अध्याय 202: विराट रूप देखकर कौसल्या की विनती

अगनित रबि ससि सिव चतुरानन । बहु गिरि सरित सिन्धु महि कानन ॥
काल करम गुन ज्ञान सुभाऊ । सोउ देखा जो सुना न काऊ ॥

aganita rabi sasi siva caturānana | bahu giri sarita sindhu mahi kānana ||
kāla karama guna jñāna subhāū | sou dekhā jo sunā na kāū ||

देखी माया सब बिधि गाढ़ी । अति सभीत जोरें कर ठाढ़ी ॥
देखा जीव नचावइ जाही । देखी भगति जो छोरइ ताही ॥

dekhī māyā saba bidhi gār̤hī | ati sabhīta joreṃ kara ṭhār̤hī ||
dekhā jīva nacāvai jāhī | dekhī bhagati jo chorai tāhī ||

तन पुलकित मुख बचन न आवा । नयन मूँदि चरननि सिर नावा ॥
बिसमयवन्त देखि महँतारी । भये बहुरि सिसु रूप खरारी ॥

tana pulakita mukha bacana na āvā | nayana mūm̐di caranani sira nāvā ||
bisamayavanta dekhi maham̐tārī | bhaye bahuri sisu rūpa kharārī ||

अस्तुति करि न जाइ भय माना । जगत-पिता मैँ सुत करि जाना ॥
हरि जननी बहु बिधि समुझाई । यह जनि कतहुँ कहसि सुनु माई ॥

astuti kari na jāi bhaya mānā | jagata-pitā maim̐ suta kari jānā ||
hari jananī bahu bidhi samujhāī | yaha jani katahum̐ kahasi sunu māī ||