अध्याय 8: रावण का गर्व, चाटुकार मंत्री और प्रहस्त

तब रावन मय-सुता उठाई । कहइ लाग खल निज प्रभुताई ॥
सुनु तैं प्रिया बृथा भय माना । जग जोधा को मोहि समाना ॥

taba rāvana maya-sutā uṭhāī | kahai lāga khala nija prabhutāī ||
sunu taiṃ priyā bṛthā bhaya mānā | jaga jodhā ko mohi samānā ||

बरुन कुबेर पवन जम काला । भुज बल जितेउँ सकल दिगपाला ॥
देव दनुज नर सब बस मेरे । कवन हेतु उपजा भय तोरें ॥

baruna kubera pavana jama kālā | bhuja bala jiteum̐ sakala digapālā ||
deva danuja nara saba basa mere | kavana hetu upajā bhaya toreṃ ||

नाना विधि तेहि कहेसि बुझाई । सभाँ बहोरि बैठ सो जाई ॥
मंदोदरीं हृदय अस जाना । काल-बिबस उपजा अभिमाना ॥

nānā vidhi tehi kahesi bujhāī | sabhām̐ bahori baiṭha so jāī ||
maṃdodarīṃ hṛdaya asa jānā | kāla-bibasa upajā abhimānā ||

सभाँ आइ मन्त्रिन्ह तेहि बूझा । करब कवनि बिधि रिपु से जूझा ॥
कहहिँ सचिव सुनु निसिचर-नाहा । बार बार प्रभु पूछहु काहा ॥

sabhām̐ āi mantrinha tehi būjhā | karaba kavani bidhi ripu se jūjhā ||
kahahim̐ saciva sunu nisicara-nāhā | bāra bāra prabhu pūchahu kāhā ||

कहहु कवन भय करिय बिचारा । नर कपि भालु अहार हमारा ॥

kahahu kavana bhaya kariya bicārā | nara kapi bhālu ahāra hamārā ||