अध्याय 57: शुक की सीख और समुद्र के तीन दिन

सुनत सभय मन मुख मुसुकाई । कहत दसानन सबहि सुनाई ॥
भूमि परा कर गहत अकासा । लघु तापस कर बाग-बिलासा ॥

sunata sabhaya mana mukha musukāī | kahata dasānana sabahi sunāī ||
bhūmi parā kara gahata akāsā | laghu tāpasa kara bāga-bilāsā ||

कह सुक नाथ सत्य सब बानी । समुझहु छाडि प्रकृति अभिमानी ॥
सुनहु बचन मम परिहरि क्रोधा । नाथ राम सन तजहु बिरोधा ॥

kaha suka nātha satya saba bānī | samujhahu chāḍi prakṛti abhimānī ||
sunahu bacana mama parihari krodhā | nātha rāma sana tajahu birodhā ||

अति कोमल रघुबीर सुभाऊ । जद्यपि अखिल लोक कर राऊ ॥
मिलत कृपा तुम्ह पर प्रभु करिहीं । उर अपराध न एकउ धरिहीं ॥

ati komala raghubīra subhāū | jadyapi akhila loka kara rāū ||
milata kṛpā tumha para prabhu karihīṃ | ura aparādha na ekau dharihīṃ ||

जनक-सुता रघुनाथहि दीजे । एतना कहा मोर प्रभु कीजै ॥
जब तेहिं कहा देन कहा बैदेही । चरन प्रहार कीन्ह सठ तेही ॥

janaka-sutā raghunāthahi dīje | etanā kahā mora prabhu kījai ||
jaba tehiṃ kahā dena kahā baidehī | carana prahāra kīnha saṭha tehī ||

नाइ चरन सिरु चला सो तहाँ । कृपासिन्धु रघुनायक जहाँ ॥
करि प्रनाम निज कथा सुनाई । राम कृपाँ आपनि गति पाई ॥

nāi carana siru calā so tahām̐ | kṛpāsindhu raghunāyaka jahām̐ ||
kari pranāma nija kathā sunāī | rāma kṛpām̐ āpani gati pāī ||

रिषि अगस्ति के साप भवानी । राछस भयउ रहा मुनि ज्ञानी ॥
बन्दि राम-पद बारहिँ बारा । मुनि निज आश्रम कहुँ पगु धारा ॥

riṣi agasti ke sāpa bhavānī | rāchasa bhayau rahā muni jñānī ||
bandi rāma-pada bārahim̐ bārā | muni nija āśrama kahum̐ pagu dhārā ||