अध्याय 34: रामनवमी को अयोध्या में आरम्भ

एहि बिधि सब संसय करि दूरी । सिर धरि गुरु पद पङ्कज धूरी ॥
पुनि सबही प्रनवउँ कर जोरी । करत कथा जेहिं लाग न खोरी ॥

ehi bidhi saba saṃsaya kari dūrī | sira dhari guru pada paṅkaja dhūrī ||
puni sabahī pranavaum̐ kara jorī | karata kathā jehiṃ lāga na khorī ||

सादर सिवहि नाइ अब माथा । बरनउँ बिसद राम गुन गाथा ॥
सम्बत सोरह सै एकतीसा । करउँ कथा हरि पद धरि सीसा ॥

sādara sivahi nāi aba māthā | baranaum̐ bisada rāma guna gāthā ||
sambata soraha sai ekatīsā | karaum̐ kathā hari pada dhari sīsā ||

नौमी भौम बार मधु मासा । अवधपुरीं यह चरित प्रकासा ॥
जेहि दिन राम जनम स्रुति गावहिँ । तीरथ सकल तहाँ चलि आवहिँ ॥

naumī bhauma bāra madhu māsā | avadhapurīṃ yaha carita prakāsā ||
jehi dina rāma janama sruti gāvahim̐ | tīratha sakala tahām̐ cali āvahim̐ ||

असुर नाग खग नर मुनि देवा । आइ करहिँ रघुनायक सेवा ॥
जन्म महोत्सव रचहिँ सुजाना । करहिं राम कल कीरति गाना ॥

asura nāga khaga nara muni devā | āi karahim̐ raghunāyaka sevā ||
janma mahotsava racahim̐ sujānā | karahiṃ rāma kala kīrati gānā ||