निसिचरि एक सिन्धु मह रहई । करि माया नभु के खग गहई ॥
जीव-जन्तु जे गगन उड़ाहीं । जल बिलोकि तिन्ह कै परिछाहीं ॥
nisicari eka sindhu maha rahaī | kari māyā nabhu ke khaga gahaī ||
jīva-jantu je gagana ur̤āhīṃ | jala biloki tinha kai parichāhīṃ ||
सुन्दरकाण्ड
अध्याय 3: छाया पकड़ने वाली का वध, सोने की लंका
10 श्लोक · 3 में से 60
इस अध्याय में क्या होता है
छाया पकड़ने वाली का वध, सोने की लंका
समुद्र में एक राक्षसी आकाश में उड़ते जीवों की जल पर पड़ी परछाईं पकड़कर उन्हें खा जाती है। वह यही छल हनुमान से करती है। कपि कपट पहचानकर उसे मार देते हैं और पार पहुँचते हैं। वे निर्भय होकर एक बड़े पर्वत पर चढ़ते हैं। शिवजी उमा से कहते हैं कि इसमें कपि की कोई बड़ाई नहीं, यह प्रभु का प्रताप है जो काल को भी खा जाता है। पर्वत से हनुमान समुद्र से घिरी लंका और उसका चमकता सोने का परकोटा देखते हैं। तीन छन्द मणियों के भवन, बाज़ार, बाग, सरोवर, नाग और गन्धर्व कन्याएँ, और पहरा देते राक्षसों का वर्णन करते हैं। इतने रखवाले देखकर कपि रात में छोटा रूप धरकर नगर में जाने का निश्चय करते हैं।
गहइ छाहँ सक से न उड़ाई । एहि बिधि सदा गगन-चर खाई ॥
सोइ छल हनूमान कहँ कीन्हा । तासु कपट कपि तुरतहिं चीन्हा ॥
gahai chāham̐ saka se na ur̤āī | ehi bidhi sadā gagana-cara khāī ||
soi chala hanūmāna kaham̐ kīnhā | tāsu kapaṭa kapi turatahiṃ cīnhā ||
ताहि मारि मारुतसुत बीरा । बारिधि पार गयउ मतिधीरा ॥
तहाँ जाइ देखी बन सोभा । गुञ्जत चंचरीक मधु लोभा ॥
tāhi māri mārutasuta bīrā | bāridhi pāra gayau matidhīrā ||
tahām̐ jāi dekhī bana sobhā | guñjata caṃcarīka madhu lobhā ||
नाना तरु फल फूल सुहाये । खग मृग बृन्द देखि मन भाये ॥
सैल बिसाल देखि एक आगें । ता पर धाइ चढ़ेउ भय त्यागें ॥
nānā taru phala phūla suhāye | khaga mṛga bṛnda dekhi mana bhāye ||
saila bisāla dekhi eka āgeṃ | tā para dhāi car̤heu bhaya tyāgeṃ ||
उमा न कछु कपि कै अधिकाई । प्रभु प्रताप जो कालहि खाई ॥
गिरि पर चढ़ि लङ्का तेहिं देखी । कहि न जाइ अति दुर्ग बिसेखी ॥
umā na kachu kapi kai adhikāī | prabhu pratāpa jo kālahi khāī ||
giri para car̤hi laṅkā tehiṃ dekhī | kahi na jāi ati durga bisekhī ||
अति उतङ्ग जलनिधि चहुँ पासा । कनक-कोट कर परम प्रकासा ॥
ati utaṅga jalanidhi cahum̐ pāsā | kanaka-koṭa kara parama prakāsā ||
कनक-कोट बिचित्र मनि-कृत, सुन्दरायतना घना ।
चउहट्ट हट्ट सुबट्ट बीथीं, चारु पुर बहु विधि बना ॥
गज बाजि खच्चर निकर पदचर, रथ बरूथिन्ह को गनै ।
बहु रूप निसिचर जूथ अतिबल, सेन बरनत नहिँ बनै ॥
kanaka-koṭa bicitra mani-kṛta, sundarāyatanā ghanā |
cauhaṭṭa haṭṭa subaṭṭa bīthīṃ, cāru pura bahu vidhi banā ||
gaja bāji khaccara nikara padacara, ratha barūthinha ko ganai |
bahu rūpa nisicara jūtha atibala, sena baranata nahim̐ banai ||
बन बाग उपबन बाटिका सर, कूप बापीं सोहहीं ।
नर-नाग-सुर-गन्धर्व कन्या, रूप मुनि मन मोहहीं ॥
कहुँ माल देह बिसाल सैल समान अतिबल गर्जहीं ।
नाना अखारेन्ह भिरहिँ बहु बिधि, एक एकन्ह तर्जहीं ॥
bana bāga upabana bāṭikā sara, kūpa bāpīṃ sohahīṃ |
nara-nāga-sura-gandharva kanyā, rūpa muni mana mohahīṃ ||
kahum̐ māla deha bisāla saila samāna atibala garjahīṃ |
nānā akhārenha bhirahim̐ bahu bidhi, eka ekanha tarjahīṃ ||
करि जतन भट कोटिन्ह बिकट तन, नगर चहुँ दिसि रच्छहीं ।
कहुँ महिष मानुष धेनु खर अज, खल निसाचर भच्छहीं ॥
एहि लागि तुलसीदास इन्ह की, कथा कछु एक है कही ।
रघुबीर सर तीरथ सरीरन्हि, त्यागि गति पैहहिं सही ॥
kari jatana bhaṭa koṭinha bikaṭa tana, nagara cahum̐ disi racchahīṃ |
kahum̐ mahiṣa mānuṣa dhenu khara aja, khala nisācara bhacchahīṃ ||
ehi lāgi tulasīdāsa inha kī, kathā kachu eka hai kahī |
raghubīra sara tīratha sarīranhi, tyāgi gati paihahiṃ sahī ||
पुर रखवारे देखि बहु, कपि मन कीन्ह बिचार ।
अति लघु रूप धरउँ निसि, नगर करउँ पइसार ॥
pura rakhavāre dekhi bahu, kapi mana kīnha bicāra |
ati laghu rūpa dharaum̐ nisi, nagara karaum̐ paisāra ||
पाठ का स्रोत: Wikisource · Public domain (Tulsidas, 16th c.; 1925 edition, Wikisource PD-1996 tag); transcription CC BY-SA 4.0