अध्याय 5: सीता का वस्त्र और सुग्रीव का वचन

कोन्हि प्रीति कछु बीच न राखा । लछिमन राम चरित सब भाखा ॥
कह सुग्रीव नयन भरि बारी । मिलिहि नाथ मिथिलेसकुमारी ॥

konhi prīti kachu bīca na rākhā | lachimana rāma carita saba bhākhā ||
kaha sugrīva nayana bhari bārī | milihi nātha mithilesakumārī ||

मन्त्रिन्ह सहित इहाँ एक बारा । बैठ रहेउँ मैं करत बिचारा ॥
गगन-पन्थ देखी मैं जाता । परबस परी बहुत बिलपाता ॥

mantrinha sahita ihām̐ eka bārā | baiṭha raheum̐ maiṃ karata bicārā ||
gagana-pantha dekhī maiṃ jātā | parabasa parī bahuta bilapātā ||

राम राम हा राम पुकारी । हमहि देखि दीन्हेउ पट डारी ॥
माँगा राम तुरत तेहिं दीन्हा । पट उर लाइ सोच अति कीन्हा ॥

rāma rāma hā rāma pukārī | hamahi dekhi dīnheu paṭa ḍārī ||
mām̐gā rāma turata tehiṃ dīnhā | paṭa ura lāi soca ati kīnhā ||

कह सुग्रीव सुनहु रघुबीरा । तजहु सोच मन आनहु धीरा ॥
सब प्रकार करिहउँ सेवकाई । जेहि बिधि मिलिहि जानकी आई ॥

kaha sugrīva sunahu raghubīrā | tajahu soca mana ānahu dhīrā ||
saba prakāra karihaum̐ sevakāī | jehi bidhi milihi jānakī āī ||