī | saba kara pada prahāra nita sahaī ||
maruta ur̤āva prathama tehi bharaī | puni nṛpa nayana kirīṭanhi paraī ||

सुनु खगपति अस समुझि प्रसङ्गा । बुध नहिँ करहिँ अधम कर सङ्गा ॥
कबि कोबिद गावहिँ असि नीती । खल सन कलह न भल नहिँ प्रीती ॥

sunu khagapati asa samujhi prasaṅgā | budha nahim̐ karahim̐ adhama kara saṅgā ||
kabi kobida gāvahim̐ asi nītī | khala sana kalaha na bhala nahim̐ prītī ||

उदासीन नित रहिय गोसाईं । खल परिहरिअ स्वान की नाँई ॥
मैं खल हृदयँ कपट कुटिलाई । गुरु हित कहहिँ न मोहि सोहाई ॥

udāsīna nita rahiya gosāīṃ | khala pariharia svāna kī nām̐ī ||
maiṃ khala hṛdayam̐ kapaṭa kuṭilāī | guru hita kahahim̐ na mohi sohāī ||