अध्याय 24: तुम कौन-से रावण हो, अंगद पूछते हैं

धन्य कीस जो निज-प्रभु-काजा । जहँ तहँ नाचइ परिहरि लाजा ॥
नाचि कूदि करि लोग रिझाई । पति-हित करइ धरम निपुनाई ॥

dhanya kīsa jo nija-prabhu-kājā | jaham̐ taham̐ nācai parihari lājā ||
nāci kūdi kari loga rijhāī | pati-hita karai dharama nipunāī ||

अङ्गद स्वामिभक्त तव जाती । प्रभु गुन कस न कहसि एहि आँतो ॥
मैं गुन-गाहक परम-सुजाना । तब कटु रटनि करउँ नहिँ काना ॥

aṅgada svāmibhakta tava jātī | prabhu guna kasa na kahasi ehi ām̐to ||
maiṃ guna-gāhaka parama-sujānā | taba kaṭu raṭani karaum̐ nahim̐ kānā ||

कह कपि तब गुन-गाहकताई । सत्य पवनसुत मोहि सुनाई ॥
बन-बिधंसि सुत-बधि पुर-जारा । तदपि न तेहिं कछु कृत अपकारा ॥

kaha kapi taba guna-gāhakatāī | satya pavanasuta mohi sunāī ||
bana-bidhaṃsi suta-badhi pura-jārā | tadapi na tehiṃ kachu kṛta apakārā ||

सोइ बिचारि तव प्रकृति सुहाई । दसकन्धर मैं कीन्हि ढिठाई ॥
देखेउँ आइ जो कछु कपि भाषा । तुम्हरें लाज न रोष न माषा ॥

soi bicāri tava prakṛti suhāī | dasakandhara maiṃ kīnhi ḍhiṭhāī ||
dekheum̐ āi jo kachu kapi bhāṣā | tumhareṃ lāja na roṣa na māṣā ||

जौं असि मति पितु खाए कीसा । कहि अस बचन हँसा दस सीसा ॥
पितहि खाइ खातेउँ पुनि तोही । अबहीं समुझि परा कछु मोही ॥

jauṃ asi mati pitu khāe kīsā | kahi asa bacana ham̐sā dasa sīsā ||
pitahi khāi khāteum̐ puni tohī | abahīṃ samujhi parā kachu mohī ||

बालि-बिमल-जस-भाजन जानी । हतउँ न तोहि अधम अभिमानी ॥
कहु रावन रावन जग केते । मैं निज श्रवन सुने सुनु जेते ॥

bāli-bimala-jasa-bhājana jānī | hataum̐ na tohi adhama abhimānī ||
kahu rāvana rāvana jaga kete | maiṃ nija śravana sune sunu jete ||

बलिहि जितन एक गयउ पताला । राखेउ बाँधि सिसुन्ह हयसाला ॥
खेलहिँ बालक मारहिं जाई । दया लागि बलि दीन्ह छोड़ाई ॥

balihi jitana eka gayau patālā | rākheu bām̐dhi sisunha hayasālā ||
khelahim̐ bālaka mārahiṃ jāī | dayā lāgi bali dīnha chor̤āī ||

एक बहोरि सहसभुज देखा । धाइ धरा जिमि जन्तु बिसेखा ॥
कौतुक लागि भवन लेइ आवा । सो पुलस्ति मुनि जाइ छोड़ावा ॥

eka bahori sahasabhuja dekhā | dhāi dharā jimi jantu bisekhā ||
kautuka lāgi bhavana lei āvā | so pulasti muni jāi chor̤āvā ||