अध्याय 9: प्रहस्त की सलाह: पहले दूत भेजो

कहहिँ सचिव सठ ठकुरसोहाती । नाथ न पूर आव एहि भाँती ॥
बारिधि नाँघि एक कपि आवा । तासु चरित मन महँ सब गावा ॥

kahahim̐ saciva saṭha ṭhakurasohātī | nātha na pūra āva ehi bhām̐tī ||
bāridhi nām̐ghi eka kapi āvā | tāsu carita mana maham̐ saba gāvā ||

छुधा न रही तुम्हहिँ तब काहू । जारत नगर कस न धरि खाहू ॥
सुनत नीक आगें दुख पावा । सचिवन अस मत प्रभुहि सुनावा ॥

chudhā na rahī tumhahim̐ taba kāhū | jārata nagara kasa na dhari khāhū ||
sunata nīka āgeṃ dukha pāvā | sacivana asa mata prabhuhi sunāvā ||

जेहिं बारीस बँधायउ हेला । उतरेउ सेन-समेत सुबेला ॥
सो भनु मनुज खाब हम भाई । बचन कहहिँ सत्र गाल फुलाई ॥

jehiṃ bārīsa bam̐dhāyau helā | utareu sena-sameta subelā ||
so bhanu manuja khāba hama bhāī | bacana kahahim̐ satra gāla phulāī ||

तात बचन मम सुनु अति आदर । जनि मन गुनहु मोहि करि कादर ॥
प्रिय बानी जे सुनहिँ जे कहहीं । ऐसे नर निकाय जग अहहीँ ॥

tāta bacana mama sunu ati ādara | jani mana gunahu mohi kari kādara ||
priya bānī je sunahim̐ je kahahīṃ | aise nara nikāya jaga ahahīm̐ ||

बचन परम-हित सुनत कठोरे । सुनहिँ जे कहहिँ ते नर प्रभु थोरे ॥
प्रथम बसीठ पठउ सुनु नीती । सीता देइ करहु पुनि प्रीती ॥

bacana parama-hita sunata kaṭhore | sunahim̐ je kahahim̐ te nara prabhu thore ||
prathama basīṭha paṭhau sunu nītī | sītā dei karahu puni prītī ||