अध्याय 9: उपहास का स्वागत, काव्यकला का अभाव

खल परिहास होइ हित मोरा । काक कहहिं कलकंठ कठोरा ॥
हंसहि बक दादुर चातकही । हँसहिं मलिन खल बिमल बतकही ॥

khala parihāsa hoi hita morā | kāka kahahiṃ kalakaṃṭha kaṭhorā ||
haṃsahi baka dādura cātakahī | ham̐sahiṃ malina khala bimala batakahī ||

कबित रसिक न राम-पद-नेहू । तिन्ह कहँ सुखद हास रस एहू ॥
भाषा भनिति भोरि मति मोरी । हँसिबे जोग हँसें नहिं खोरी ॥

kabita rasika na rāma-pada-nehū | tinha kaham̐ sukhada hāsa rasa ehū ||
bhāṣā bhaniti bhori mati morī | ham̐sibe joga ham̐seṃ nahiṃ khorī ||

प्रभु-पद-प्रीति न सामुझि नीकी । तिन्हहिं कथा सुनि लागिहि फीकी ॥
हरि-हर-पद-रति मति न कुतरकी । तिन्ह कहँ मधुर कथा रघुबर की ॥

prabhu-pada-prīti na sāmujhi nīkī | tinhahiṃ kathā suni lāgihi phīkī ||
hari-hara-pada-rati mati na kutarakī | tinha kaham̐ madhura kathā raghubara kī ||

राम भगति-भूषित जियँ जानी । सुनिहहिं सुजन सराहि सुबानी ॥
कबि न होउँ नहिँ चतुर प्रबीनू । सकल कला सब बिद्या-हीनू ॥

rāma bhagati-bhūṣita jiyam̐ jānī | sunihahiṃ sujana sarāhi subānī ||
kabi na houm̐ nahim̐ catura prabīnū | sakala kalā saba bidyā-hīnū ||

आखर अरथ अलंकृति नाना । छन्द प्रबन्ध अनेक विधाना ॥
भाव-भेद रस-भेद अपारा । कबित दोष-गुन बिबिध प्रकारा ॥

ākhara aratha alaṃkṛti nānā | chanda prabandha aneka vidhānā ||
bhāva-bheda rasa-bheda apārā | kabita doṣa-guna bibidha prakārā ||

कबित बिबेक एक नहिं मोरें । सत्य कहउँ लिखि कागद कोरे ॥

kabita bibeka eka nahiṃ moreṃ | satya kahaum̐ likhi kāgada kore ||