अध्याय 40: माल्यवान का समर्थन, विभीषण की पुनः विनती

माल्यवन्त अति सचिव सयाना । तासु बचन सुनि अति सुख माना ॥
तात अनुज तब नीति-विभूषन । सो उर धरहु जो कहत विभीषन ॥

mālyavanta ati saciva sayānā | tāsu bacana suni ati sukha mānā ||
tāta anuja taba nīti-vibhūṣana | so ura dharahu jo kahata vibhīṣana ||

रिपु उतकरष कहत सठ दोऊ । दूरि न करहु इहाँ है कोऊ ॥
माल्यवन्त गृह गयउ बहोरी । कहइ विभीषन पुनि कर जोरी ॥

ripu utakaraṣa kahata saṭha doū | dūri na karahu ihām̐ hai koū ||
mālyavanta gṛha gayau bahorī | kahai vibhīṣana puni kara jorī ||

सुमति कुमति सब कें उर रहहीं । नाथ पुरान निगम अस कहहीं ॥
जहाँ सुमति तहँ सम्पति नाना । जहाँ कुमति तहँ बिपति निदाना ॥

sumati kumati saba keṃ ura rahahīṃ | nātha purāna nigama asa kahahīṃ ||
jahām̐ sumati taham̐ sampati nānā | jahām̐ kumati taham̐ bipati nidānā ||

तव उर कुमति बसी बिपरीता । हित अनहित मानहु रिपु प्रीता ॥
कालराति निसिचर-कुल केरी । तेहि सीता पर प्रीति घनेरी ॥

tava ura kumati basī biparītā | hita anahita mānahu ripu prītā ||
kālarāti nisicara-kula kerī | tehi sītā para prīti ghanerī ||