अध्याय 99: सुमन्त्र का लौटना, घोड़े भी शोकाकुल

प्राननाथ प्रिय देवर साथा । बीर-धुरीन धरें धनु भाथा ॥
नहिँ मग सम भ्रम दुख मन मोरें । मोहि लगि सोचु करिअ जनि भोरें ॥

prānanātha priya devara sāthā | bīra-dhurīna dhareṃ dhanu bhāthā ||
nahim̐ maga sama bhrama dukha mana moreṃ | mohi lagi socu karia jani bhoreṃ ||

सुनि सुमन्त्र सिय-सीतलि-बानी । भयउ बिकल जनु फनि-मनि-हानी ॥
नयन सूझ नहिँ सुनइ न काना । कहि न सकइ कछु अति अकुलाना ॥

suni sumantra siya-sītali-bānī | bhayau bikala janu phani-mani-hānī ||
nayana sūjha nahim̐ sunai na kānā | kahi na sakai kachu ati akulānā ||

राम प्रबोध कीन्ह बहु भाँती । तदपि होति नहिँ सीतल छाती ॥
जतन अनेक साथ हित कीन्हे । उचित उतर रघुनन्दन दीन्हे ॥

rāma prabodha kīnha bahu bhām̐tī | tadapi hoti nahim̐ sītala chātī ||
jatana aneka sātha hita kīnhe | ucita utara raghunandana dīnhe ||

मेटि जाइ नहिँ राम रजाई । कठिन करम गति कछु न बसाई ॥
राम-लखन सिय पद सिर नाई । फिरेउ बनिक जिमि मूर गवाँई ॥

meṭi jāi nahim̐ rāma rajāī | kaṭhina karama gati kachu na basāī ||
rāma-lakhana siya pada sira nāī | phireu banika jimi mūra gavām̐ī ||