अध्याय 79: रावण की विशाल सेना और वानरों की भिड़न्त

चलेउ निसाचर कटक अपारा । चतुरङ्गिनी अनी बहु धारा ॥
विविध भाँति बाहन रथ जाना । बिपुल बरन पताक ध्वज नाना ॥

caleu nisācara kaṭaka apārā | caturaṅginī anī bahu dhārā ||
vividha bhām̐ti bāhana ratha jānā | bipula barana patāka dhvaja nānā ||

चले मत्त-गज-जूथ घनेरे । प्राबिट जलद मरुत जनु प्रेरे ॥
बरन बरन बिरदैत निकाया । समर सूर जानहिँ बहु माया ॥

cale matta-gaja-jūtha ghanere | prābiṭa jalada maruta janu prere ||
barana barana biradaita nikāyā | samara sūra jānahim̐ bahu māyā ||

अति विचित्र बाहिनी बिराजी । बीर बसन्त सेन जनु साजी ॥
चलत कटक दिगसिधुंर डगहीं । छुभित पयोधि कुधर डगमगहीं ॥

ati vicitra bāhinī birājī | bīra basanta sena janu sājī ||
calata kaṭaka digasidhuṃra ḍagahīṃ | chubhita payodhi kudhara ḍagamagahīṃ ||

उठी रेनु रवि गयउ छपाई । पवन-थकित बसुधा-अकुलाई ॥
पनव निसान घोर रव बाजहिं । प्रलय समय के घन जनु गाजहिं ॥

uṭhī renu ravi gayau chapāī | pavana-thakita basudhā-akulāī ||
panava nisāna ghora rava bājahiṃ | pralaya samaya ke ghana janu gājahiṃ ||

भेरि नफीरि बाज सहनाई । मारू राग सुभट सुखदाई ॥
केहरि नाद बीर सब करहीं । निज निज बल पौरुष उच्चरहीं ॥

bheri naphīri bāja sahanāī | mārū rāga subhaṭa sukhadāī ||
kehari nāda bīra saba karahīṃ | nija nija bala pauruṣa uccarahīṃ ||

कहइ दसानन सुनहु सुभट्टा । मर्दहु भालु कपिन्ह के ठट्टा ॥
हौँ मारिहउँ भूप दोउ भाई । अस कहि सनमुख फौज रेंगाई ॥

kahai dasānana sunahu subhaṭṭā | mardahu bhālu kapinha ke ṭhaṭṭā ||
haum̐ mārihaum̐ bhūpa dou bhāī | asa kahi sanamukha phauja reṃgāī ||

यह सुधि सकल कपिन्ह जब पाई । धाये करि रघुबीर दोहाई ॥

yaha sudhi sakala kapinha jaba pāī | dhāye kari raghubīra dohāī ||