अध्याय 141: अवतार का एक और कारण

अपर हेतु सुनु सैलकुमारी । कहउँ बिचित्र कथा बिस्तारी ॥
जेहि कारन अज अगुन अरूपा । ब्रह्म भयउ कोसलपुर-भूपा ॥

apara hetu sunu sailakumārī | kahaum̐ bicitra kathā bistārī ||
jehi kārana aja aguna arūpā | brahma bhayau kosalapura-bhūpā ||

जो प्रभु बिपिन फिरत तुम्ह देखा । बन्धु समेत धरें मुनि बेखा ॥
जासु चरित अवलोकि भवानी । सती सरीर रहिहु बौरानी ॥

jo prabhu bipina phirata tumha dekhā | bandhu sameta dhareṃ muni bekhā ||
jāsu carita avaloki bhavānī | satī sarīra rahihu baurānī ||

अजहुँ न छाया मिटति तुम्हारी । तासु चरित सुनु भ्रम-रुज-हारी ॥
लीला कीन्हि जो तेहिं अवतारा । सो सब कहिहउँ मति अनुसारा ॥

ajahum̐ na chāyā miṭati tumhārī | tāsu carita sunu bhrama-ruja-hārī ||
līlā kīnhi jo tehiṃ avatārā | so saba kahihaum̐ mati anusārā ||

भरद्वाज सुनि सङ्कर बानी । सकुचि सप्रेम उमा हरषानी ॥
लगे बहुरि बरनइ बृषकेतू । सो अवतार भयउ जेहि हेतू ॥

bharadvāja suni saṅkara bānī | sakuci saprema umā haraṣānī ||
lage bahuri baranai bṛṣaketū | so avatāra bhayau jehi hetū ||