अध्याय 167: नगर चलने की राजा की विनती

सुनु नृप बिबिध जतन जग माहीँ । कष्टसाध्य पुनि होहिँ कि नाहीँ ॥
अहइ एक अति सुगम उपाई । तहाँ परन्तु एक कठिनाई ॥

sunu nṛpa bibidha jatana jaga māhīm̐ | kaṣṭasādhya puni hohim̐ ki nāhīm̐ ||
ahai eka ati sugama upāī | tahām̐ parantu eka kaṭhināī ||

मम आधीन जुगुति नृप सोई । मोर जाब तव नगर न होई ॥
आजु लगें अरु जब तेँ भयऊँ । काहू के गृह ग्राम न गयऊँ ॥

mama ādhīna juguti nṛpa soī | mora jāba tava nagara na hoī ||
āju lageṃ aru jaba tem̐ bhayaūm̐ | kāhū ke gṛha grāma na gayaūm̐ ||

जौँ न जाउँ तौ होइ अकाजू । बना आई असमञ्जस आजू ॥
सुनि महीस बोलेउ मृदु बानी । नाथ निगम असि नीति बखानी ॥

jaum̐ na jāum̐ tau hoi akājū | banā āī asamañjasa ājū ||
suni mahīsa boleu mṛdu bānī | nātha nigama asi nīti bakhānī ||

बड़े सनेह लघुन्ह पर करहीँ । गिरि निज सिरनि सदा तृन धरहीँ ॥
जलधि अगाध मौलि बह फेनू । सन्तत धरनि धरत सिर रेनू ॥

bar̤e saneha laghunha para karahīm̐ | giri nija sirani sadā tṛna dharahīm̐ ||
jaladhi agādha mauli baha phenū | santata dharani dharata sira renū ||